სიღნაღის ამბები

,,სიღნაღის მუნიციპალიტეტის მერიას მიაჩნია, რომ ღონისძიებების ჩატარებისთვის საჭირო არაა პროექტი, გეგმა, სცენარი…”

შამპანიური მხოლოდ იმ საჩუქრებშია, რომელიც გაჭირვებულ ოჯახებს მერმა და საკრებულოს თავმჯდომარემ უნდა მიუტანოს. დანარჩენებში ლობიო, ზეთი, შედედებული რძე და ერთი პარკი კანფეტი ჩააწყეს

,,მოგესალმებით მეგობრებო. მინდა მოგიყვეთ როგორ მზადდებოდა საახალწლო ნაძვის ხის ზეიმი #სიღნაღისმუნიციპალიტეტისმერიაში , რომელიც წნორში 24 დეკემბერს გაიმართა. ზოგადად სიღნაღის მუნიციპალიტეტის მერიას მიაჩნია, რომ ღონისძიებების ჩატარებისთვის საერთოდ არაა საჭირო პროექტი, გეგმა, სცენარი, ხარჯთაღრიცვხა, პროექტის მომზადება, წარდგენა, მოწონება, დამტკიცება. ეს ყველაფერი ზედმეტია, მაშინაც კი, როცა მერს ჯერ კიდევ არ ყავს მოადგილე, რომელიც გაუწევდა მეთვალყურეობას ასეთ საკითხებს. საერთოდაც რა საჭიროა მოადგილე, როცა გყავს მოხალისეთა ჯგუფი საკრებულოში, როგორიცაა მაგალითად ვაქირის მაჟორიტარი დეპუტატი ქალბატონი ნანა ნანობაშვილი. რაც გინდათ დაავალეთ. ზეპირად ადგენს ღონისძიებების პროექტებს, პირდაპირ შეუძლია მოგიყვეთ. არც ფურცლები იხარჯება, არც კარტრიჯი. ეკონომიურიცაა. მაგრამ ეს ოპოზიცია ხომ არ ისვენებს. ითხოვს ინფორმაციას. თანაც ქაღალდზე ან ელექტრონულს. ქაღალდზე საახალწლო ღონისძიების პროექტი ვერ მივიღეთ, იმიტომ, რომ არ არსებობდა. არ ეგონათ ვინმე მოიკითხავდა და იმიტომ. შემდეგ გვითხრეს ქსეროქსი არ მუშაობსო. მაშინ ელექტრონულად გადმოგვიგზავნეთ მეილზე თქო. ტექნიკურად ვერ იგზავნებოდა , რატომღაც. ამასობაში შეიქმნა ერთადერთი ვერსია, რომელსაც წარმოგიდგენთ. ყველზე მეტად მაინტერესებს სიმღერა- შენგან მხოლოდ სიყვარული მინდა, როგორ ჟღერდა და ხათუნა აღამონიშვილმა როგორ უზრუნველყო ტრანსპორტით მუსიკოსშემსრულებლები. არც სცენა, არც განათება, თუმცა დღის მეორე ნახევრიდან ქ. წნორში ქუჩები გადაიკეტა საპოლიციო ძალებით. მოვალეობა მოხდილია. ხალხზე ზრუნვით დაღლილმა მერმა, ასეთივე დაღლილი ხმით მიულოცა ნაძვისხის ძირში მდგომ საზოგადოებას დამდეგი ახალი წელი. მეტს არც არავინ ითხოვს საბედნიეროდ. ჯერი საახალწლო ნობათებზეა, რომელშიც მხოლოს 15 იღბლიანს შეხვდება შამპანური 265 -იდან რატომღაც. გაგრძელება იქნება…” _ წერს ფეისბუქის საკუთარ გვერდზე სიღნაღის საკრებულოს წევრი ოპოზიციიდან, ნონა ნინიაშვილი.

პოსტს სიღნაღის საკრებულოს ქართული ოცნების წევრები გამოეხმაურნენ. მათ შეკამათებას კი ნონა ნინიაშვილის კომენტარი მოჰყვა, სადაც ის წერს:

,,მთელი კვირა ვითხოვთ პროექტს ხარჯთაღრიცხვით. რაც მოგვაწოდეთ ის გამოვაქვეყნე. ხარჯთაღრიცხვა აქამდე არ იყო. ახლა გაჩნდა? საჯაროდ ვითხოვ ინფორმაციას. რადგან კანონით ვერ ხერხდება ინფორმაციის მიღება, ამ ხერხს მივმართე და ვატყობ, არც თუ უშედეგოდ. ის თუ იცით, რომ 265 ნობათიდან მხოლიდ 15 -შია განსხვავებული პროდუქტი? ნეტავ რატომ? იმ 15 -ს მაღალი თანამდებობის პირები უნდა გაყვეს და მიარვას და მაგიტომ ხომ?”

როგორც qronika.ge-ს წყარომ გაუმხილა, სიღნაღის მუნიციპალიტეტის სოფლებში უნდა განაწილდეს 265 საახალწლო- სასაჩუქრე ნობათი, რომელთაგანაც მხოლოდ 15-შია შამპანიური. შევიტყეთ ისიც, რომ სწორედ ეს 15 ცალი საჩუქარი უნდა მიუტანოს რამდენიმე ოჯახს მერმა და საკრებულოს თავმჯდომარემ, ფოტო გადაიღონ სასაჩუქრე პარკებით და საკუთარ ვებგვერდზე გამოაქვეყნონ. დანარჩენებს კი შამპანიურს ვინ აღირსებთ, მათ მხოლოდ ლობიო, ერთი ბოთლი ზეთი, ბრინჯი. შედედებული რძე, შაქარი და ერთი პარკი კანფეტი შეხვდებათო.

დატოვეთ კომენტარი

კომენტარები

მსგავსი სიახლეები

Back to top button
Close