„სვანიძის ქუჩის დაზარალებულთა კომიტეტი“ განცხადებას ავრცელებს
„მიმდინარე წლის 13 სექტემბერს, „სვანიძის ქუჩის დაზარალებულთა კომიტეტმა“ თბილისის მერიას განცხადებით მიმართა და გამოითხოვა მდინარე ვერეს კალაპოტის ცვლილების პროექტი და შესაბამისი სპეციალისტების კომპეტენტური დასკვნა, რომელსაც ეს პროექტი ეფუძნებოდა. მოგეხსენებათ, სვანიძის ქუჩამ ყველაზე მძიმედ გადაიტანა 13-14 ივნისის ტრაგედია და ყველაზე მეტად დაზარალდა. ამიტომ, ამ ქუჩის მაცხოვრებლები ყველაზე მეტად არიან დაინტერესებულნი რა პროექტი განხორციელდება ვერეს ხეობაში, რადგან მათ თავიანთ თავზე იწვნიეს მდინარე ვერეს ვერაგობისა და ხელისუფალთა დაუდევრობის შედეგი.
11 ოქტომბერს თბილისის მერიის კეთილმოწყობის საქალაქო სამსახურმა ჩვენი განცხადების პასუხად, მდინარე ვერეს კალაპოტის ფორმირების შესახებ სამხარაულის სახელობის ექსპერტიზის დასკვნა გამოგვიგზავნა. გვაინტერესებდა, რატომ გვიმალავდა აქამდე და ახლაც რატომ არ გვაძლევს მერია აღნიშნულ პროექტს, მაგრამ სამხარაულის სახელობის ექსპერტიზის დასკვნამ ყველაფერს ნათელი მოჰფინა. აღნიშნულ დასკვნაში ცალსახად წერია, რომ პროექტი, რომელიც მერიამ სავარაუდოდ მრავალი ათას ლარიანი დანახარჯით გააკეთა, უვარგისია და ადამიანების უსაფრთხოებას ვერ უზრუნველყოფს.
„სამხარაულის სახელობის ექსპერტიზის დასკვნის მიხედვით, პროექტი, რომელშიც თბილისის მერიამ ალბათ ასი ათასობით ლარი გადაიხადა, უვარგისია და მასში გადახდილი საბიუჯეტო თანხა – წყალში გადაყროლი. სამხარაულის ექსპერტის დასკვნას თავიდან ბოლომდე ვეთანხმები, რადგან, როგორც აქედან ჩანს, შესრულებული სამუშაოები არანაირ შედეგს არ მოგვცემს და სტიქიის დროს ისეთივე დიდი უბედურება დაატყდება სვანიძის ქუჩას, როგორიც 13-14 ივნისს. შესაბამისად, ექსპერტების გარეშე შემუშავებულ პროექტში ასი ათასობით ლარია გაფლანგული და პირდაპირ იკვეთება კორუფციის ნიშნები. ამით სამართალდამცავი ორგანოები უნდა დაინტერესდნენ. საინტერესოა, რა დაჯდა ამ ყოვლად უნიჭო პროექტის შემუშავება?! “ – ამბობს „სვანიძის ქუჩის დაზარალებულთა კომიტეტის“ თავმჯდომარე თამაზ ელიზბარაშვილი.
აქვე ვაქვეყნებთ მდინარე ვერეს კალაპოტის ფორმირების შესახებ ლევან სამხარაულის სახელობის სასამართლო ექსპერტიზის ეროვნული ბიუროს დასკვნას, რომ ყველასთვის მისახვედრი იყოს თუ რაზეა საუბარი“ – ნათქვამია კომიტეტის განცხადებაში.
