პოლიტიკა

,,სავსებით ნათელი გახდა, რა პოზიციაზე დგას თითქმის ყველა პაჭა-პუჭა პარტია”

,,რუსეთი უკვე ღიად ზეიმობს საქართველოს რუსეთის გუბერნიად გადაქცევას"

რაც დრო გადის, მით უფრო მეტად ვარ განცვიფრებული იმით, თუ როგორ შესძლო მიხეილ სააკაშვილმა იმ ცხრა წელიწადში ამდენის გაკეთება, როცა მის ირგვლივ ვიდექით ჩვენ, ქართველები – ბოღმიანი, შურიანი, მოღალატე, ამბიციური, “უფასო ფულის” მოტრფიალე, ქურდობას, მითვისებას, კორუფციას, ნეპოტიზმს მიჩვეული. აი, სასწაული მართლაც ეს არის.
არის ასეთი რუსული გამოთქმა – и один в поле воин. ამ კაცს სრულიად უკაცრიელ უდაბნოში უბრძოლია და თან რა თავდადებით უბრძოლია!
დღეს უკვე სავსებით ნათელი გახდა, რა პოზიციაზე დგას თითქმის ყველა პაჭა-პუჭა პარტია, რომლებსაც ამ ექვსი თვის მოლაპარაკებების პროცესში შეექმნათ წარმოდგენა, რომ მათ მხარდამჭერთა უზარმაზარი ჯარი ჰყავთ. ეგებ ჰყავთ კიდეც, არ ვიცი. ის კი ვიცი და ვხედავ, რომ ქვეყნის გადარჩენის იმედი ისევ და ისევ ნაციონალური მოძრაობაა, ნაციონალური მოძრაობის მხარდამჭერები, ისინი, რომლებიც მიუხედავად ყველაფრისა, ამ პარტიას უჭერენ მხარს. არ გატყდნენ და არ უღალატეს. ბარაქალა თქვენ, მეგობრებო!
როგორ მინდა, რომ იცოდეთ, როგორ მინდა თქვენი გამარჯვება. ასეთი საბედისწერო საათი ჩვენს ქვეყანას არასოდეს ჰქონია. ეს ნამდვილად ყოფნა-არყოფნის წუთი დგას. რუსეთი უკვე თითქმის ღიად ზეიმობს საქართველოს რუსეთის გუბერნიად გადაქცევას.
როგორ მინდა, ქართველები გამოფხიზლდნენ, დაინახონ ეს საფრთხე, დაინახონ, რომ სანამ ისინი ერთმანეთს ექიშპებიან და ძირს უთხრიან, ქვეყანა საერთოდ ქრება! ქრება როგორც სახელმწიფო, როგორც საქართველო. ქრება მისი მომავალიც და წარსულიც.
როგორ მინდა, ისე არ მოვკვდე, რომ ჩემი აოხრებული, გაძარცული, დაბეჩავებული, დაგლახავებული ქვეყანა აღმდგარი და განახლებული არ ვნახო.
დოდონა კიზირია, ამერიკაში მცხოვრები პროფესორი

დატოვეთ კომენტარი

კომენტარები

მსგავსი სიახლეები

Back to top button
Close