საზოგადოება

რატომ ერიდებიან მარჯვენასაჭიანი ავტომობილების შეძენას საქართველოში?

როგორც ,,ფოსტალიონისთვის,, გახდა ცნობილი, მარჯვენასაჭიან ავტომობილებზე ახალი რეგულაციების ამოქმედება ახალი წლიდან იგეგმება. სახელდება ორი სავარაუდო თარიღი – 1 იანვარი და 1 მარტი. ამის ფონზე, იმპორტიორები ცდილობენ მიმდინარე წელსვე მოასწრონ ავტომობილების იმპორტი, რადგან ვარაუდობენ, რომ მარჯვენასაჭიანი და საჭეგადატანილი მანქანების რეგისტრაციის აკრძალვა მანქანების გაძვირებას და მათზე მოთხოვნის შემცირებას გამოიწვევს. მარჯვენასაჭიანი მანქანების აკრძალვაზე საუბარი საქართველოში 2015 წლის ბოლოს დაიწყო, როდესაც პარლამენტში ახალი კანონპროექტი შევიდა. შინაგან საქმეთა სამინისტროს მიერ ინიცირებული კანონპროექტი მარჯვენასაჭიანი და საჭეგადატანილი მანქანების რეგისტრაციის აკრძალვის სავარაუდო თარიღად 2017 წლის 1 იანვარს ასახელებდა. კანონპროექტის ავტორები დღესაც იმედოვნებენ, რომ მარჯვენასაჭიანი ავტომობილების რეგისტრაციის აკრძალვა მოძრაობას განტვირთავს და უსაფრთხოებას ხელს შეუწყობს.
„მთელ საქართველოში ინფრასტრუქტურა მარცხენასაჭიან მანქანებზე მოძრაობისთვის არის დაგეგმილი და ამ დროს მარჯვენასაჭიანი ავტომობილების რაოდენობა არ უნდა იზრდებოდეს“, – ასეთი გახლდათ კანონპროექტის ავტორთა არგუმენტები. დღესდღეობით მარჯვენასაჭიანი ავტომობილების რეგისტრაციის აკრძალვის საკითხი ჯერ კიდევ გაურკვეველია.  „ეკოტრანსპორტცენტრის“ ხელმძღვანელი ვასილ ურუშაძის განცხადებით, ალბათ ამ საკითხს ახალი პარლამენტი გადაწყვეტს.
„აღნიშნული კანონპროექტი პარლამენტში 2015 წლის დეკემბერში შევიდა და მისი განხილვა მაშინვე დაიწყო. კანონპროექტის პირველად ვერსიაში იყო ჩანაწერი, რომ მარჯვენასაჭიანი ავტომობილების აკრძალვა 2016 წლის 1 მარტს უნდა მომხდარიყო, მაგრამ არასამთავრობო სექტორის წარმომადგენლებმა, ვინც მივიჩნევდით, რომ ეს უსამართლო გადაწყვეტილება იყო, დიდი წინააღმდეგობა გავუწიეთ. ჩვენ ახლაც ვამბობთ, რომ მარჯვენასაჭიანი ავტომობილები არანაირ კავშირში არ არის ეკოლოგიასთან და მოძრაობის უსაფრთხოებასთან, არც იმ მოტივებთან, რაზეც შსს ამახვილებს ყურადღებას და რითაც ინიციატორები ცდილობენ თავიანთი შეხედულებების გამართლებას. ყველა არგუმენტი, რომლითაც შსს მარჯვენასაჭიანი ავტომობლების გაუქმებას ამართლებს, გაბათილდა. მაშ, რატომ უნდა აიკრძალოს მარჯვენასაჭიანი მანქანები? – ამ შეკითხვაზე პასუხი მხოლოდ ხელისუფლების კულუარებშია, ალბათ ვინმეს საკუთარი ბიზნესინტერესები ამოძრავებს, სხვა ოფიციალური არგუმენტი, თუ რატომ უნდა აიკრძალოს მარჯვენასაჭიანი ავტომობილები, არ არსებობს. სხვათა შორის, საზოგადოების პროტესტის შემდეგ ამ კანონპროექტზე მსჯელობა შეწყდა, მას პარლამენტში აღარც განიხილავდნენ, რადგან ბევრი მოწინააღმდეგე ჰყავდა და როგორც ჩანს, მთავრობამ გადაწყვიტა არჩევნების დასრულებამდე თავი შეეკავებინა“,
– აღნიშნავს ვასილ ურუშაძე.
ურუშაძის თქმით, დღევანდელი რეალობა ასეთია – კანონპროექტი უკვე პარლამენტშია და ის ახალი მოწვევის პარლამენტმა უნდა განიხილოს, ამიტომ მას საკონსტიტუციო უმრავლესობა მხარს დაუჭერს.

საქმე იმაშია, რომ ეს მდგომარეობა განსაკუთრებით იმოქმედებს ავტოდილერებზე. წინათ მარჯვენასაჭიანი ავტომობილები საკმაოდ კარგად იყიდებოდა, ახლა კი, კლიენტები ამ მანქანებს ნაკლებად ეტანებიან. ეს მანქანები მხოლოდ საქართველოში იყიდება, რადგან მათი რეგისტრაცია მეზობელ ქვეყნებში დაშვებული არ არის, ამიტომ მათ ვერც აზერბაიჯანში გაყიდიან,ვერც უკრაინაში და ვერც რუსეთში, რადგან მათ ქვეყნებში ასეთ მანქანებს არ აფორმებენ, თუნდაც მძღოლმა საჭე მარცხნივ გადაიტანოს. შესაბამისად, ამ ავტომობილებს ძირითადად ქართველები ყიდულობდნენ, რადგან მათი ფასი მარცხენასაჭიანი მანქანებთან შედარებით იაფი არის: 3500 დოლარად რომ შეიძენთ ნორმალურ მარჯვენასაჭიან მანქანას, 5 ათასი მარცხენასაჭიანში უნდა გადაიხადოთ. ამ ეტაპზე მარჯვენასაჭიანების შეძენას უკვე ჩვენი ქვეყნის მოქალაქეებიც ერიდებიან.

 

წყარო: postalioni.com

დატოვეთ კომენტარი

კომენტარები

მსგავსი სიახლეები

Leave a Reply

Your email address will not be published.

Back to top button
Close