სიღნაღის ამბები

,,ხალხს კორონასაშიშ ზონებს განგებ უწყობენ და სიკვდილისთვის სწირავენ” _ ეს უნდა წაიკითხოთ!

საკუთარი თვალით დანახული სინამდვილე

   ეს სიღნაღის მუნიციპალიტეტის ქალაქ წნორის ,,ლიბერთი ბანკი”-ს შენობასთან მდომი ბანკის ავტომანქანაა, საიდანაც გასცემენ პენსიას. მანქანას მისეული ადამიანები კი, კორონას ე.წ. მოწყვლადი ფენა, პენსიონერები არიან.
   ჩაგვკეტეს სახლებში, აგვიკრძალეს 21 საათიდან ქუჩაში გასვლა. ავად რომ გავხდეთ, აფთიაქამდე ვერ მივალთ, რადგან 2 ათას ლარს ავიკიდებთ. მხოლოდ სასწრაფო დახმარებას შეუძლია, დროებითი საშვი მოგვცეს და საავადმყოფომდე მივიდეთ, სხვაგან კი ვერ წავალთ. ეგ არის და ეგ. დამცავი ნიღბის არქონის გამო საპატრულო პოლიციის თანამშრომლები გვაჯარიმებენ – ყოველდღიურად იწერება უამრავი გადასახადი. აი, ამ მდგომარეობას კი, თითქოს ვერავინ ხედავს, ვერავინ ამჩნევს და არავინ არავის სთხოვს პასუხს.
ორი დღის წინ, აფთიაქში მოხუცი შემოვიდა. ეტყობოდა, პენსია ჰქონდა აღებული. ფურცელზე დაწერილი წამლების სია გადასცა ოპერატორს. როცა ლოდინით შევწუხდი და დაჩქარება მოვითხოვე, მისი სიის ,,დიდებულება” მაშინ ვიხილე და გავოცდი იმით, რომ საწყალმა, მთელი პენსია იქ დატოვა.
    მეორე ფაქტსაც შევესწარი რამდენიმე დღეში. ,,ლიბერთი ბანკი”-ს ბანკომატებში, კვირა დღეს, ფული არ იდო და შეწუხებული პენსიონერები, რომლებმაც გადაწყვიტეს, სოფლებიდან უქმე დღეს ჩასულიყვნენ ქალაქში, რათა ხალხმრავლობას არიდებოდნენ და პენსია აეღოთ, უფულობის გამო ადგილს ტკეპნიდნენ და სახლში ვერ ბრუნდებოდნენ. მხოლოდ ორშაბათს, დღის მეორე ნახევარში, მოხდა ბანკომატების ფულით შევსება და რა თქმა უნდა, იქაურობა შეწუხებული პენსიონერებითაც გაივსო. დანარჩენს, კი ხედავთ ამ ფოტოზე.
   არ მითხრათ, მერე რაო? მერე ის, რომ იმდენად გაურკვეველი ყოფა შეგვიქმნეს, კორონა ხან საშიში გვგონია და ხან -არა, წესების დარღვევების გამო ზოგს აჯარიმებენ და ზოგს-არა, როცა მოუნდებათ პენსიას აძლევენ გაუბედურებულ მოხუცებს და როცა მოუნდებათ-არა, სესხს ხან გადაგვივადებენ და ხან-არა და ა.შ. სწორედ ამას ჰქვია ორმაგი სტანდარტი, ფეხებზე მკიდიობა, უპატრონო ქვეყანა და არეულობა.
   დიახ, ჩვენი ქვეყანა არეულია და ჩვენ, ორმაგი სტანდარტით გვაცხოვრებენ.
   დიახ, უბრალო ხალხი ფეხებზე ჰკიდია მათ, რომლებიც ხალხზე მზრუნველთა სახელით წამოსხდნენ მუნიციპალიტეტებში, პარლამენტში, ხელისუფლებაში, მაგრამ საკუთარ ჯიბეებზე ზრუნვით დაკავდნენ.
დიახ, რიგით ადამიანებს, მოხუცებს, თითქოს უფრთხილდებიან და კოვიდისგან იცავენ, ამ მიზნით უკვე წელიწადია სახლებში დაგვაპატიმრეს, თავზე დაგვამხეს ბიზნესები, ბანკებში ვალები გაგვიორმაგეს, დედას გვტირობენ, მაგრამ ე.წ. ზრუნვის ობიექტ ხალხს კორონასაშიშ ზონებს განგებ უწყობენ და სიკვდილისთვის სწირავენ. ასე, უბრალოდ, როგორც ამ ფოტოზეა ასახული, ჯიგრულ – ფეხებზედაკიდების პონტში.
    ვერ დავივიწყებ სესხის გადავადების ,,საოცარ” ისტორიას.
   პანდემიასთან დაკავშირებით ლიბერთიმ სამომხმარებლო სესხი 3 თვით გადაავადა, რომლის შესახებაც ესემესშეტყობინება ტელეფონით მივიღე. გადასამოწმებლად მივედი ბანკის ფილიალში, სადაც მითხრეს, რომ ინფორმაციას არ ფლობდნენ. ამის მერე დავრეკე ცხელ ხაზზე. დამიდასტურეს, რომ ნამდვილად გადავადდა და სამი თვის განმავლობაში უნდა გადავიხადო მხოლოდ პროცენტი. მეორე დღეს ისევ წავედი ბანკის ფილიალში და უკვე მითხრეს, რომ არაფერი არ უნდა გადავიხადო სამი თვის განმავლობაში. დეკემბერში არც გადამიხდია, მაგრამ იანვარში დამირეკეს და მაცნობეს, რომ ამ თვეში პროცენტი მქონდა გადასახდელი. ისევ გავიქეცი ბანკში და შევხვდი უფროს მენეჯერს. მისი თქმით, სესხის გაძვირება რომ არ მომხდარიყო, ბანკმა მხოლოდ ახლა გადაწყვიტა, მომხმარებლებისთვის პროცენტი მოეთხოვა. ხან ისე და ხან-ასე, თუმცა ამ ყველაფრის პატრონი და მომწესრიგებელი არ ჩანს. ესეც თქვენი შეღავათი და ესეც თქვენი სითაღლითე.
ახლა თქვენ მითხარით, ,,ეტა რაზვე ნარმალნა?”
   პს. პოლიცია ბანკის გვერდითაა და ამ ჭყლეტვას, საკუთარი თვალით, მშვიდად უყურებს.
   ამას წინათ, პარკინგებზე მანქანის გასაჩერებელი ადგილი ვერ მოვნახე და პოლიციის შენობის წინ გავაჩერე ავტომანქანა. ის იყო გადმოვედი, რომ შენობიდან გამოვარდა ერთ-ერთი სკამზე ჯდომით დაქანცული პოლიციელი და აქ არ შეიძლება გაჩერებაო, მანქანა გადამაყენებინა. როცა დავბრუნდი, ის ადგილი საიდანაც გადავაყენე, კვლავ თავისუფალი იყო. მას მერე ვფიქრობ, რატომ არ შეიძლებოდა მანქანის გაჩერება პოლიციის შენობის მიმდებარედ და ამით რას გავაფუჭებდი? თუ სკამზე გართხმულებს პირდაპირი ხედვის არეს დავუხშობდი, აგერ ფაქტია, რომ რეალურ კანონდარღვევებს და ხალხისთვის შექმნილ საშიშ მდგომარეობას მაინც ვერ ხედავენ…
მოკლედ, ქვეყანაში ძაღლი პატრონს ვერ ცნობს!
ნელი ვარდიაშვილი, რედაქტორი

დატოვეთ კომენტარი

კომენტარები

მსგავსი სიახლეები

Back to top button
Close