საზოგადოება

ჯილდოზე მეტად ჩვენი შრომის შემჩნევა და დაფასება გამიხარდა

 „ფოსტალიონმა“ ძალიან სასიამოვნო და საამაყო ამბავი შეიტყო და გადავწვიტეთ, ამის შესახებ თქვენც გამცნოთ. დარწმუნებულები ვართ, ეს ფაქტი ძალიან გაგახარებთ.

საქმე ისაა,  რომ განათლების სამინისტროს ინიციატივით, სამცხე-ჯავახეთის მასშტაბით, გამოვლინდა ყველა  მეცხრე კლასელი ფრიადოსანი მოსწავლე და შრომისა და გულმოდგინების დასაფასებლად თითოეულ მათგანს გადაეცა  ნოუთბუქი. ჩვენ მოვახერხეთ ერთ-ერთი დაჯილდოვებულის კოორდინატების დადგენა და მასთან გასაუბრება.

14971850_1364749400216567_781465051_n

დავუკავშირდით მარიამ მახარაძეს _  ქ. ბორჯომის #1 საჯარო სკოლის მოსწავლეს.

_ გამარჯობა მარიამ, საინფორმაციო სააგენტო „ფოსტალიონი“-ს ჟურნალისტი გიკავშირდები…

_ გამარჯობა, გისმენთ…

_ მარიამ, პირველ რიგში გილოცავთ წარმატებას, მოხარულები ვართ, თქვენისთანა მომავალი თაობა რომ გვყავს.

_ გმადლობთ. თქვენს ზარს ნამდვილად არ ველოდი, ცოტა დავიბენი… ამგვარ ამბებს ნაკლებად აშუქებენ ხოლმე, გამიხარდა თქვენ მაინც რომ დაინტერესდით…

_ ჩვენ ყოველთვის ვეძებთ ასეთ კარგ ამბებს. გვინდა, ხალხს სასიამოვნო ინფორმაცია არ მოვაკლოთ.

_ მაშინ, გისმენთ, რა გაინტერესებთ?

_ მარიამ, იქნებ კონკრეტულად გვითხრა, რა კრიტერიუმებით მოხდა თქვენი შერჩევა?

_ კეთილი. ყველა ის  მეცხრე კლასელი მოსწავლე, რომელმაც ცხრავე კლასი ფრიადით დახურა, განათლების სამინისტროს წარმომადგენელმა დაგვაჯილდოვა ნოუთბუქებით.

_ მითხარი, რა რეაქცია გქონდა, როდესაც გაიგე ამის შესახებ?

_ სიმართლე რომ გითხრათ, ჯილდოზე მეტად ჩვენი შრომის შემჩნევა და დაფასება გამიხარდა, თუნდაც თქვენი სააგენტოს მხრიდან. ეს ყველაზე კარგი საშუალებაა, მოსწავლეს მისცე სტიმული მიაღწიოს უფრო და უფრო მეტს.

    _ შენი თანაკლასელებიდან მხოლოდ შენ აღმოჩნდი ასეთი ყოჩაღი?

_ საბედნიეროდ, არა. მხოლოდ ჩემი კლასიდან 5 მოსწავლეა ფრიადოსანი, რაშიც ჩვენს მასწავლებლებს დიდი წვლილი მიუძღვით.

_ მარიამ, შენი ყველაზე დიდი გულშემტკივარი ვინ არის? არის ვინმე, ვისაც გინდა მადლობა გადაუხადო, გარდა საკუთარი ნიჭისა და შრომისმოყვარეობის უნარისა?

_ კარგი შეკითხვაა, ეგ მეც მინდოდა აღმენიშნა, მაგრამ ცოტა არ იყოს მომერიდა, ოსკარის დაჯილდოვებაზე ხომ არ ვარ-თქო, გავიფიქრე… რა თქმა უნდა, არსებობს ასეთი ადამიანი და ვინ შეიძლება იყოს ის, თუ არა დედაჩემი.

 „ფოსტალიონი“-ს დახმარებით საჯაროდ გიხდი დედა მადლობას, იმისათვის, რომ მე დღეს ვარ ისეთი, როგორიც ვარ და იმისათვის, რომ შენ ხარ ჩემი მთავარი მამოძრავებელი ძალა. შენი დახმარების გარეშე მე წარმატების გზაზე ნამდვილად ვერ დავდგებდი. ძალიან მიყვარხარ დედა!

ასევე  მთელი გულით ვულოცავ წარმატებას ყველა მოსწავლეს, რომელიც ამ პროექტის ფარგლებში დაჯილდოვდა და თითოეულ მათგანს ვუსურვებ წარმატებას. ჩვენ ის ბავშვები ვართ, რომლებმაც დავამტკიცეთ, რომ შრომა და სწავლა აუცილებლად ფასდება.

 _ დიდი მადლობა, მარიამ… პირობა უნდა მოგვცე, რომ სამომავლოდ კიდევ გვექნება ამგვარი სასიამოვნო მიზეზი შენთან დასაკავშირებლად, რათა  შენი ახალი წარმატებებით გავახაროთ ყველა თქვენი თაობის გულშემატკივარი.

_ პირობას გაძლევთ… ჩვენ წინ დიდი გეგმები და მიზნები გვაქვს, რომლებსაც აუცილებლად მივაღწევთ.

წყარო: POSTALIONI.COM

დატოვეთ კომენტარი

კომენტარები

მსგავსი სიახლეები

Leave a Reply

Your email address will not be published.

Back to top button
Close