საზოგადოება

თამაზ ელიზბარაშვილი 10 000 ლარით დააჯარიმეს

„სვანიძის ქუჩის დაზარალებულთა კომიტეტი“ განცხადებას აქვეყნებს, რომლის მიხედვითაც, ბიზნესმენი, სვანიძის ქუჩაზე მცხოვრები თამაზ ელიზბარაშვილი თბილისის მერიამ 10 000 ლარით დააჯარიმა. ელიზბარაშვილი ჯარიმის გადახდას არ აპირებს და მერიის წინააღმდეგ სარჩელის შეტანას სასამართლოში გეგმავს.

თბილისის მუნიციპალიტეტის მერიის ზედამხედველობის საქალაქო სამსახურის უფროსის მოადგილემ, მიხეილ მაღლაკელიძემ გადაწყვეტილება მიიღო – „სვანიძის ქუჩის დაზარალებულთა კომიტეტის“ თავმჯდომარე თამაზ ელიზბარაშვილი 10 000 ლარით დააჯარიმა. საქმე ეხება სვანიძის ქუჩის ბოლოს, მდინარე ვერეს ნაპირზე დამონტაჟებულ მოაჯირს, რომელიც, მერიის მტკიცებით, თამაზ ელიზბარაშვილმა აუცილებელი სანებართვო დოკუმენტაციის გარეშე გააკეთა.
`ამ ადგილას კაპიტალური მოაჯირი მრავალი წლის განმავლობაში არსებობდა და ადამიანებს დაახლოებით 3 მეტრის სიმაღლიდან მდინარე ვერეში ჩავარდნისგან იცავდა. მოგესხენებათ, გასული წლის 13-14 ივნისის სტიქიის დროს მოაჯირი და თითქმის მთელი სვანიძის ქუჩა განადგურდა. თამაზ ელიზბარაშვილი, რომლის საცხოვრებელი სახლი სვანიძის ქუჩაზე მდებარეობს, თბილისის მერიას კარგა ხანს ოფიციალურად და საჯაროდ სთხოვდა 13-14 ივნისის სტიქიისგან ყველაზე მეტად დაზიანებულ სვანიძის ქუჩაზე, მდინარე ვერეს ნაპირზე მოაჯირი გაეკეთებინა და ამით ადამიანთა სიცოცხლე დაეცვა. თბილისის მერიამ თამაზ ელიზბარაშვილის და დედაქალაქის მცხოვრებთა თხოვნა არაფრად ჩააგდო. არადა, თითოეული გამვლელი დგებოდა სასიცოცხლო საფრთხის ქვეშ. ასეთი ფაქტი დაფიქსირდა კიდეც – ერთი ადამიანი მდინარეში ჩავარდა და სიკვდილს ძლივს გადაურჩა – სხვა ადამიანების დახმარების გარეშე გარდაუვალი იქნებოდა ფატალური შედეგი. სწორედ ამ შემთხვევის შემდეგ, თამაზ ელიზაბრაშვილმა საკუთარი ხარჯებით სასწრაფოდ აღადგინა მოაჯირი და მოაწყო ბეტონის ბილიკი, რამაც ადგილობრივ მოსახლეობას უსაფრთხო გადაადგილების საშუალება მისცა. ღობის აღდგენა არ განხორციელებულა თვითნებურად, ან პირადი ინტერესის გამო. აღნიშნული პრობლემების მოგვარება შედის სახელმწიფოს ვალდებულებაში და თამაზ ელიზაბარაშვილის არაერთი მცდელობის მიუხედავად არანაირი რეაგირება არ მოჰყოლია.
თბილისის მერიას ავიწყდება, რომ სიცოცხლე და ჯანმრთელობა საქართველოს კონსტიტუციით გათვალისწინებული ადამიანის ძირითადი უფლებებია! თამაზ ელიზბარაშვილის მოქმედებები მიმართული იყო ადამიანების უსაფრთხოების დასაცავად, რაც გამორიცხავს მისთვის, როგორც სამართალდამრღვევის მიმართ პასუხისმგებლობის დაკისრებას.
თბილისის მერიის ზედამხედველობის სამსახური ელიზბარაშვილს, ჯარიმის გადახდასთან ერთად, ჯებირის ნებაყოფლობით დემონტაჟსაც ავალდებულებს. არადა, აღნიშნული მოთხოვნა ეწინააღმდეგება საქართველოს კონსტიტუციითა და საერთაშორისო კონვენციებით დაცულ ადამიანის ძირითად უფლებებსა და თავისუფლებებს, ვინაიდან დემონტაჟის განხორციელება პირდაპირპროპორციულად უქმნის საფრთხეს ადამინების სიცოცხლეს და ჯანმრთელობას.
აღსანიშნავია, რომ მერიამ რამდენიმე თვის წინ მოაჯირი მხოლოდ იქვე მდებარე ხიდზე დაამონტაჟა, რომელშიც, არაოფიციალური ინფორმაციით, 220 000 ლარი გადაიხადა. „სვანიძის ქუჩის დაზარალებულთა კომიტეტმა“ გამოითხოვა ინფორმაცია თუ რა დაუჯდა თბილისის მერიას აღნიშნული მოაჯირის გაკეთება, მაგრამ დედაქალაქის მმართველ ორგანოდან საოცარი პასუხი მიიღო – არ ვიცით ვინ გააკეთა ხიდზე მოაჯირიო. საინტერესოა, თბილისის მერიამ ვის მისცა უფლება ეს მოაჯირი გაეკეთებინა და თუ არ მისცა, რატომ არ ითხოვენ მის დემონტაჯსაც?! იმავე დადგენილებაში კი, რომლითაც მერიამ თამაზ ელიზბარაშვილის დაჯარმების შესახებ გვაცნობა, ვკითხულობთ: „აღდგენილ იქნა მოაჯირი, რომელიც ტექნიკურად გადაბმულ იქნა მერიის მიერ მიმდებარე ხიდზე მოწყობილ მოაჯირზე“.
ვინაიდან მერია უარს ამბობს საჯარო დოკუმენტაცია მოგვაწოდოს, თუ რა დაჯდა ხიდის მოაჯირის მშენებლობა, ჩნდება ეჭვი, რომ ამ თანხაში ვერეს ნაპირების მოაჯირეებიც უნდა გაკეთებულიყო. თამაზ ელიზბარაშვილმა მოაჯირი მდინარის მხოლოდ ერთ ნაპირზე აღადგინა. მეორე მხარს კი ისევ არსებობს საფრთხე, რომ იქ ვინმე ჩავარდეს და ფატალური შედეგი მივიღოთ. ახლა კი, იმის მაგივრად, რომ ადამიანების სიცოცხლე დაიცვან და მეორე მხარეს თვითონვე გააკეთონ დროებითი მოაჯირი მაინც, თამაზ ელიზბარაშვილს სთხოვენ, ადამიანების სიცოცხლე მანაც არაფრად ჩაადგოს!
„ფაქტობრივად გვეუბნებიან, არ გვაინტერესებს, დაიხოცეთ და თან 10 ათას ლარიანი ჯარიმა გადაიხადეო. მერიას ისევ მოვუწოდებ, იმის მაგივრად, რომ ჩემი გაკეთებული დაანგრიონ, მოვიდნენ და მეორე მხარეს გააკეთონ მოაჯირი, რადგან როდის დატრიალდება უბედურება, არავინ იცის! ამაზე პასუხისმგებლობას მთლიანად მერიას ვაკისრებ! მათი გასაკეთებელი საქმე მე გავაკეთე და ამ დროს მოდის და მადლობის თქმის მაგივრად, მაჯარიმებს! ვინაიდან კანონმორჩილი ადამიანი გახლავართ და მერიის ზედამხედველობის სამსახურის მიერ გამოტანილი დადგენილების გასაჩივრება ისევ თბილისის მერიაში შემიძლია, ასეც მოვიქცევი. იმედს ვიტოვებ, რომ თბილისის მერი დავით ნარმანია ამ უსამართლობას ხელს არ მოაწერს. დედაქალაქის მერს ვუტოვებ ბოლო შანსს, რომ გონს მოეგოს და მოიქცეს, როგორც ნამდვილი მერი – იფიქროს თავისი მოქალაქეების უსაფრთხოებასა და სიცოცხლეზე, ამ უსამართლობას მხარი არ დაუჭიროს და აღნიშნული ჯარიმა გააუქმოს. წინააღმდეგ შემთხვევაში, თბილისის მერიას სასამართლოში დავუპირისპირდები, სადაც 100%-იანი მოგების შანსი მაქვს“ – ამბობს თამაზ ელიაბარაშვილი.

 

დატოვეთ კომენტარი

კომენტარები

მსგავსი სიახლეები

Leave a Reply

Your email address will not be published.

Back to top button
Close