როგორ არღვევს მომხმარებელთა უფლებებს – ნივთები გამოწერით

ონლაინ სივრცის საშოპინგოდ გამოყენება ერთი შეხედვით ძალიან კომფორტულია, მაგრამ რამდენად სანდოა ქართველ ონლაინ გამომწერებთან ურთიერთობა, თქვენ გადაწყვიტეთ ამ სტატიის წაკითხვის შემდეგ.
რამდენიმე კვირის წინ, ფეისბუქის გვერდზე _ „ნივთები ფასდაკლებით” ძალიან ლამაზი პიჯაკის ფოტომ მიიზიდა თვალი. მაშინვე მომინდა მისი შეძენა, რა თქმა უნდა, ფასი შევამოწმე და 35 ლარი შეადგენდა პიჯაკის ღირებულებას. ფასიც მომეწონა, ამიტომ მივწერე გვერდის „ნივთები გამოწერით”_ ის ადმინს და ვუთხარი, რომ ნივთის შეძენა მინდოდა. სასწრაფოდ გამომიგზავნეს ანგარიშის ნომერი, რომლზეც თანხა უნდა გადამერიცხა. ასეც მოვიქეცი. რამოდენიმე კვირის შემდეგ გამომიგზავნეს პიჯაკი, რომელსაც ფერების გარდა საერთო ფაქტობრივად არაფერი ჰქონდა სასურველ ნივთთან. თავდაპირველად გადავწყვიტე დამერეკა და მეთხოვა, რომ პიჯაკი უკან დაებრუნებინათ, მაგრამ ზარებზე არ მპასუხობდნენ, 20 _ჯერ მაინც ამაოდ ვცადე დარეკვა.
ამის შემდეგ გავუგზავნე ესემესი და ვუთხარი, რომ სამართლებრივი დავა დაიწყებოდა ჩვენს შორის. როგორც ჩანს ნათქვამმა შეაშინა და თავად გადმომირეკა… მართალია 35 ლარის დაკარგვა დიდ პრობლემას არ წარმოადგენდა, მაგრამ ამჯერად საქმე ეხებოდა პრინციპებს. თავდაპირველად ზრდილობიანად და კონსტრუქციულად ვცადე პრობლემის მოგვარება, მაგრამ ზედმეტად ხმამაღალი ტონით დამიბრუნა პასუხი. მითხრა, რომ მისი პრობლემა არ იყო, მე რა, ან როგორი ნივთი ჩამომივიდოდა. როდესაც თანხის უკან დაბრუნება ვთხოვე, დამცინავად მიპასუხა, დამელოდეო, მერე ტელეფონი გამითიშა და აღარ მიპასუხა.
დარწმუნებული ვარ, მე ერთადერთი არ ვარ, რომლის, როგორც მომხმარებლის უფლებებიც შეილახა. ამიტომ ყველას გირჩევთ, წინასწარ დარწმუნდეთ რას იწერთ, ან საერთოდ არ გამოიწეროთ ნივთები ფეისბუქის გვერდიდან _ „ნივთები ფასდაკლებით”.

წყარო: postalioni.com

დატოვეთ კომენტარი

კომენტარები