„უნდა მოხდეს მომხმარებელთა უფლებების დაცვა ისე, რომ ბიზნესსაც აზრი ჰქონდეს”

ფრაქცია „ქართული ოცნება – რესპუბლიკელების” წევრ ნოდარ ებანოიძის განცხადებით, მიკროსაფინანსო ორგანიზაციებისა და ონლაინსესხების რეგულაცია საკანონმდებლო დონეზე აუცილებელია. დეპუტატის განმარტებით, ონლაინსესხების აკრძალვების შესახებ საუბარი, არასერიოზულია. მისი თქმით, უნდა მოხდეს მომხმარებელთა უფლებების დაცვა ისე, რომ ბიზნესსაც აზრი ჰქონდეს. ის განმარტავს, რომ  მიკროსაფინანსო ორგანიზაციებზე, გარკვეულწილად, არსებობს რეგულაციები, თუმცა – ძალიან სუსტი, რომელიც მიკროსაფინანსო ორგანიზაციებს განვითარების საშუალებას არ ძლევს.

„მე მქონდა ონლაინ სესხების, მიკროსაფინანსო ორგანიზაციების, მათი ასოციაციების წარმომადგენლებთან შეხვედრა, ასევე, შევხვდით მსოფლიო ბანკის წარმომადგენლებს, რომელთაც  ვთხოვეთ, საექსპერტო დახმარება გაეწიათ ამ კუთხით. საჭირო არ არის ქარის წისქვილებთან ბრძოლა, ამას სჭირდება სწორად დაგეგმვა და გათვლა: ერთი, რომ არ დაზარალდეს მომხმარებელი და მეორე მხარეა, რომ ეს არის ბიზნესი. ჩვენ უნდა დავიცვათ მომხმარებელთა უფლებები ისე, რომ ბიზნესსაც აზრი ჰქონდეს. ლაპარაკი, რომ ონლაინსესხი ავკრძალოთ, არასერიოზულია“,- განაცხადა  ებანოიძემ.

დეპუტატის განმარტებით, საქართველოს პარლამენტი მზად არის, გაიმართოს აღნიშნულ საკითხებზე მსჯელობა, თუმცა რაიმე პროდუქტი თუ ინიციატივა, ჯერ არ არსებობს.

დატოვეთ კომენტარი

კომენტარები