პროკურორის განმარტებით, ბრალდების მხარემ გურამ რჩეულიშვილისთვის გირაოს შეფარდება და პასპორტის ჩამორთმევა იმის გამო მოითხოვა, რომ ბრალდებული მართლმსაჯულებას არ მიემალოს. ამის შესახებ „ცენტრ პოინტის“ საქმის „ბათუმის მაგნოლიას“ ეპიზოდზე პროკურორმა დავით გუმბერიძემ დღევანდელი პროცესის დასრულების შემდეგ განაცხადა.
როგორც პროკურორმა განმარტა, ჯერ კიდევ არსებობს იმის საფრთხეები, რომ ბრალდებული გურამ რჩეულიშვილი მართლმსაჯულებას მიემალება. თუმცა, პროკურატურა მიიჩნევს, რომ მისთვის შეფარდებული გირაო და გამოყენებული სხვა ღონისძიებები იქნება ბერკეტი, რათა მსგავს ფაქტს ადგილი არ ჰქონდეს.
„ჩვენ დავაყენეთ შუამდგომლობა გირაოს გამოყენების თაობაზე და ასევე პასპორტის ჩამორთმევის შესახებ. ეს იქნება ბერკეტი იმის უზრუნველსაყოფად, რომ ბრალდებული არ მიემალება მართლმსაჯულებას. მიგვაჩნია, რომ აღნიშნული საქმის არსებითი განხილვა მალე დასრულდება და მიუხედავად ადვოკატების მცდელობისა, რომ საქმე მაქსიმალურად გაჭიანურებულიყო, გურამ რჩეულიშვილი დაბრუნდება იქ, სადაც პატიმრობის ცხრათვიან ვადას იხდიდა“, – განაცხადა დავით გუმბერიძემ.
თბილისის საქალაქო სასამართლოს გადაწყვეტილებით, გურამ რჩეულიშვილს აღკვეთის ღონისძიების სახით შეფარდებული პატიმრობა 30 000-ლარიანი გირაოთი შეეცვალა, მას ასევე ჩამოერთვა პირადობის მოწმობა და საქართველოს პასპორტი. სასამართლომ გირაოს თანხის გადახდის ვადად ათი დღე განსაზღვრა.
interpressnews.ge
