სპორტი | კულტურა

სახლთანგელოზობა – როგორ აღნიშნავენ ამ დღეს კახეთში?

„სახლთანგელოზობა

კახელებო, არ მოშალოთ, კახური ტრადიციაა ეს და სახლთანგელოზობას ეძახიან. ვინც რა უნდა ის თქვას, ეძახონ წარმართული, მოძველებული. კარგი ტრადიციაა, თანაც ბალღობის სუნი და ელფერი დაჰკრავს, თანაც ლოცვისთვის განგაწყობს…
ერთი ბებო მყავდა კახელი (ასე ამბობდა თავისთავზე ფშაურცნობიერებადაკარგული, მე-19 საუკუნის შუა ხნებში მიგრიაულთიდან ჯერ იყალთოში და მერე გულგულაში გადმოსახლებული ბაჩიათ გიგიტელას შთამომავალი ეკატერინე გიგიტელაშვილი). ამ ბებოსგან მაქვს უამრავი კარგი რამ ნასწავლი.

ჰოდა… ამ ბებოჩემმა იცოდა, სულგანათლებულმა, ხორციელის კვირის ხუთშაბათს საუკეთესო დედალს დაკლავდა, მოხარშავდა მრგვალად, წვენს საჩიხირთმედ გადაინახავდა, დედალს, შებინდებულზე, სახლში შემოსასვლელ ღია კართან დადგამდა, ხელადით ღვინოს დაუდგამდა, ირგვლივ ბატიბუტს შემოუყრიდა, ქადაზე სანთელს აანთებდა და მიუშვებდა პაპაჩემს სახლის ანგელოზის მოსაპატიჟებლად…
იწვოდა სანთელი, ილოცებოდა პაპაჩემი და მე ნამდვილად ვხედავდი პატარ–პატარა ფრთიან გოგო–ბიჭებს და მათ ლანდებს კედელზე. მერე ლამაზად (ქართულად) აქნიდა იმ დედალს, დაგვსვამდა სუფრასთან, დაგვიდებდა თეფშზე საუკეთესო ნაჭრებს, ცოტ–ცოტა ნიორთავას, პატარა ჭიქებით საფერავს და გვალოცვინებდა ფუძე–ჭერის ანგელოზებს. იმ დედალზე და მეორე დილას მისი წვენიდან გაკეთებულ ჩიხირთმაზე გემრიელი არც არაფერი მგონია და ქადა–სანთელი და ჭიქა საფერავი ხომ მთლად სულ–გულის წამლად გვერგებოდა…
მერე და მერე, ბებოჩემი რომ აღარ იყო, დედაჩემი აგრძელებდა და დღემდე აგრძელებს ამ ტრადიციას… აგერ, უკვე რამდენი წელია, დღევანდელ დღეს დილაადრიანად მირეკავს და სახვალიო რიტუალის ჩატარებას მახსენებს…
ასე. რომ  ფუძის ანგელოზო, ჭერის ანგელოზო
კალთა დაგელოცოს, ფრთები დაგელოცოს…”
ბედნიერი იყოს შენი ფეხი და შენი სუფევა ჩემს ოჯახში და ჩემს ქვეყანაში!
ამინ!_ წერს სოციალურ ქსელში მარიამ ხუცურაული და მადისაღმძვრელ ფოტოებსაც აქვეყნებს.

წყარო: postalioni.com

დატოვეთ კომენტარი

კომენტარები

მსგავსი სიახლეები

Leave a Reply

Your email address will not be published.

Back to top button
Close