საზოგადოება

S. O. S. ფრთხილად მშობლებო! თბილისში საშიში სექტა მოქმედებს!

ჩვენთან ხომ მუდმივად ასეა, ამოვწევთ რაღაც თემას, გამოიწვევს საკმაოდ დიდ რეზონანს და მერე უცებვე მიჩუმდება, სხვა თემით გადაიფარება, არადა არის თემები, რომლებზეც გაჩუმებაც საკმაოდ მძიმე შედეგებამდე მიგვიყვანს. ყველას გახსოვთ ალბათ, რამდენიმე თვის წინ რამხელა აჟიოტაჟი ატყდა საქართველოში მოქმედ სექტებზე, გაკეთდა უამრავი გადაცემა, დაიწერა სტატიები და მერე…. მერე კი სხვა თემამ გადაფარა.
დღეს ინტერნეტში ერთ-ერთი ფეისბუქმომხმარებლის სტატუსი წავიკითხე, რომელმაც ჩემს თავზეც და საზოგადოებაზეც საკმაოდ გამაბრაზა. რატომ? იმიტომ, რომ, რომ მივყოლოდით ამ თემას ჟურნალისტებიც, სამართალდამცველებიც და საზოგადოების დიდი ნაწილიც, დღეს ასეთი დილემის წინაშე არ აღმოვჩნდებოდით. აი, რას წერს ანი მალანია სოციალურ ქსელში (ანის ფეისბუქით დავუკავშირდით, თუმცა მასთან დალაპარაკება ამ ეტაპზე ვერ შევძელით და რადგან სტატუსი საჯაროა, ამიტომაც მასალაში გამოვიყენეთ)
–„ჩემმა მეგობარმა დაკარგა ბიძაშვილი…ნახეს მოწამლული ფსიქოტროპული წამლებით, თავს იკლავდა…მიაკვლიეს სექტას, სადაც გაწევრიანებული არიან 15-16 წლის ბავშვები!!! თვითმხილველია ჩემი მეგობარი, რომელმაც თავისი თვალით ნახა და მოისმინა რიტუალები(როგორ ისერავდნენ ხელებს, სვამდნენ ერთმანეთის სისხლს და კლავდნენ კატებს) თან ძალიან ბევრი ბავშვი იყო!!! ყველა უნდა დავდგეთ ერთად და რამე ვიღონოთ! როდემდე უნდა მოხდეს ბავშვების სუიციდი! სად არიან ჟურნალისტები? მთავრობის წევრები? პოლიცია? მალე ალბათ არც ერთი ბავშვი არ დარჩება ცოცხალი ცოტა გონს თუ არ მოხვალთ!“-წერს მალანია.
ამ სტატუსის წაკითხვის მერე, ანის იმ მეგობარს შევეხმიანეთ, რომელმაც კომენტარების მიხედვით, თავისი თვალით ნახა ეს ყველაფერი. მალინა ბერეკაშვილი კონტაქტზე გამოვიდა, თუმცა მასთან საუბარი ვერ შედგა. მალინა სოციალური ქსელით ტელევიზიებთან შეხვედრას მოითხოვს. -„სასწრაფოდ ვითხოვ ტელევიზიებთან შეხვედრას! მე რაც ვნახე ქალაქში, ამის კონტროლი სად არის??? ან აფთიაქებს ვინ აკონტროლებს? ეს წამლები ამ ბავშვების ხელში როგორ ხვდება? აფთიაქები რეცეპტის გარეშე ასეთ ფსიქოტროპულ წამლებს როგორ ყიდიან?“-წერს ბერეკაშვილი.
შემაშფოთებელია, მაგრამ არა უცნობი. ასეთი სექტების არსებობის შესახებ ყველამ ვიცით, მაგრამ რა? სამწუხაროა ისიც, რომ ამ თემაზე საუბრისას მოსაუბრეთა უმეტესობას საკუთარი ვინაობის დასახელება არ სურთ და ინკოგნიტოდ დარჩენას ამჯობინებენ. ერთ-ერთი ასეთი მოსაუბრეა „ემოს“ მამა, რომელმაც გვითხრა, რომ მუხიანის მეტროს მიმდებარე ტერიტორიაზე შებინდებისას იკრიბებიან 14-15 წლის ბავშვები.
–„მაშინვე შეამჩნევ, რომ ისინი ჩვეულებრივი ბავშვები არ არიან. აცვიათ განსხვავებულად, გოგონებს შავი ლაქი და შავი პომადა უსვიათ. საკმაოდ აგრესიულები არიან. საღამოობით, ოღონდ ყოველ საღამოს არა, ისმის კატების შემაძრწუნებელი კივილი. ჩემი შვილი ერთი პერიოდი იყო მათთან, როცა კატეგორიულად ავუკრძალეთ მათთან ურთიერთობა, გამოგვიცხადა, თავს მოვიკლავ, რადგან ისინი მაინც მომკლავენო, მერე არ ვიცი რა მოხდა. რამდენიმე დღე სახლიდან არ გასულა, ტელეფონიც გამორთო და ბოლოს გვთხოვა სოფელში ბებიასთან გაგვეშვა. ახლაც იქ არის და სოფლის სკოლაში სწავლობს. ჩემმა გოგომ თავი დააღწია ამ სექტას, მაგრამ სხვები? ასეთ დროს რა მნიშვნელობა აქვს ვინ ვისი შვილია. გეუბნებით ადგილსაც და იქნებ პატრულმა უფრო მეტი ყურადღება გამოიჩინოს“.
.

.
სულ რაღაც თვენახევრის წინ თბილისში არასრულწლოვანი ფანჯრიდან გადახტა და თავი მოიკლა. ოჯახის ახლობლების თქმით, დედას ეჭვი აქვს, რომ გოგონა რომელიღაც ასეთი სექტის წევრი იყო, ამ ეჭვს ისიც აძლიერებს, რომ გარდაცვლილის მობილურში დედას საეჭვო მიმოწერა აღმოუჩენია. ამჟამად ამ საქმეზე გამოძიებაც მიმდინარეობს და გოგონას დედამ ყველა მასალა პოლიციას გადასცაო.
საზოგადოების დიდი ნაწილი იმასაც ამბობს, რომ ასეთ სექტებში ახალგაზრდების რაოდენობა დღითიდღე იზრდება.
სოციალურ ქსელში თეო ლალიაშვილი წერს: –„ამ ბავშვების არსებობა ვიცით, მაგრამ დაშლა არ ხერხდება, საზოგადოების გულგრილობაც პიკზეა, არადა სექტებს სულ უფრო მეტი თანამოაზრე ემატება!“
კიდევ ერთმა ქალბატონმა გვითხრა-პეტრე-პავლობის სასაფლაოზე იკრიბებიანო ახალგაზრდები, საღამო ხანებში იქ ვერც გაივლიო და დასძინა-არის პერიოდები, უბანში კატას ვეღარ ნახავ, ამ ბოლო ხანებში კი ლეკვებიც უჩინარდებიანო. ალბათ დაუსრულებლად შეიძლება ილაპარაკო ამ პრობლემაზე, მაგრამ მთავარი მოქმედებაა, ახლა დრო ნამდვილად ამ მუშაობს ჩვენს სასარგებლოდ.
ჩვენ შევეცადეთ პროფესიონალებისგან გაგვეგო სექტების არსებობის შესახებ ინფორმაცია და საზოგადოების ყურამდე მიგვეტანა ის გზავნილები, რომლებიც ჩვენმა რესპოდენტებმა საუბარში განაცხადეს.
– „მთელ მსოფლიოშიც და საქართველოშიც სექტა ნიშნავს იყოს შენიღბული და დაფარული. არ შეიძლება სექტების მიმარ ყურადღება არ გამოვაჩინოთ და ყველაფერი უნდა ვიღონოთ, რომ კიდევ უფრო მწვავე ხასიათი არ მიიღოს. სექტების საკითხზე უკვე 15 წელია ვლაპარაკობ, დიდი ხანია მე და ჩემი კოლეგები ვსაუბრობთ პრობლემის გადაჭრის გზებზე, მაგრამ ჩვენი ლაპარაკი რჩება „ხმად მღაღადებლისა უდაბნოსა შინა, ვწერთ კიდეც, მაგრამ ამ დაწერილის წაკითხვაც ეზარებათ. საზოგადოების პრობლემაცაა ის, რომ მხოლოდ თავისი შვილებით შემოიფარგლებიან და არ ინტერესდებიან როგორ გარემოში უწევთ ყოფნა. საკითხის აქტუალურობიდან გამომდინარე, მე იძულებული ვარ გითხრათ, რომ ყველაზე აქტიური სექტებია თბილისში, დუშეთში და ზუგდიდში, უფრო მეტიც, ამ სამი ჩამონათვალიდან ყველაზე საშიში სექტა მოქმედებს ზუგდიდში, ეს რელიგიური სექტაა და არიან თეოსოფიის მიმდევრები. აი, ასეთი სექტები უფრო საშიშია, ვიდრე იგივე „ემოები“, „გოთები“ და სხვა. სხვათაშორის, არაერთხელ მითქვამს, რომ თბილისში, ახმეტელის მეტროს მიმდებარე ტერიტორიაზე ხშირად დაფიქსირებულა „ემოების“ შეკრება და საჭიროა მეტი ყურადღების გამოჩენა, თუმცა კიდევ გავიმეორებ, რომ ესენი ისეთი საშიშები არ არიან, როგორც ზუგდიდში მოქმედი სექტა. საქმე გვაქვს განათლების პრობლემასთან, ინფორმაციულ ვაკუუმთან და გულგრილობასთან. საჭიროა ხმის ამაღლება და „სხვისი ჭირი ღობეს ჩხირის“ პრინციპის უკუგდება. საშიშ მდგომარეობაში ვართ და ახლავე უნდა იქნება ყურადღება გამახვილებული, საჭიროა ხმაური და განგაშის ზარი!“- აცხადებს პროფესორი ქეთევან პავლიაშვილი.
ქალბატონმა ნონი ლეჟავამ კი სექტებთან დაკავშირებული 90-იანი წლების ისტორია გაიხსენა და გვიამბო: – „კახეთში 90 წლების დასაწყისში, დამოუკიდებლები რომ გავხდით და ხალხმა ეკლესიისკენ გაიხედა და რაღაც მომენტში მოდასავითაც იყო, ყველა უცებ გახდა მორწმუნე, ამ დროს გამოჩნდა ცოლ-ქმარი. ხალხს ჩამოუარეს და შესთავაზეს- ბიბლიას გასწავლითო უფასოდო. ამბობდნენ მორწმუნეები ვართო და არავის უკითხავს მართლმადიდებლები იყვნენ თუ არა… ან ტაძარში რატომ არ დადიოდნენ, მით უმეტეს 2 ისტორიული ტაძარი იყალთო და აწყურის თეთრი გიორგი იმ სოფელში იყო, ალავერდი სულ 2 სოფლის იქით. მოკლედ დადიოდნენ მანამ, სანამ თეთრი გიორგის ტაძრის მოძღვარი არ დაინტერესდა, საკმაოდ დიდი ხანი გრძელდებოდა და აღმოჩნდა, რომ სექტანტები იყვნენ და ფაქტიურად, ასე მოტყუებით, საკმაოდ ბევრი ხალხი გახდა სექტის წევრი. დღემდე არიან ჩვენსკენ, ანუ იყალთო, აწყური-ხოდაშენის და ოჟიოს მოსახლეობაში. როგორც ვიცი აწყური იმდენად არა, რადგან თეთრი გიორგის ტაძარზე ამბობენ სასწაულმოქმედიაო და აწყურის მოსახლეობისთვის ყოველთვის განსაკუთრებული სალოცავი იყო. მამაომაც ითამაშა დიდი როლი, მაგრამ ფაქტია რომ ბევრი მოტყუებით და ტკბილი სიტყვით მოხვდა მათი გავლენის ქვეშ და დღესაც ვერ დაუღწევიათ თავი“.
პროფესორი სოფიო ანდღულაძე ამბობს, რომ საჭიროა რელიგიური თვალსაზრისით გააქტიურება და ელემენტარულ უცოდინარობას ხშირად საზოგადოების ნაწილი დაღუპვამდე მიჰყავს.
– „როდესაც ადამიანი თავის პრობლემებშია ჩაფლული, ის ეძებს გამოსავალს, ეძებს მშველელს და ადვილად ხვდება ისეთი ადამიანების გავლენის ქვეშ, როგორებიც ამ საშიში სექტების წარმომადგენლები არიან. რელიგიური სექტები ძალიან საშიშია და საჭიროა ბავშვობიდან ჩამოუყალიბდეს ადამიანს მსოფლმხედველობა. სკოლებში აუცილებლად უნდა ისწავლებოდეს რელიგიის ისტორია, ოღონდ სწორად და პროფესიონალურად. სანამ არ ექნება საზოგადოებას, განსაკუთრებით ახალგაზრდობას ჯანსაღი რელიგიური განათლება, ყოველთვის იქნება სექტების საშიშროება“- ამბობს სოფიო ანდღულაძე.
იმედია ქეთევან პავლიაშვილის ნათქვამს ახლა მაინც ყურად იღებენ შესაბამისი ორგანოები და საზოგადოების წარმომადგენლები და დაინტერესდებიან ზუგდიდში არსებული სექტით.
– „საერთოდ ვინმეს აინტესრესებს ეს სატანური სექტა სად არის ან როგორ ღუპავენ ადამიანებს ეშმაკისეული სიცრუით….. ტვინი რომ წაიღო ყველამ სულელური თემებით ტელევიზიასა თუ ფეისბუქში….. ხმას რატომ არ იღებს ან ერი ან ბერი იმაზე რაც ჩვენს თვალწინ ხდება….. იმიტომ რომ რაც ერია ის ბერია…. თან ასეთი სექტა არაერთია რომ იცოდეთ და ამაზე უარესებიცაა“ -წერს ვიდეოს გამვრცელებელი ილია ივერიელი. „ფოსტალიონი“ ამ თემას კიდევ არაერთხელ დაუბრუნდება, მანამდე კი მოგმართავთ ყველას-არ გეგონოთ, რომ ეს მხოლოდ კონკრეტული ადამიანების პრობლემაა და უბედურება თქვენს კარზე არ დააბრახუნებს! ვიყოთ ფხიზლად და ნუ ვიქნებით გულგრილები! ბავშვები-ჩვენი მომავალია და მათ გაფრთხლება უნდათ!

წყარო: postalioni.com

დატოვეთ კომენტარი

კომენტარები

მსგავსი სიახლეები

Leave a Reply

Your email address will not be published.

Back to top button
Close