როგორ დაანგრიეს ქუთაისში სობოროს ტაძარი?

სოციალურ ქსელში ვრცელდება ქუთაისში, სობოროს ტაძრის ნგრევის საშინელი ფოტო. ეს ტაძარი ქუთაისის ცენტრალურ მოედანზე იდგა და სიდიდით თითქმის ბაგრატის ტაძარს უტოლდებოდა.  მისი მშენებლობა 1852 წელს დაიწყო და 1871 წელს დასრულდა. ტაძარი იმერეთის ეპისკოპოსმა, გაბრიელ ქიქოძემ აკურთხა. სობოროში განისვენებდა საქართველოს ეკლესიიის ავტოკეფალიის აღდგენისათვის მებრძოლი სასულიერო იერარქი, ქუთათელი მიტროპოლიტი ანტონ გიორგაძე, მიტროპოლიტი ბესარიონ დადიანი და სხვა სასულირო პირები..

  სურათზე ჩანს, თუ როგორ ანგრევდნენ და დაანგრიეს სობოროს ტაძარი კომუნისტებმა და კომკავშირლებმა 1923 წელს, საქართველოს გასაბჭოების შემდეგ. საქართველოს კომპარტიის ქუთაისის სამაზრო კომიტეტის პრეზიდიუმის დადგენილებაში ეწერა: „დაირღვეს საკათედრო ტაძარი (სობორო), მასალა გამოყენებულ იქნას ძმათა სასაფლაოს შემოსაღობად, იმ ადგილას კი გაფართოვდეს მოედანი და ტაძრის ადგილას დაიდგას ამხანაგ ლენინის ძეგლი”. დანგრეული ტაძრის ადგილას, ქუთაისის ცენტრში, დაიდგა ლენინის ძეგლი და მოედანს – ლენინის მოედანი ეწოდა..

წყარო: postalioni.com