სიღნაღის ამბები

როგორია ცხოვრება ქართულ სიცილიაში და სიღნაღელი კორლეონეები  

მაღალჩინოსნის მდივანი ქალბატონით სამართალდამცავები დაინტერესდნენ

 ჩემ მიერ მომზადებული სტატიების შემდეგ, რომლებიც სიღნაღის მუნიციპალიტეტის მაღალჩინოსნების მიერ მიწების გასხვისებას ეხებოდა, კიდევ ერთი წყარო დამიკავშირდა და მითხრა, ქალბატონო ნელი, სიმართლეს კი წერთ, მაგრამ თუ თქვენ კონკრეტული პიროვნების გვარს მეტყვით, რომელსაც ადგილობრივი ხელისუფლება მიწებს უფასოდ უფორმებს და შემდგომ აყიდვინებს, ვიტყვი, ძალიან მაგარი ჟურნალისტი ხართო. დავუსახელე რამდენიმე ადგილობრივი მაღალჩინოსანი, მაგრამ ვერ ,,გავარტყი“, რის შემდგომაც წყარომ მეტად საინტერესო ამბავი მომიყვა.

ანტიკორუფციული სამსახური დაინტერესებულია სიღნაღის მერის ყოფილი მდივნით, ქალბატონით, რომელიც მიწების გასხვისების საქმის გასკდომამდე რამდენიმე თვით ადრე დააწინაურეს და მანამდე უშტატოდ მომუშავე შტატში ჩასვეს _ მერიის მატერიალურ-ტექნიკური სამსახურის პასუხისმგებელ პირად დანიშნეს. წყაროს თქმით, ამით ის დააჯილდოვეს, რადგან წლების განმავლობაში  სიღნაღის ხელისუფლების მაღალჩინოსნებს ამავე მუნიციპალიტეტში უკანონოდ მითვისებული მიწების ყიდვა-გაყიდვაში ეხმარებოდათ.

მოკლედ, ამავე წყაროს ინფომაციით, სქემა ასეთი ყოფილა: სარფიან მიწას უფასოდ უფორმებდნენ ამ ადამიანს, თითქოს ოდესღაც ამ მიწაზე მის ბებიას ან ბაბუას მწვანილი მოჰყავდა, ვენახი ჰქონდა გაშენებული და ა.შ. რამდენიმე თვის შემდეგ კი უკვე დაკანონებულ ტერიტორიას სარფიანად ყიდდნენ. ამ ქალბატონმა პოლიციის ერთ-ერთ ყოფილ თანამშრომელსაც შესთავაზა ასეთი მიწა 80 ათას დოლარად სარესტორნედ თუ სასტუმროს ასაშენებლად, მაგრამ მან ვერ იყიდა და შემდეგ სხვაზე გაყიდეს. ასეთი ფაქტები ბევრი ყოფილა და მსგავსი სქემით აღნიშნულ საქმეში ჩართულ სიღნაღის მაღალჩინოსნებს უამრავი ფულიც უშოვიათ.

როგორც გვითხრეს, მიწებით ფულაობაში ჩათრეულ თუ თავად ჩაყოლილ ქალბატონს ,,ზემოთაც“ ჰყოლია ძლიერი პატრონი-ახლობელი _  სააკაშვილის დაცვის ყოფილი წევრი, რომელიც ახლა ერთ-ერთი მაღალჩინოსნის დაცვის სამსახურში მუშაობს. მოკლედ, ამ ქალის სახელზე სიღნაღში უამრავი მიწის ნაკვეთი გაუფორმებიათ, აი, რიგითი ადამიანებისთვის კი ამ მუნიციპალიტეტში ერთი გოჯი მიწა არ მოიძებნება, თავი ადამიანად და დაცულად რომ იგრძნონ.

რამდენიმე თვის წინ მოვამზადე სიუჟეტი ცრემლებით მოტირალ კაცზე, ნოდარ ფოლადაშვილზე, რომელსაც სოფელ საქობოში ბანკმა სახლი წაართვა.  ის ხელისუფლებას დიდი ხანია სთხოვს, აჩუქოს მიწა, სადაც თავისი ხელით ჩადგამს ქოხს და საკვებსაც თავად მოიპოვებს. მას, როგორც უსახლკაროს, წნორის სასტუმროში ღამით გასაჩერებელი ადგილი შესთავაზეს, მაგრამ მიწის ნაკვეთის უფასოდ გადაცემაზე სასტიკი უარი განუცხადეს _  სად არის უფასო მიწებიო.

რა თქმა უნდა, რიგითი მოქალაქეებისთვის უფასო არც მიწაა და არც წყალი, მაგრამ თუ გავლენიანი ადამიანების ნდობას მოიპოვებ,  მათთან ერთად გაისვრი ხელს დანაშაულში და ,,ზემოთაც“ გამონახავ პატრონს, ყველაფერი უხვად მოგეცემა.

როგორც შევიტყეთ, სიღნაღში მიწების გასხვისების მაქინაციური სქემით ჩინოსნების დანაშაულებრივი ჯგუფი მუშაობს. ზოგიერთი უკვე დაიბარეს ანტიკორუფციულ სამსახურში დაკითხვაზე და სამართალდამცავებისგან უწყებებს სხვებიც ელოდებიან. მუნიციპალიტეტის მოსახლეობას იმედი აქვს, რომ სამართალდამცავები სამართლიანად გამოიკვლევენ ყველაფერს და მიწების ყიდვა-გაყიდვით გამდიდრებულ ადამიანებს საკადრის პასუხს გასცემენ.

ერთმა ადვოკატმა მეგობარმა ამას წინათ მითხრა, სიღნაღი პატარა სიცილიურ ქალაქად იქცა, სადაც ადგილობრივ მუნიციპალიტეტში ტიპური მაფიოზები არიან დასაქმებულნი.  მუნიციპალიტეტში ინფორმაციული სიბნელეცაა და შიშიც, რადგან ,,უკვდავი მაფია“ როდის რას მოიმოქმედებს, არავინ უწყისო.

ჰოდა, ქართულ სიცილიაში უცნაური შუქი გამოჩნდა და ინფორმაციებიც დიდი ოდენობით ჟონავს. ახლა მთავარია, სამართალდმცავი უწყება კახელ დონ კორლეონეებს სათანადოდ მოექცეს და მძიმე დანაშაული, რომელიც სამშობლოს ღალატის ტოლფასია, არ შეარჩინოს.

ნელი ვარდიაშვილი

დატოვეთ კომენტარი

კომენტარები

მსგავსი სიახლეები

Back to top button
Close