საზოგადოება

სოსო ალავიძე: პაატა ბურჭულაძის კომენტარი ჩემთვის შეურაცხმყოფელია

შაბათს, 28 მაისს სპორტის ახალ სასახლეში „პაატა ბურჭულაძე – სახელმწიფო ხალხისთვის“ პარტიის ყრილობა გაიმართა. დამსწრეთა შორის ბევრი ცნობილი სახე იყო, თუმცა მედიის განსაკუთრებული ყურადღება თბილისის პოლიციის მთავარი სამმართველოს ყოფილ უფროსს, გენერალ სოსო ალავიძეს ერგო. გავრცელდა ინფორმაცია, რომ ალავიძე  ბურჭულაძის მხარდამჭერი იყო, რაც თავად პარტიის ლიდერებმა უარყვეს და რა გასაკვირიც არ უნდა იყოს, ისიც კი თქვეს-მოსაწვევი არ გაგვიგზავნია და არ ვიცით ყრილობაზე როგორ აღმოჩნდაო.

 ცოტა არ იყოს, უცნაურია მასპინძლის მხრიდან სტუმრისგან თავის შორს დაჭერა, მაგრამ პოლიტიკოსებს რას გაუგებ? „ფოსტალიონმა”, ამ საკითხზე, სოსო ალავიძეს რამდენიმე კითხვით მიმართა. როგორც აღმოჩნდა, ის საკმაოდ გაბრაზებული და შეურაცხყოფილია  ბურჭულაძის ასეთი კომენტარით. განგვიცხადა,  რომ მოსაწვევი მას პარტიის წევრებმა თავად პაატა ბურჭულაძის დავალებით გადასცეს.

_ ბატონო სოსო, ყრილობაზე დამსწრეთა შორის პრესა ყველაზე მეტად თქვენით დაინტერესდა, თუმცა მასპინძლებმა მოგვიანებით განაცხადეს, რომ თქვენ იქ მიწვეული არ იყავით.

_ არა, ასე არ იყო. მინდა გითხრათ, რომ  არცერთ პარტიაში არ ვყოფილვარ და არც პარტიის ყრილობებზე მქონია დასწრების დიდი სურვილი. სიმართლე რომ გითხრათ, ჩემი იქ მისვლა ინტერესმა განაპირობა. ამ პარტიაზე მრავალი მითქმა-მოთქმა იყო და მაინტერესებდა, მართალი იყო თუ არა გავრცელებული ხმები იმასთან დაკავშირებით, რომ ნაციონალური მოძრაობის ახალი სატელიტური პარტია ჩამოყალიბდა. მით უმეტეს, რომ იქ ჩემი რამდენიმე ისეთი ახლობელია, რომლებსაც ნაციონალებთან ვერანაირად ვერ მოვიაზრებ. რამდენიმე თვის განმავლობაში მთავაზობდნენ, მივსულიყავი და მათთან ერთად ვყოფილიყავი. ყრილობის წინა დღეს სპორტის სასახლეში ფეხბურთის ტურნირზე ვიმყოფებოდი, გვიან ღამით დამთავრდა და როცა ჩამოვდიოდი, დავინახე ჩემი მეგობარი, გავჩერდი მასთან და მოვიკითხე. ამასობაში გამოჩნდა პაატა ბურჭულაძე, რომელსაც წლებია ვიცნობ. დიდი სიხარულით მომესალმა და მითხრა, ყველა შენი მეგობარი აქ არის და შენ რას აპირებ, მოდი და იყავი მათ გვერდითო. შემდეგ მოიკითხა, მომცეს თუ არა მოსაწვევი. აღმოჩნდა, რომ მოსაწვევი და ადგილი A ლოჟაში ჩემთვის უკვე გამზადებული ჰქონდათ და იქვე გადმომცეს.

_ შემდეგ რა მოხდა?

_ ყრილობაზე თითქმის ყველა სააგენტო მოვიდა ინტერვიუსთვის. ჯერ გამოსული არ ვიყავი, რომ უკვე გავრცელებული იყო ინფორმაცია და ჩემი ფოტოები. GDS-ის ჟურნალისტი პაატას ეკითხებოდა, რატომ ვიყავი მე მიწვეული, რაზეც მან პასუხი გასცა, მე რატომ უნდა მომეწვია, დასწრება ყველას შეეძლოო. ამან ძალიან გამაღიზიანა. ისე გამოვიდა, თითქოს ჩემი ინიციატივით მივედი. საღამოს 8 საათიან საინფორმაციო გამოშვებაში კი ხათუნა ლაგაზიძემ განაცხადა, რომ ჩვენი პოლიტიკური ხედვები აბსოლუტურად სხვადასხვაა, ალავიძეს ჩვენთან არანაირი საერთო არ აქვს და ვერც ექნებაო.

_ და რა იცის ლაგაზიძემ თქვენი პოლიტიკური ხედვების შესახებ?

_ რა გითხრათ, მე  პოლიტიკოსი არ ვყოფილვარ და არც ჩემი პროგრამა მქონია. ლაგაზიძე შევარდნაძის დროს უშიშროების საბჭოში მუშაობდა და ეტყობა მაშინ ჰქონდა ჩემგან განსხვავებული პოლიტიკური ხედვა.

-არ დაუსვით კითხვა ასე რატომ მოიქცნენ?

-რა თქმა უნდა, შევუთვალე კითხვა,  რატომ მოიქეცით ასე მეთქი, თუმცა არავითარი პასუხი არ მიმიღია.

-ახლა დავუბრუნდეთ ყრილობას, რა ნახეთ იქ და ფიქრობთ თუ არა, რომ ეს პარტია მართლა ვინმეს სატელიტია?

-მე ვნახე ის, რომ მეთოდურად, სერიოზულ დარტყმებს აკეთებდნენ დღევანდელ ხელისუფლებაზე და სააკაშვილის მმართველობის წლებზე გაკვრითაც არაფერი უთქვამთ. მკაფიო ვექტორი, თუ ვინ არიან და რა მიმართულება აქვთ, არ დაუფიქსირებიათ. სახეებმა, რომლებიც იქ ვნახე, გამიჩინა ეჭვი, რომ პარტია ნაციონალური მოძრაობის მიერ იმართება. თუნდაც ჩემთან მიმართებაში მომხდარი ფაქტი მაძლევს იმის საფუძვლიან ეჭვს, რომ არ გამოვრიცხო ის ბრალდება, რასაც მათ უყენებენ. ეს ჩემი სუბიექტური აზრია.

-მაინც რას ფიქრობთ,   რატომ უარგყვეს ?

-ჩემი მიწვევა განპირობებული იყო იმით, რომ სწორედ ის ხმები, რომლებიც მათზე გავრცელდა სატელიტობასთან დაკავშირებით, გაფანტულიყო. მე ჩემი მტერიც კი ვერ მომიაზრებს ნაციონალებთან, ამიტომ ჩემი იქ   მისვლით ადამიანების გარკვეულ პროცენტს გაუქრებოდა ეჭვი, რომ ისინი ვინმეს სატელიტები არიან. ჩემი უარყოფა კი ალბათ ნაციონალების სურვილით იყო გამოწვეული. ასე ვთქვათ, გამომიყენეს ძალიან ბინძურად . პაატა ბურჭულაძეს ძალიან კარგად ვიცნობ, პატივს ვცემ, როგორც დიდ ხელოვანს, სიმართლე გითხრათ, გაოცებული დავრჩი მისი მხრიდან ჩემი უარყოფის,  მაგრამ რას ვიზამთ, კაცობრიობის ისტორიაში  გაცილებით უფრო მძიმე უარყოფის ფაქტები გვახსოვს.

– გეთანხმებით

ცუდია, რაღაც სიახლე რომ ტყუილით იწყება. იმედგაცრუება ჩვენი ხალხისთვის უცხო არ არის, მაგრამ თავად ახალი  პარტიის წევრებს  მართებთ ალბათ დაფიქრება- ხომ შეიძლება ერთ მშვენიერ დღეს ლიდერმა ისინიც უარყოს ან სულაც განაცხადოს-პარტიაში არავის მოუწვევია და როგორ გაწევრიანდნენ, გაუგებარიაო.

წყარო postalioni.com

დატოვეთ კომენტარი

კომენტარები

მსგავსი სიახლეები

Leave a Reply

Your email address will not be published.

Back to top button
Close