კანში პრესტიჟული ჯილდოს მფლობელი ანზორ მელიას კლინიკა გახდა
„სოკრატეს კომიტეტი“ ევროპაში ერთ-ერთ ყველაზე ცნობილ ორგანიზაციად ითვლება. ის ფაქტი, რომ ხსენებულმა კომიტეტმა ქართული კლინიკა პრესტიჟული პრიზით დააჯილდოვა, საქართველოში უპრეცენდენტო მოვლენად შეიძლება ჩაითვალოს.
აი, რას უყვება timepress-ს დაჯილდოვებული კლინიკის, „გული“-ს დირექტორი ანზორ მელია:
_ „სოკრატეს კომიტეტი“ შეისწავლის არა მხოლოდ სამედიცინო, არამედ ყველა სფეროს ბიზნეს-სექტორის მიღწევებს. დეტალურად სწავლობენ ყველა დეტალს -ვინ დააფუძნა ობიექტი, როგორ ვითარდება, რა წარმატებებს მიაღწიეს და ა.შ.ამ დროს, თავად კლინიკებმა ამის შესახებ არაფერი იციან. ცხადია, არც მე ვიცოდი. გაოცება ვერ დავფარე, როდესაც შევიტყვე რომ „სოკრატეს კომიტეტმა“ ჩემს შესახებ ყველაფერი იცოდა – 20 წლის წინ როგორ დავიწყეთ მუშაობადა გავხდით წარმატებული კლინიკა.
_ დაჯილდოვების ცერემონიალმა როგორ ჩაიარა?
_ დაჯილდოვება გაიმართა კანში მდებარე ერთ-ერთ ელიტარულ სასტუმროში „კარლტონში“. თავდაპირველად, დამსწრე საზოგადოებას 10 წუთიანი ვიდეოფილმი ვუჩვენეთ ინგლისურენოვანი ტიტრებით. გასაოცარი ოვაციებით შეხვდნენ ჩვენი კლინიკის მუშაობის ამსახველ კადრებს. ისმოდა ხმები: „პერფექტო, პერფექტო“, რაც საუკეთესოს ნიშნავს. როცა ყველაფერი დასრულდა, მივედი სოკრატეს კომიტეტის ხელმძღვანელებთან და ვკითხე, როგორ ამოარჩიეთ ჩვენი კლინიკა-მეთქი? სწორედ მაშინ ამიხსნეს, რომ ამ საკითხებზე მუშაობენ მათი ჯგუფები. ჩემს მიერ წარმოდგენილ ფილმში განსაკუთრებით მოეწონათ ის მომენტი, როდესაც დედის გარდაცვალების შემდეგ, მის სახელზე, ჩემს მშობლიურ ქალაქში, ზუგდიდში კლინიკა დავაარსე, რომელიც დედის ხსოვნას მივუძღვენი. ამით დედაჩემს ძეგლი დავუდგი. ფილმის დასრულების შემდგომ ტაში არ წყდებოდა. დაჯილდოვებაზე, თან მახლდა კლინიკა „გული“-ს ინტენსიური თერაპიის განყოფილების გამგე ჯაბა წივილაშვილი. ერთი უკრაინელი მოვიდა და ჩამეხუტა, ისე იმოქმედა მასზე გარდაცვლილი დედისათვის კლინიკის მიძღვნამ.
_ რითი დააჯილდოვეს კლინიკა „გული“?
_ დაჯილდოვების ცერემონიალი საღამოს 7 საათზე დაიწყო და საათზე მეტ ხანს გაგრძელდა. გადმომცეს სერტიფიკატი, რომელსაც აქვს თავისი ნომერი და ორი, ძვირფასი თვლებით მოოჭვილი ორდენი. ასევე სკულპტურა „ხელის“ დაწარწერით – „საუკეთესო კლინიკა“. ჯილდოდ მერგო ასევე თვლებით გაფორმებული, ულამაზესი გულსაკიდი _ „წლის მენეჯერი“.
_ როგორც ვიცი, საქართველოში ერთადერთი კლინიკა ხართ, ვინც ამ ჯილდოს მფლობელი გახდა?
_ დიახ. ვისურვებდი, რომ ჩემს ქვეყანაში რაც შეიძლება მეტ კლინიკას და ექიმს მიეღოს მსგავსი სახის პრიზები. მაგრამ, ამ ეტაპზე მხოლოდ კლინიკა „გული“ გახდა ამ პატივის ღირსი, რისთვისაც დიდი მადლობა მათ.
