როგორ გადავუღოთ ფოტო ავტომობილს, რომ გაიყიდოს?

ვიზუალური შთაბეჭდილება ყოველთვის ძალიან მნიშვნელოვანია, მეორადი ავტომობილების შემთხვევაში კი ყველაზე მთავარი რამაა – განცხადებაში მეტყველი ფოტოების განთავსება ინტერესს გააორმაგებს. ასე განსაჯეთ, თვით ამინდსაც კი აქვს მნიშვნელობა! არ გირჩევთ ფოტოების გადაღებას როგორც წვიმიან ამინდში, ასევე მზის ბრწყინვალე შუქზეც, რადგან საღებავი და შუშა მზეში მძლავრად ირეკლება.

ფოტოსესიისთვის ყველაზე ოპტიმალური მსუბუქად ღრუბლიანი ამინდია. ნეიტრალური ადგილი უნდა შეარჩიოთ, რათა ფოტოზე მხოლოდ ავტომობილმა მიიქციოს ყურადღება. აუცილებლად უნდა გადაიღოთ ყველა ის დეტალი, რაც გასაყიდი ავტომობილის პლუსად შეიძლება ჩაითვალოს.

უკანა პლანზე მშვიდი და არაგამომწვევი გარემო უნდა იყოს, ახალგარეცხილი მანქანა კი კადრში მთლიანად უნდა ჩასვათ! გადაუღეთ ოდნავ გვერდიდან და წინა საბურავები აუცილებლად იმ მხარის საპირისპირო მიმართულებით უნდა იყოს მიტრიალებული, რომელი მხრიდანაც ფოტოს იღებთ. არ გადაიღოთ შორიდან და არ გამოჩნდეს კადრში სხვა ავტომობილი.

სალონი სწორედ ისე უნდა იყოს გადაღებული, როგორც ზემოთ განთავსებულ ფოტოზე: ამ ფოტოს ყურებისას დაინტერესებული პიროვნება ფაქტობრივად საჭესთან ზის! სრულყოფილად ხედავს სუფთა კოკპიტს, ცენტრალურ კონსოლს და გადაცემათა კოლოფის ბერკეტის თავს. საჭე გასწორებული უნდა იყოს, გადამრთველები – სიმეტრიულად, ერთ პოზიციაში. დააყენეთ მანქანა თეთრი კედლის წინ, თუ დაგჭირდათ, ამოაძრეთ მძღოლის სავარძლის თავის მისაყრდნობი და გადაიღეთ უკანა სავარძლიდან.

ძრავა ავტომობილის გული და შესაბამისად, უმნიშვნელოვანესი დეტალია. შესაბამისად, ფოტოზე სრულყოფილად უნდა ჩანდეს, რა ხდება კაპოტქვეშ. უმჯობესია, ფოტო ზემოდან გადაიღოთ – მაგალითად, მიიდგით სკამი. გადაიღეთ ახლო ხედით და შეეცადეთ, არ ჩამოეჭრას არცერთი სანტიმეტრი.

მოხდენილი დეტალები ახლოდან და დიდი რაკურსით უნდა გადაიღოთ, რათა პოტენციურმა მყიდველმა კარგად დაინახოს ყველაფერი ის, რითიც ავტომობილი თავს იწონებს. თუ დისკებს იღებთ, გადაუღეთ წინა ხიდის რომელიმე მხარეს, ოღონდ, ოდნავ შეატრიალეთ. სასურველი დეტალი ყოველთვის თავიდან ბოლომდე უნდა ჩანდეს. არ გადაიღოთ ზემოდან!

წყარო autobild.ge

დატოვეთ კომენტარი

კომენტარები