საზოგადოება

“რაც იყო და არის სასამართლო ხელისუფლებაში უნდა დასრულდეს, უსამართლობა კმარა!”

ადვოკატ ემზარ პაქსაძის „ბრალდებებს“ ადვოკატთა ასოციაციის თავმჯდომარის_ ზაზა ხატიაშვილის მიმართ, ადვოკატების მხრიდან მძაფრი გამოხმაურება მოჰყვა. ადვოკატი და უფლებადამცველი მამუკა ნოზაძე „ფოსტალიონს“ ექსკლუზიურად ესაუბრა. მან გვითხრა, რომ პაქსაძე იმ ჯგუფებმა „დაიქირავეს“, რომელთა ადგილიც სამართლიან სასამართლოში არ არის. ზაზა ხატიაშვილი და სხვა უფლებადამცველები მათ პარპაშს ამ სისტებაში ვებრძვით. გვინდა, რომ საქართველოში სამართლიანი მართლმსაჯულება გვქონდესო.

მამუკა ნოზაძე:

_ ზაზა  ხატიაშვილის ბრძოლა სასამართლო ხელისუფლებაში არსებული დამნაშავე სინდიკატის წევრებისა და იმ კონკრეტული მოსამართლეების მიმართ, რომლებიც წლებია დანაშაულს  ჩადიოდნენ, როგორც ვხედავთ, მავანთ ყელში გაეჩხირათ და მის წინააღმდეგ ვითომ მაკომპრომენტირებელი, სინამდვილეში კი უსუსური  ბრალდებები გაავრცელეს. ადვოკათა ასოციაციის წევრმა, ვინმე ემზარ პაქსაძემ  გუშინ ჩაატარა პრესკონფერენცია ადვოკატთა ასოციაციის თავმჯდომარის წინააღმდეგ და მას წაუყენა სასაცილო ბრალდებები. ბუნებრივია, პაქსაძისნაირი ადამიანები, რომელთა ავტორიტეტი არათუ საზოგადოებაში, არამედ  ადვოკატათა კორპუსშიც არ აქვთ, ყოველთვის შეეცდებიან აბსურდული და  არასერიოზული  მოსაზრებები გაავრცელონ, მაგრამ დარწმუნებული ვარ, ეს ვერ შეაშინებს ვერც ზაზა  ხატიაშვილს და ვერც სხვა სამართლიან უფლებადამცველს. ისინი კვლავ  გააგრძელებენ  ბრძოლას, რათა გამოსწორდეს ბევრი რამ  სასამართლო ხელისუფლებაში. ფაქტი ის არის, რომ მოსამართლეები შედიან გარიგებებში ერთმანეთთან, რათა დაფარონ  საკუთარი  დანაშაული, უზრუნველყოფილი იყოს  მათი ხელშეუხებლობა. არცერთ ქვეყანაში არ ხდება ის, რაც ხდება საქართველოში. სასამართლო ხელისუფლება უპირისპირდება საზოგადოებას და  ამას მიზანმიმართულად, დემონტრაციულად,  ყოველდღიურად  აკეთებს. ამ პროცესს კი მხოლოდ ზაზა  ხატიაშვილი, რამდენიმე უფლებადამცველი და არასამთავრობო ორგანიზაცია  უწევს  წინააღმდეგობას.

ემზარ პაქსაძის ეს გამოხტომა, პირველი არ  არის. ამას წინათ, იუსტიციის უმაღლესმა  საბჭომ, სასტუმრო „რედისონში“ შეხვედრა დაგეგმა არასამთავრობო ორგანიზაციებთან, მაგრამ არავინ მივიდა. თუმცა იქ გამოჩნდა ვინმე ემზარ პაქსაძე, რომელმაც განაცხადა, რომ ყველა ადვოკატი არ ეთანხმება ზაზა ხატიაშვილს მოსამართლეთა კორპუსის საკითხთან მიმართებაში. მან პირფერობა დაუწყო იუსტიციის უმაღლეს საბჭოს და იმ მოსამართლეებს, რომლებიც მხილებულნი არიან უკანონობებში.

ადვოკატთა ასოციაცია არის დიდი ორგანიზაცია და  ბუნებრივია, ყველა საკითხზე არსებობს სხვადასხვა  აზრი, რაც გასაკვირი ნამდვილად არ არის. მოსამართლეთა კორპუსისგან, ასევე საბჭოთა და ჩრდილოეთ კორეისგან განსხვავებით, აქ არ არის დახავსებული აზროვნება, მაგრამ  ადვოკატთა კორპუსის დიდ ნაწილს მართლაც გვაქვს ასეთი შეხედულება და ვამბობთ, რომ მოსამართლეთა უმრავლესობას ჩადენილი აქვს კრიმინალი და ამ სისტებაში მათი ადგილი არ არის, ამიტომ სასწრაფოდ უნდა განხორციელდეს  საკადრო ცვლილებები. ეს განწყობა დაფუძნებულია რეალობაზე, აქედან გამომდინარე, ჩვენგან განსხვავებული აზრი ექნებათ მხოლოდ მათ, ვინც შეკრულია და თანამშრომლობს ასეთ მოსამართლეებთან.

საოცარია ის, რომ ემზარ პაქსაძემ, რომელიც ყოფილი პოლიციელია და ამ ხიბლიდან ვერ  გამოსულა, ზაზა ხატიაშვილს ე.წ. „ბრალდებები“  პოლიციური სტილით  წაუყენა. ანუ ისე, რომ  არც კი გაარკვია სიმართლე. მერე რა, რომ რამდენიმე თვე ზაზა  ხატიაშვილის შვილმა ისწავლა საფრანგეთში? ამაში გასაკვირი რა არის? თუ ვინმეს რაიმე სხვა მტკიცებულება აქვს, უნდა დადოს და თუ არ აქვს, უნდა შეწყდეს ასეთი ქაჯური ბრალდებები. არ შეიძლება, ადვოკატმა ჭორები ავრცელოს მტკიცებულებებისა და  არგუმენტების გარეშე, რასაც აკეთებს ემზარ  პაქსაძე. ყველამ კარგად იცის, რომ ეს ადამიანი არის ძმაკაცი იუსტიციის უმაღლესი საბჭოს წევრის, კახა სოფრომაძის, რომელიც წარმოადგენს ლევან მურუსიძის კლანს. ამით მგონი ყველაფერია ნათქვამი და გასაგებიც, თუ რატომ იკადრა პაქსაძემ ასეთი საქციელი.

ადვოკატთა  კორპუსი არის ერთიანი და პრინციპული რიგი საკითხების  მიმართ. უპირველესად კი სამართლიან სასამართლოსთან მიმართებაში. ჩვენი მიზანია მხოლოდ ის, რომ ქვეყანას როგორმე ეღირსოს დამოუკიდებელი სასამართლო. ეს იყო ხალხის მოთხოვნაც და დაკვეთაც 2012 წელს, როცა ახალი ხელისუფლება მოდიოდა. კიდევ ჩატარდება არჩევნები და საზოგადოება აუცილებლად აჩვენებს ყველას საკუთარ ძალას. აუცილებლად შეახსენებს მატყუარა ხელისუფლებას, რომ რაც  იყო და არის  სასამართლო ხელისუფლებაში უნდა დასრულდეს, უსამართლობა კმარა!“.

წყარო: postalioni.com

დატოვეთ კომენტარი

კომენტარები

მსგავსი სიახლეები

Leave a Reply

Your email address will not be published.

Back to top button
Close