საზოგადოება

საქართველოში კოვიდით სულ 14,631 ადამიანი გარდაიცვალა _ ,,ფლანგვის დეტექტორი”

,,ჯანდაცვის სამინისტროს არცერთ ვაქცინასთან დაკავშირებული პოსტი არ აქვს დარეკლამირებული _ 2021 წლის ბოლოსთვის მოსახლეობის 60% უნდა ყოფილიყო სრულად აცრილი, თუმცა მოსახლეობის 30%-ის აცრაც ვერ მოხერხდა"

კოვიდ პანდემიის დამარცხება ჩვენი ქვეყნის ერთ-ერთ მთავარ გამოწვევას წარმოადგენს, მის შესაჩერებლად კი ყველაზე ეფექტური საშუალება მოსახლეობის უმრავლესობის ვაქცინაციაა. მიუხედავად იმისა, რომ საქართველოში პირველი ვაქცინა ჯერ კიდევ 2021 წლის 13 მარტს გამოჩნდა 2022 წლის იანვრის მონაცემებით ქვეყნის მოსახლეობის მხოლოდ 30% პროცენტია აცრილი, კოვიდით დაავადებულთა რიცხვი კი დღითიდღე იზრდება.
ქვეყანაში სადაც მოსახლეობის 70% და რეანიმაციაში მყოფი პაციენტების უმეტესობა აუცრელია, სახელმწიფოს მხრიდან არ ჩატარებლი ეფექტიანი კამპანია კოვიდ ვაქცინაციის წამახალისებლად.
2021 წლის დასაწყისში მთავრობის წევრები აანონსებდნენ, რომ წლის ბოლომდე მოსახლეობის 60%-ს აცრიდნენ, რაც საზოგადოებრივი იმუნიტეტის შესაქმნელად საკმარისი იქნებოდა. აღსანიშნავია, რომ შემდგომში ახალი შტამების გაჩენის შედეგად საზოგადოებრივი იმუნიტეტის მისაღწევად მოსახლეობის უკვე 80-85%-ის აცრა იყო საჭირო და არა 60%-ის, თუმცა ჩვენთან ეს ციფრი არ გადაუხედავთ.
აგვისტოს ბოლოს პრემიერი ღარიბაშვილი ამბობდა, რომ სექტემბრის ბოლოსთვის 2 მილიონი აცრა იქნებოდა ჩატარებული, რაც მოსახლეობის 60%-ის აცრისგან მაინც შორს იქნებოდა, თუმცა ვერც ეს მოხერხდა. ვაქცინაციის კამპანიის არასრულყოფილად ჩატარების, წინასაარჩევნოდ სისხლიანი ბანერების ვაქცინაციის წამახალისებელ ბილბორდებზე გადაკვრისა და ვაქცინაციის წამახალისებელი მედია კამპანიის სისუსტის გამო, საბოლოოდ მივიღეთ შედეგი, რომ 2021 წლის ბოლოსთვის საქართველოს სრულად აცრილი ჰყავდა მთლიანი მოსახლეობის 29%, რაც მოზრდილი მოსახლეობის 40%-ს უდრიდა, ხოლო ჯამში გაკეთებული იყო 2.5 მლნ დოზა ვაქცინა.
2021 წლის ბოლოსთვის კორონავირუსით გარდაცვლილთა ოფიციალური მაჩვენებელი 13,800 ადამიანი იყო, 2022 წლის პირველ ორ კვირაში კი ეს რიცხვი 600 ადამიანით გაიზარდა. აღსანიშნავია რომ გარდაცვლილთა 98% არ ყოფილა აცრილი. ხოლო საქართველო ამჟამად მე-7 სახელმწიფოა მსოფლიოში კოვიდით გარდაცვლილთა რაოდენობის მიხედვით მოსახლეობის რაოდენობაზე გაანგარიშებით.
ხოლო კოვიდის ოფიციალურად აღრიცხული შემთხვევების მიხედვით ამჟამად ქვეყანაში 64,651 აქტიური ქეისია, ე.ი. ერთდროულად მინიმუმ ამდენი ადამიანია კოვიდით დაინფიცირებული, საიდანაც 4,352 ჰოსპიტალიზებულია.
ქვეყნის მასშტაბით მოსახლეობის მასიური აუცრელობის ფონზე საინტერესოა, რამდენად წაახალისა ხელისუფლებამ ვაქცინაციის პროცესი.
ფლანგვის დეტექტორმა შეისწავლა სოციალურ მედიაში ხელისუფლებისა და მთავრობის მიერ დარეკლამირებული სიახლეები ვაქცინაციის შესახებ.
სოციალური ქსელი “ფეისბუქი” ერთ-ერთი ყველაზე პოპულარული და ხშირად გამოყენებადი სოციალური ქსელია, საქართველოს მოსახლეობის მიერ. სწორედ ამიტომ, ქვევით მოცემულია მონაცემები იმის შესახებ, თუ როგორ იყენებს მთავრობის ადმინისტრაცია და სამინისტროები აღნიშნულ სოციალურ სივრცეს კოვიდის საწინააღმდეგო ვაქცინაციის სიახლეების გაცნობისა და ვაქცინაციის მოწოდებისთვის.
კოვიდ პანდემიასთან ბრძოლა ქვეყნის ერთ-ერთ მთავარ პრიორიტეტს წარმოადგენს. ჯანდაცვის სამინისტრო პანდემიასთან ბრძოლის მთავარ რგოლია, ამიტომ მნიშვნელოვანი იყო შეგვესწავლა აღნიშნული სამინისტროს ფეისბუქ გვერდი და სიახლეები, რომელსაც ის არეკლამირებს. თუმცა სამინისტროს არცერთი ვაქცინასთან დაკავშირებული პოსტი არ აქვს დარეკლამირებული.
აღსანიშნავია, რომ მთავრობის მიერ დასახული გეგმის თანახმად, 2021 წლის ბოლოსთვის მოსახლეობის 60% უნდა ყოფილიყო სრულად აცრილი, თუმცა მოსახლეობის 30%-ის აცრაც ვერ მოხერხდა.
👉 2021 წლის სექტემბერში ვაქცინაციის წამახალისებელ ბილბორდებს ე.წ სისხლიანი ბანერები გადააკრეს, ხოლო პრემიერი და დაავადებათა კონტროლის ცენტრის ხელმძღვანელი რეგულაციების დარღვევით ხალხმრავალ სუფრებზე ილხენდნენ.
🦠 საქართველოში კოვიდით სულ 14,631 ადამიანი გარდაიცვალა, რომლის 98% აუცრელი იყო, ხოლო ამჟამად 64,625 აქტიური შემთხვევიდან 4,360 ჰოსპიტალიზებულია.
👉 შედარებისთვის, მოსახლეობით 3-ჯერ დიდ ისრაელში, სადაც მოსახლეობის 64% აცრეს 248,192 აქტიური შემთხვევიდან მხოლოდ 968 ადამიანია ჰოსპიტალიზებული.
😌 დაბალი მიმართვიანობის გამო 2021 წელს 17,000 დოზა ვაქცინას გაუვიდა ვადა, რომელიც 8,500 ადამიანს 98%-ით დაიცავდა კოვიდით გარდაცვალებისგან.
წყარო: ფლანგვის დეტექტორი

დატოვეთ კომენტარი

კომენტარები

მსგავსი სიახლეები

Back to top button
Close