სიღნაღის ამბები

,,სიღნაღელი ჩინოსნები, რომელთაც კრიტიკული შეფასებები ,,ბალი ათ შაურად“ მიაჩნიათ და ცა ქუდი, დედამიწა კი ქალამანი ჰგონიათ”

,,სიღნაღის საკრებულო ოფიციალური უწყების ოფიციალური სხდომის ჩანაწერს არ აკეთებს. ამიტომაც საკრებულოს სხდომაზე ვინც რა უნდა თქვას, წისქვილი მაინც ხელისუფლების სასარგებლოდ ტრიალებს და სხდომაზე გამოთქმულ ყველა შეფასებას, კრიტიკას, პასქვილსა თუ წინადადებას ქარი ისე  შორს მიაფრიალებს, ნაკვალევიც კი არსად რჩება"

ნელი ვარდიაშვილი
      სიღნაღის საკრებულოს სხდომაზე, რომელსაც დავესწარი, ერთ-ერთ საკითხად აიპ სიღნაღის სახელოვნებო და საგანმანათლებლო მომსახურების ცენტრის დირექტორის, ნათელა ნადიკაშვილის 2021 წელს გაწეული მუშაობის ანგარიში გამოიტანეს.  ჩემი დასწრების მიზანი, წინდაწინვე იყო იმ პრობლემებზე საუბარი, რომლებიც მუნიციპალიტეტში არსებულ ახალგაზრდულ ცენტრებში, ბიბლიოთეკებსა და მუზეუმებში წლების განმავლობაში არსებობს და მისი გამოსწორებისთვის არავინ ზრუნავს. მინდოდა, ცენტრის დირექტორისგან საჯაროდ მიმეღო პასუხები კითხვებზე, რომლებიც დიდი ხანია გაჩნდა ამ დაწესებულებებში  შექმნილი პრობლემებისა თუ მავანთა დანაშაულებრივი, ანდაც საქმისადმი გულგრილი დამოკიდებულებების გამო. ცხადია, იმის გარკვევაც მსურდა, როდემდე უნდა დახარჯოს სახელმწიფომ ბიუჯეტიდან ფული არარსებულ მუზეუმებში ან იქ ,,დასაქმებული“ პერსონალის დიდი ნაწილი, რამდენ ხანს უნდა იჯიბავდეს ,,უსაქმურობის პენსიას“?

ქალბატონი ნათელა ნადიკაშვილის ანგარიშის სიგრძე-სიგანეზე მკითხველს ვერაფერს მოვუყვები, რადგან ცენტრის დირექტორს საკრებულოს სხდომაზე ანგარიშის სრულად წაკითხვა დაეზარა, საკრებულოს წევრთა უმრავლესობას კიდევ, მოსმენა.  მითხრეს, რომ  საკითხების განხილვის გარეშე კრების მხიარულად დატოვების  გამოცდილება, სიღნაღის საკრებულოს დიდი აქვს. აღმოჩნდა, რომ სხდომა, რომელსაც დავესწარი, დროის ხანგრძლივობით, აქამდე ჩატარებულ ყველა სხდომაზე მასშტაბური იყო. – გაგიმართლათ ან თქვენი მოსვლის მოლოდინის ფაქტორმა იმუშავა, თორემ სხდომაზე მხოლოდ დღის წესრიგს მიმოიხილავდნენ, ორ სიტყვას ეტყოდნენ ერთმანეთს და ერთი თვის შემდეგ  ხანმოკლე შეხვედრის იმედით დაიშლებოდნენო _ წლობით დამკვიდრებულ წეს-ჩვეულებებში გამარკვიეს ოპოზიციის წარმომადგენლებმა.  აღნიშნული სხდომის ანშლაგს კიდევ ერთი წამახალისებელი ფაქტორი გამოუჩნდა- სიღნაღის ახლადარჩეული მერი, მალხაზ ბეგიაშვილი, როგორც მითხრეს, მეორედ გამოჩნდა საკრებულოს სხდომაზე და მშვიდობის მტრედის ფუნქცია წარმატებით შეასრულა.

პათოსმა, რომელიც მერის  ხანმოკლე და პერიოდულ გამოსვლებს ნიავივით მოჰყვებოდა, სხდომაზე ანგარიშის წარმდგენელთათვის გამაგრილებელი ფუნქციაც შეასრულა – აბათილებდა ყველანაირ წინააღმდეგობას და ზღვა დაპირებებით ავსებდა ყველა იქ მყოფს. როგორც ჩანს, ,,იდეებს რა ვუყო“, მალხაზ ბეგიაშვილს სერიოზულად  აწუხებს, მაგრამ მთავარია, მისი მერობის დროს, ამ იდეებმა ხორცი შეისხას და განსხეულდეს. ,,ყველა მუნიციპალიტეტი ეძებს ნიშას, თუ როგორი სახით უნდა წარსდგეს საზოგადოების წინაშე. ჩვენ გვინდა, ნიშად ავირჩიოთ  კულტურის სფერო. ქვემო მაჩხაანში მოვახდინოთ ძველი, მოძრავი თეატრის რეაბილიტაცია  – კეთილმოვაწყოთ ამ სოფელთან დამაკავშირებელი გზა და ჩავატაროთ მაჩხაანის ე.წ. სიღნაღიზაცია ( სიღნაღის მსგავსად გალამაზება და განვითარება. რედ). ანაგაში, სანდრო ახმეტელის მუზეუმში მოვაწყოთ ღონისძიებები. ასევე, აღვადგინოთ ვაქირის კულტურის სახლი, რომელიც სერიოზულ რესტავრაციას მოითხოვს. გვინდა,  გადავჭრათ პრობლემების ეს ნაწილი. გვაქვს სხვა გლობალური იდეებიც და ყველა მიმართულებით ვმუშაობთ“ _ განგვიცხადა  სიღნაღის მერმა.

სამწუხაროდ, აიპ სიღნაღის სახელოვნებო და საგანმანათლებლო მომსახურების ცენტრის დირექტორის, ნათელა ნადიკაშვილის ანგარიშში, მერის მიერ დაპირებული ნიშის აჩრდილიც  კი ვერსად შევნიშნეთ. მეტიც, სიღნაღის მუზეუმებსა და ბიბლიოთეკებს, წელიწადში ერთხელ, ჩვენი პატარები რომ არ ალამაზებდნენ სიმღერებით, ლექსებითა და ნახატებით, ამ დაწესებულებების დიდი ნაწილი სრულიად ფუნქციადაკარგული იქნებოდა.  არადა, 2021 წელს მუნიციპალიტეტის აიპ სიღნაღის სახელოვნებო და საგანმანათლებლო მომსახურების ცენტრის ბიუჯეტი 239 100 ლარი იყო. აქედან სახელფასო ფონდს მოხმარდა 184 400 ლარი, 16 800 ლარი კი შტატგარეშე თანამშრომლების ხელფასებად გაიცა. ცენტრს ოფისის ხარჯებში- 6 792 ლარი აქვს მითითებული. გაპარტახებული მუზეუმების აღდგენა-რესტავრაცია კი ენის დასასველებლადაც არავის გახსენებია, თუ არ ჩავთვლით ილო მოსაშვილის მუზეუმს ვაქირში, სადაც 1 100 ლარად შეაკეთეს ჭიშკარი, რომელიც წლების განმავლობაში ისე იყო განადგურებული, მუზეუმში მიმსვლელები ღობიდან ძვრებოდნენ.  ქალბატონმა ნათელამ ანგარიშში მხოლოდ ერთი წინადადება დაუთმო იმას, რომ ზოგიერთ მუზეუმში განადგურებულია შენობა- ნაგებობა და იქ ადამიანების ყოფნა საფრთხეს უქმნის მათ სიცოცხლეს, დაზიანებულია სამუზეუმე ექსპონატები, დასაქმებული მეცნიერ თანამშრომლების გარკვეული ნაწილის  ცოდნა კი ვერ აკმაყოფილებს მუზეუმებში არსებულ მოთხოვნებს. სამწუხაროდ, სიღნაღის საკრებულოს უმრავლესობის რამდენიმე წარმომადგენელი, საკრებულოს თავმჯდომარე დავით ჯანიკაშვილთან ერთად, შეეცადნენ, საკრებულოს სხდომაზე ჩემი ხმა და ობიექტურად დასმული კითხვები ჩაეხშოთგაურკვეველი სახის რეპლიკებით, მათ საშუალება არ მომცეს, საჯაროდ, სრულყოფილად მიმეღო მომხსენებლის პასუხები და მუნიციპალიტეტის მუზეუმებსა და ბიბლიოთეკებში არსებული რეალობის შესახებ ინფორმაცია საკრებულოს ყველა წევრს მოესმინა.

ამიტომ, აიპ სიღნაღის სახელოვნებო და საგანმანათლებლო მომსახურების ცენტრის ხელმძღვანელს ანგარიშის წარდგენა ვაცადე, მას ცალკე შევხვდი და საკმაოდ გულახდილი ინტერვიუც ჩავწერე.

    _ ქალბატონო ნათელა, თქვენს ანგარიშში, მუზეუმებსა და ბიბლიოთეკებში არსებულ სავალალო მდგომარეობას  მხოლოდ ორი სიტყვით რატომ შეეხეთ? რატომ არ თქვით სიმართლე, რაც იქ ხდება? ამ ფორმით, ხომ თქვენ დანაშაულს დააფარეთ ხელი?

_ როგორ გეკადრებათ, მე ხელს  არავის ვაფარებ.

   _ გასაგებია… თქვენ თქვით, რომ იმ ღონისძიებებში, რომლებიც მუზეუმებსა და ბიბლიოთეკებში ტარდება და ამით თავს იწონებს თქვენი სამსახური, მეტწილად მონაწილეობენ ბავშვები. მხოლოდ ბავშვებზე რატომ გაქვთ გათვლა? უფრო კრეატიულ იდეებს რატომ არ იგონებთ და ახორციელებთ?

_ წლის დასაწყისში ყველა მუზეუმის მენეჯერს მოაქვს სამუშაო გეგმა, რომელშიც გაწერილია, რა უნდა გააკეთონ წლის განმავლობაში. ჩვენ ვამტკიცებთ ამ გეგმას. სამუზეუმე კვირეულები მთელ რესპუბლიკაში, ყველა მუნიციპალიტეტში ტარდება და ჩვენც ამიტომ ვატარებთ. ასევეა საბიბლიოთეკო კვირეულიც.

   _ ანუ მეუბნებით, რომ თქვენს მენეჯერებს განსხვავებული და ახალი იდეები არ აქვთ. მათი მენეჯმენტი ბავშვების ლექსებსა და გამოფენებს ვერ სცილდება?

_ თქვენ მოგვაწოდეთ კრეატიული აზრები, უარი გითხარით ოდესმე?

   _ მე რატომ უნდა მოგაწოდოთ, თქვენ ხომ შტატიანი მენეჯერები გყავთ…ზოგიერთ მუზეუმში კი 2 ან 3 თამაშრომელია, რომლებიც ხელფასებს სწორედ ამიტომ უნდა იღებდნენ. ასე არ არის?

_ თქვენ რა გინდათ, ლიტერატურული საღამოები მოვაწყო?  (?! – ავტორი) ცოტა ხნის წინ მქონდა თათბირი და გავაფრთხილე ყველა, მოეძიებინათ საინტერესო თემები. ან მე რატომ მეკითხებით ამას, თავად მუზეუმის მენეჯერებს კითხეთ, რატომ არ სთავაზობთ თქვენს უფროსს კრეატიულ ინიციატივებს თქო? ვუთხარი მათ, მე ხომ არ მოგაწვდით იდეებს, თქვენ უნდა მომაწოდოთ მეთქი, მაგრამ რა იდეები, იმას ვერ მივაღწიე, რომ იმეილი შეექმნათ. კომპიუტერის ცოდნის პრობლემაც აქვთ. არადა, როგორ გავათავისუფლო, ზოგი კარგი თანამშრომელია, დარგის სპეციალისტი და კომპიუტერის არცოდნის გამო გავუშვა სახლში? სხვა პრობლემებიც არსებობს…

   _ როგორც ვხვდები, სიღნაღის მუზეუმებში არსებული ყველა პრობლემის შესახებ იცით. სოფელ ვაქირში, ვასო გოძიაშვილის მუზეუმში, თაგვებისგან დახრული ვასოს  სასცენო ფორმებიც ნანახი გექნებათ. ასეა?

_ დიახ, ნანახი მაქვს და არაერთხელ მივეცი შენიშვნა ამის გამო. მენეჯერის საქმიანობაში შედის, დაიცვას და გაუფრთხილდეს მუზეუმში არსებულ ნივთებს. ყველა ნივთს აუცილებლად უნდა ჰქონდეს პასპორტი. ყოველწლიურად ვატარებთ ინვენტარიზაციას და გამოუსადეგარ ნივთებს კომისიის დასკვნის საფუძველზე ვანადგურებთ. ვასო გოძიაშვილის დაზიანებული ფორმები არ გაგვინადგურებია და იგივე სახითაა გამოფენილი.

   _ სოფელ ვაქირში, ილო მოსაშვილის მუზეუმზეც გკითხავთ. შენობის კედელს დაახლოებით 20 სანტიმეტრიანი სიგრძივი ბზარი რომ აქვს, ესეც გეცოდინებათ. წელს, ცენტრალური ჭიშკარი გააკეთეთ, მაგრამ დაზიანებულია მუზეუმის ღობე და ავარიული შენობა საფრთხისშემცველია. არასწორად ხომ არ ვსაუბრობ?

_ არ საუბრობთ არასწორად. შენობა ცენტრალური გზის პირზეა და ყველასთვის ადვილი დასანახია მუზეუმის დაზიანებული კედელიც. რაც უნდა ვმალოთ, ამის დაფარვა შეუძლებელია. ღმერთმა დაგვიფაროს, ამას მოჰყვეს მსხვერპლი. უამრავი მოხსენებითი ბარათი მაქვს დაწერილი კონკრეტულად ამ საკითხის ირგვლივ მერიაში, მაგრამ ჩემი მცდელობების შედეგი არის ის, რასაც ხედავთ- პრობლემის გამოსწორება არ ხდება. ჩვენ ცენტრს, 2021 წლის ბიუჯეტში 7 700 ლარი მქონდა და 6 700 ავითვისეთ. მორჩენილი თანხით გავაკეთებინეთ მოსაშვილის მუზეუმის ჭიშკარი.

    _ გადავინაცვლოთ ჯუგაანში, სანდრო შანშიაშვილის სახლ-მუზეუმში, რომელიც ფაქტობრივად აღარ არსებობს, მისი მენეჯერი კი, ადგილობრივი მუნიციპალიტეტის შენობაშია. მუზეუმში ცხოველები დასეირნობენ, შენობაში შესვლა კი სიცოცხლისთვის სახიფათოა, რადგან კედლებიც ინგრევა. ოპოზიცია ამბობს, რომ რამდენიმე წლის წინ, ბიუჯეტმა გამოყო 80 ათასი ლარი მის აღსადგენად, მაგრამ ეს ფული გაქრა.  აღნიშნული ფაქტის შესახებ რა იცით?

_ რამდენიმე წლის წინ, მე, ნოდარ ბაკაშვილი (არქიტექტორი) და მერის მაშინდელი მოადგილე თემურ ბალარჯიშვილი ვიყავით ადგილზე და შევისწავლეთ არსებული მდგომარეობა. მათ მითხრეს, 80 ათასი არ ეყოფა, 100 ათასი ლარიდან 150 ათას ლარამდე დასჭირდებაო. ვერ გეტყვით, 80 ათასი ლარი სად წავიდა, რომელიც ამ მუზეუმის აღდგენისთვის უნდა დახარჯულიყო, ეგ ჩემს კომპეტენციას სცილდება. ქალბატონო ნელი, თქვენი გვერდში დგომით თუ რაიმეს მივაღწევთ და ჩვენს მუზეუმებს ეშველება, მადლობის მეტი რა მეთქმის. როგორ გგონიათ, მე არ მაწუხებს იქ რაც ხდება?

.

   _ უნდა გადარდებდეთ კიდეც, მაგრამ ეს არ ეტყობოდა თქვენს ანგარიშს. აღნიშნული საკითხები რატომ მწვავედ არ დააყენეთ და მხოლოდ ორ სიტყვაში რატომ მოაქციეთ პრობლემები? გასაგებია, რომ რაც თქვენს ხელთაა, იმაზე მეტ თანხას ვერ დახარჯავთ, მაგრამ თუ მუზეუმები ისეთ მდგომარეობაში იქნება, რომ იქ, წლების განმავლობაში დამთვარიელებელი ვერ შევა, არ გექნებათ მიმზიდველი იდეები ვიზიტორების დასაინტერესებლად, რა აზრი აქვს თუნდაც მცირედის ხარჯვას?

_ სწორედ ამიტომ გვინდა, ახლებურად დავიწყოთ მუშაობა. დაახლოებით ერთი თვის წინ ყველა სოფლის მუზეუმისა თუ ბიბლიოთეკის მენეჯერი შევკრიბეთ  სიღნაღის მერის კაბინეტში და გადავწყვიტეთ, რაღაც ახალი მოვიფიქროთ. მერმა ყველა მუზეუმის ხელმძღვანელს მოსთხოვა, პრობლემების სია პირადად მისთვის მიეტანათ. ამბობს, რომ უნდა ვიმუშავოთ ამ პრობლემების აღმოსაფხვრელად. ბატონი მალხაზის იმედი გვაქვს. წეღან თქვა კიდევაც, კარგი იქნება, ერთ სივრცეში გამოვფინოთ რამდენიმე მუზეუმიდან წამოღებული ნივთიო.

     _ და რას ნიშნავს ეს? სიღნაღის მერი აპირებს, მუზეუმებში არსებული პრობლემები ერთი ხელის დაკვრით მოაგვაროს, აღდგენის ნაცვლად გააუქმოს მუზეუმები არსებულ შენობებში და ყველა ერთად, ერთ სივრცეში შეყაროს? თქვენ თვლით, რომ ეს იქნება საუკეთესო გამოსავალი?

_ არაც და კიც… რაც შეეხება თაგვების დაღრღნილ ვასო გოძიაშვილის ნივთებს, გეთანხმებით, ეს ჩვენი სირცხვილია, ჟურნალისტის განსახილველი თემა არ უნდა გამხდარიყო.

სიღნაღის ახლადარჩეულმა მერმა საკრებულოს სხდომაზე ისე ამაყად განაცხადა, სიღნაღის მუნიციპალიტეტში სოციალური პოლიტიკა შესაცვლელიაო, თითქოს მერად გახდომამდე ყოფილი მერის მოადგილე სხვა მალხაზ ბეგიაშვილი იყო ან უფლებები ჰქონდა აყრილი.

,,საარჩევნო კამპანიის დროს ვნახეთ და დავრწმუნდით, რომ აუცილებელია სიახლე. მეტ- ნაკლები სიზუსტით მოვახდინეთ იმ გაჭირვებული ოჯახების აღწერა, რომლებიც საჭიროებენ სოციალურ დახმარებებს. ადამიანები ცხოვრობენ ცუდ  პირობებში და არ შესწევთ ძალა, რაიმე შეცვალონ – საცხოვრებელი გაარემონტონ და არ ჩამოენგრეთ, ან სახლის სახურავი არ აქვთ და ვერ აკეთებენ. აქამდე მერიას არ ჰქონდა შესაძლებლობა, რომ მათთვის დახმარება აღმოეჩინა. გამოჩნდა ფანჯარა და ის გვაძლევს საშუალებას, დავეხმაროთ თანამემამულეებს“, – განაცხადა მერმა.

ამრიგად, სიღნაღის საკრებულომ ,,სიღნაღის მუნიციპალიტეტის სოციალური დახმარების პროგრამა და მისი გაცემის წესის დამტკიცების შესახებ“ სიღნაღის მუნიციპალიტეტის საკრებულოს 2018 აპრილის #21 დადგენილებაში ცვლილებები შეიტანა. სოციალური სამსახურის ხელმძღვანელმა, ლია ბაკაშვილმა კი გაგვაცნო ცვლილებების ნუსხა. გაირკვა, რომ დახმარებები გაეზარდათ მრავალშვილიანებს, მძიმე დაავადებების მქონე პირებს, სტუდენტებს…

დაზიანებული შენობა-ნაგებობების აღდგენისთვის, მერია თავად გამოაცხადებს ტენდერს, გამარჯვებული კომპანია კი შეასრულებს სამუშაოებს. ცხადია, ეს ყველაფერი კარგია, მაგრამ ოპოზიციის წარმომადგენლებმა ამ ახალ ინიციატივას იქვე გადაასხეს ცივი წყალი. მათი თქმით, სტუდენტებს მანამდეც ეხმარებოდნენ, მაგრამ არჩევნებში ,,ოცნების” მხარდამჭერა მათთვის აუცილებელი პირობა იყო.

,,დაგვასწარით სხდომებს, სადაც ეს საკითხები წყდება და მერე უკეთ გაირკვევა, სინამდვილეში რა ან როგორ ხდება. ჩვენ გვაქვს თქვენ მიერ დახმარება გაწეული სტუდენტების სია. როცა მას გაეცნობით, დარწმუნდებით ჩვენს სიმართლეში“, _  განუცხადა მერიის წარმომადგენელს საკრებულოს ოპოზიციონერმა წევრმა, ნატო უსენაშვილმა და დასძინა, რომ მუნიციპალიტეტში უმრავლესობა სიღარიბის ზღვარს მიღმაა. უსენაშვილის ბოლო წინადადებას საკრებულოს თავმჯდომარის სხარტი პროტესტი მოჰყვა – ფეხზე წამომხტარმა დავით ჯანიკაშვილმა იუარა – უმრავლესობა სიღარიბის ზღვარს მიღმა არააო.

სიღნაღის მუნიციპალიტეტის მერიის შიდა აუდიტის უფროსის, ვასილ ბალიაშვილის 2021 წლის გაწეული მუშაობის ანგარიში საკრებულოს სხდომაზე მეხუთე საკითხად გამოიტანეს. ეს ის შიდა აუდიტორია, რომელიც, გასულ წელს სახელმწიფო აუდიტის დასკვნაში ნეგატიური შეფასებით მოხვდა. სახელმწიფო აუდიტის კრიტიკა, წესით და რიგით, შიდა აუტიდის სამსახურის ხელმძღვანელისთვის ე.წ. ,,ვირის აბანოს“ ერთგვარი საგზური უნდა გამხდარიყო, თუმცა  აღმოჩნდა, რომ ბალიაშვილს, სიღნაღის მუნიციპალიტეტის სხვა ჩინოსნების მსგავსად, კრიტიკული შეფასებები ,,ბალი ათ შაურად“ მიაჩნია და ცა ქუდი, დედამიწა კი ქალამანი ჰგონია.

ოპოზიციამ სახელმწიფო აუდიტის სკანდალური, მწვავე  დასკვნა სიღნაღის მერიის შიდა აუდიტის ხელმძღვანელს საკრებულოს სხდომაზეც გაუხსენა:

,,მერიის შიდა აუდიტის სამსახურის საქმიანობა სათანადოდ ვერ უზრუნველყოფს მუნიციპალიტეტის წინაშე არსებული ამოცანების ეფექტურად შესრულებასა და დასახული მიზნების მიღწევას, რისკების მართვასა და შიდა კონტროლის სისტემის გაუმჯობესებას. აღნიშნულიდან გამომდინარე, 2017-2018 წლებში მუნიციპალიტეტის შიდა აუდიტის სამსახური ფუნქცია-მოვალეობებს ასრულებდა არასათანადოდ”, – სახელმწიფო აუდიტის დასკვნიდან ბალიაშვილს ამონარიდი წაუკითხა საკრებულოს წევრმა, ნონა ნინიაშვილმა.

ამის პასუხად კი, ოპოზიციამ ბალიაშვილისგან მოისმინა, რომ მერიის შიდა აუდიტის სამსახური მხოლოდ რამდენიმე წლის შექმნილია და ამიტომ ყველა სახის დარღვევა თურმე ეპატიება.

,,მერე რა, შეიძლება ასეც არის, მაგრამ 2017 წელს მოგვცეს ერთი წიგნი, 2 წელი ვიმუშავეთ ენთუზიაზმით. 100%-ით ვერ დავიკვეხნი, რომ ყველაფერს ვასრულებდი და ყველა ვალდებულებას ვაკმაყოფილებდი. ერთი კაცი ვმუშაობ და ყველა ობიექტზე შესვლა წარმოუდგენელია“, – განაცხადა ბალიაშვილმა.

მის წუწუნს ,,ვერხუშკიდან“ არავინ წამოგებია, რადგან, ჩემი ვარაუდით, ისინი მიიჩნევენ, რომ მათ წინააღმდეგ ჩადებული ამ ნაღმმტყორცნის ,,დაკონსერვებაში“ ფულის ყრაც  საკმარისია და ზედმეტი თანამშრომლები აღნიშნული სამსახურისთვის საჭირო არ არის.

ბალიაშვილმა საკრებულოს განუცხადა, რომ 2021 წელს 6 ობიექტზე მოასწრო აუდიტის ჩატარება. მისი თქმით, ყველა მათგანში არასწორად იყო ჩატარებული ძირითადი საშუალებებისა და სხვა მატერიალურ ფასეულობათა  ინვენტარიზაცია. წინა წლებთან შედარებით, მდგომარეობა თითქმის გამოსწორდა, თუმცა ჯერ კიდევ არის დარღვევები, როგორც საწვავის შეძენის, ასევე მისი   ხარჯვის საქმეშიო.

,,ა(ა)იპ „კომუნალური -1“-ის სამსახურის 5 თანამშრომელზე ჩამოწერილია  ბენზინი  არასრულყოფილი დოკუმენტებით 6 166 ლიტრი.  აღნიშნული გახარჯული ბენზინიდან მიღებული ეკონომიკური ეფექტი სინამდვილეში არ არსებობს.  ორგანიზაციას არ აქვს შემუშავებული კონტროლის მექანიზმები, რომლის მეშვეობითაც  შეძლებდა დადგენას, თუ რამდენად ეფექტიანად იხარჯება გაცემული საწვავი. კერძოდ, არ არის შესწავლილი და გაანალიზებული მიმღები პირები საწვავს მოიხმარდნენ სამსახურებრივი დანიშნულებით თუ პირადი მოხმარების მიზნებისათვის.

კვლავ ცუდი მდგომარეობაა დასახლებული ტერიტორიების დასუფთავების მოსაკრებლის ადმინისტრირების საქმეში. ყოველწლიურად უარესდება იურიდიული და ფიზიკური პირებიდან გადასახადების გადახდის მდგომარეობა გეგმასთან შესაბამისობაში. კერძოდ, თუ 2019 წელში მოსაკრებლის გეგმა შესრულდა -67%-ით, 2020 წელს ანალოგიური მაჩვენებელი შეადგენს-47%-ს. ჩვენი აზრით, გეგმის შეუსრულებლობის ძირითადი მიზეზია გადამხდელთა ბაზის არარსებობა. სრულად არ არის აღრიცხული გადამხდელთა რაოდენობა და თანხების გადახდა ხდება სტიქიურად (ვინც გადაიხდის).

ორგანიზაციის მიერ სრულად არ არის შესწავლილი იურიდიული პირებიდან და სხვა კომერციული საწარმოებიდან,  თუ რა რაოდენობის ნარჩენის გატანა ხდება. აღნიშნულის გამო ვერ ხერხდება სრულად იურიდიულ  პირებთან და სხვა კომერციულ ობიექტებთან ხელშეკრულების გაფორმება და შემდგომ თანხების ამოღება. დასუფთავების მოსაკრებლის ხარვეზებზე შიდა აუდიტის სამსახურის მიერ დაფიქსირებულია ა(ა)იპ კომუნალური-1-ის წინა წლების საქმიანობის ფინანსურ და შესაბამისობის აუდიტის ანგარიშებში. მიუხედავად აღნიშნულისა, არსებული პრობლემა კვლავ მოუგვარებელია და აღნიშნულთან დაკავშირებით ჩვენ  მიერ გაცემული რეკომენდაცია შეუსრულებელია.

ჩვენ მიერ მოხდა ასევე საფინანსო-საბიუჯეტო სამსახურში მერიის მიერ 2020 წელში წარმომადგენლობითი ხარჯების ხარჯვის შესაბამისობა კანონმდებლობასთან. მოქმედი  კანონმდებლობის მიხედვით, კონკრეტულად არ არის განსაზღვრული  წარმომადგენლობითი ხარჯების გაწევის პროცედურა და მასთან დაკავშირებული შესადგენი დოკუმენტაცია. კერძოდ, სტუმრების მიღების ფორმა, მათი კატეგორია, გამასპინძლების ეტიკეტი და სხვა. თუმცა გონივრული პრინციპებიდან გამომდინარე, წარმომადგენლობითი ხარჯების გაწევა და მისი მიზანშეწონილობა უნდა იყოს დოკუმენტალურად სათანადოდ დასაბუთებული.

არის შემთხვევები, როდესაც მერიის პასუხისმგებელი პირების მიერ მოხსენებითი ბარათები საერთოდ არ არის წარმოდგენილი და თუ არის, ხშირ შემთხვევაში თუ რა სტატუსის მქონე სტუმრებზე  მოხდა გამასპინძლება, არ ფიქსირდება. შესაბამისად, არც მუნიციპალიტეტის მიერ არ  არის შემუშავებული შიდა ინსტრუქცია/წესი, რომლის მიხედვითაც მოხდება წარმომადგენლობითი ხარჯების მუხლიდან თანხების ხარჯვა“, _ ნათქვამია სიღნაღის შიდა აუდიტის დასკვნაში.

აღმოჩნდა, რომ 2021 წელს  სიღნაღის მერიამ წარმომადგენლობითი ხარჯებისთვის 19 000 ლარი გამოიყენა, თუმცა მუნიციპალიტეტში, სადაც ბიუჯეტის ფულის ამ მიმართულებით ხარჯვის წესი არ არსებობს, არავინ კითხულობს და დაობს – რაში დაიხარჯა? რატომ დაიხარჯა? ვის ან რატომ  მოახმარეს ეს ფული?

სიღნაღის მუნიციპალიტეტის მერს, რომელიც საკრებულოს სხდომას ესწრებოდა, არაფერი უთქვამს, ამჯერად რას აპირებენ, კვლავ სპონტანურად უნდა ხარჯონ სტუმრების მიღება-გამასპინძლებაში თანხები, თუ ბოლოს და ბოლოს ვინმე გამოიჩენს ინიციატივას, მადლს მოისხამს და დაწერს აღნიშნულ წესს.

გიორგი ელიზბარაშვილი, ფრაქცია ენმ-ის თავმჯდომარე სიღნაღის მუნიციპალიტეტის საკრებულოში:

_ წლების განმავლობაში არ არსებობს იმის მექანიზმი, ვინმემ გააკონტროლოს, საკრებულოს თავმჯდომარე საკუთარ ნათესავს გაუმასპინძლდება, მეგობარს თუ მუნიციპალიტეტისთვის საინტერესო სტუმარს. ვთქვათ, წერენ, რომ დელეგაციას გაუმასპინძლდნენ, მაგრამ არსად აფიქსირებენ, ვინ ესტუმრნენ, საიდან, რამდენი ადამიანი იყო ან რა მიზნით ჩამოვიდნენ, კონკრეტულად რომელ რესტორანში იყო სუფრა გაშლილი და ა.შ. არადა მენიუც კი წინასწარ უნდა იყოს გაწერილი და ცნობილი.

    _ ამ წესის  შემუშავება პრობლემებთან არის დაკავშირებული?

_ ცხადია, არა. ეს წესი მერიამ უნდა წარუდგინოს საკრებულოს, განიხილონ და დადებითად შეფასების შემთხვევაში დაამტკიცოს, მაგრამ უწესობა აწყობს მმართველ გუნდს და ამიტომ ცდილობს, მისი არქონის პერიოდი გაახანგრძლივოს – ბიუჯეტის თანხები თავისუფლად, გაუკონტროლებლად, სურვილისამებრ ხარჯოს.

საქართველოს სახელმწიფო ბიუჯეტით გათვალისწინებული საქართველოს რეგიონებში განსახორციელებელი პროექტების ფონდიდან სოფლის მხარდაჭერის პროგრამის ფარგლებში დასაფინანსებელი სიღნაღის მუნიციპალიტეტის სოფლებში განსახორციელებელი პროექტების დამტკიცების შესახებ მოხსენება გიორგი ბაღანაშვილმა წარმოადგინა.

ნათელა ნადიკაშვილმა თუ საკრებულოს ანგარიშის ბოლომდე წაკითხვა არ აღირსა, ბატონი გიორგი სხდომაზე ანგარიშის ჩარაკრაკების სურვილით წარსდგა. მიუხედავად ამისა, ოპოზიციას კმაყოფილება მაინც არ გამოუხატავს და მომხსენებელს ჩარაკრაკებულის ხარისხიც მოსთხოვა: ნუკრიანში გააკეთეთ ახალგაზრდული სახლი, მაგრამ მეორე წელს შენობას ჭერი აეხადა. ასეა სხვა ობიექტებზეცო. ხალისიანად წაკითხულ ანგარიშს მსუბუქი კრიტიკა საკუთარი გუნდიდანაც მიაყოლეს – გარე განათებებს რომ აკეთებთ, ხარისხიანი ნათურები  დაუყენეთ, რომ სულ გადამწვარი არ იყოსო.

სიღნაღის ახალი მოწვევის საკრებულოს სხდომა, რომელმაც ხანგრძლივობითა და ნერვების ომით ყველა წინამორბედს გაუსწრო, ჟრიამულით დასრულდა. დრო ვიხელთე და სიგარეტის მოსაწევად ფოიეში გასულ საკრებულოს თავმჯდომარეს გავყევი. მაინტერესებდა, საკრებულოს წევრებთან, ლია ბეჟაშვილთან და მადონა ბატიაშვილთან ერთად, რატომ მიშლიდა ხელს, საჯაროდ დამესვა კითხვები აიპ სიღნაღის სახელოვნებო და საგანმანათლებო მომსახურეობის ცენტრის დირექტორ ნათელა ნადიკაშვილისთვის ამ სფეროში არსებულ პრობლემებსა თუ დარღვევებზე.

დავით  ჯანიკაშვილი:

_ როგორ გეკადრებათ, თავიდანვე  გითხრით, რაც გინდათ, ის ბრძანეთ-მეთქი.

_ მოდით, სხდომის ჩანაწერი ვნახოთ ერთად… წესით, სხდომას  უნდა იწერდეთ. ასე არ არის?

_ შენ ხომ აკეთებდი ჩანაწერს? (მოულოდნელად საკრებულოს თავმჯდომარე ურთიერთობის შენობით ფორმაზე გადავიდა – ნ.ვ.).

_ ჩემი ჩანაწერით უნდა იხელმძღვანელოთ? ბატონო დავით, საკრებულოს ოფიციალური სხდომის ჩანაწერი მართლა არ კეთდება?

_ როგორ გეკადრება, მოწვეული იყავი, არ გამოხვედი სიტყვით? მე გითხარით, ერთ საკითხზე კითხვა დავსვათ ერთხელ. ნებისმიერ საკითხზე დასვით კითხვები, პრობლემა არ გექნებათ. აი, ეხლა ბევრი საკითხები იყო და გადატვირთულები ვიყავით (სტილი დაცულია – ნ.ვ.)...

_ მდაააა…

დავით ჯანიკაშვილთან ამ მოკლე პაექრობიდან გამოჩნდა, რომ სიღნაღის საკრებულო ოფიციალური უწყების ოფიციალური სხდომის ჩანაწერსაც არ აკეთებს.  ამიტომაც საკრებულოს სხდომაზე ვინც რა უნდა თქვას, წისქვილი მაინც ხელისუფლების სასარგებლოდ ტრიალებს და სხდომაზე გამოთქმულ ყველა შეფასებას, კრიტიკას, პასქვილსა თუ წინადადებას ქარი ისე  შორს მიაფრიალებს, ნაკვალევიც კი არსად რჩება.

წყარო: euronews.ge

დატოვეთ კომენტარი

კომენტარები

მსგავსი სიახლეები

Back to top button
Close