საზოგადოება

პარანორმალური მოვლენები ბორჯომ-ხარაგაულში _ ლომის მთის საიდუმლო და ქურუმთა წერილი

ეს ამბავი 1998 წლის ოქტომბრის დასაწყისში მოხდა. პარანორმალური მოვლენების შემსწავლელმა ჯგუფმა გადაწყვიტა ბორჯომ-ხარაგაულის საზღვართან ახლოს, ეგრეთ წოდებული, „ლომის მთა“ მოენახულებინა. გადმოცემის თანახმად, რასაც ადგილობრივი მოსახლეობაც ადასტურებს, ამ ტერიტორიაზე უამრავი ანომალიური მოვლენა ხდება, ეს ადგილი ენერგეტიკულად ძალიან ძლიერია. არსებობს მოსაზრება, რომ ლომის მთიდან სხვა სამყაროსთან დაკავშირებაც შეიძლება და რომ ეს ტერიტორია ერთგვარ კარიბჭეს წარმოადგენს. ლომის მთაზე მომხდარ უჩვეულო ამბავს ჩვენი რესპონდენტი, პარანორმალურიმოვლენების შემსწავლელი ჯგუფის ერთ-ერთი წევრი გვიამბობს.
_ ქალბატონო თამარ, თავად რატომ არ გაემგზავრეთ ჯგუფის წევრებთან ერთად?
_ მე ადრეული ასაკიდან დავინტერესდი პარანორმალური მოვლენების შესწავლით და გარკვეული ინფორმაციაც შევკრიბე. ვგრძნობდი რომ ეს ადამიანები (მათ შორის ჩემი მეუღლეც იყო) ფსიქოლოგიურად და სულიერად მზად არ იყვნენ ასეთი ექსპედიციის მოსაწყობად. როცა შევეცადე ამაში დამერწმუნებინა, თქვეს, რომ შეპყრობილი ვიყავი, ეშმაკი დამეპატრონა და როცა უკან დაბრუნდებოდნენ აუცილებლად იზრუნებდნენ ჩემს გადარჩენაზე (იცინის).
_ ფსიქოლოგიურ მზადყოფნაში რას გულისხმობთ?
_ ფანატიზმი ყველა საქმეში დამღუპველია, მათ ჩათვალეს, რომ რჩეულები იყვნენ, სწორედ ისინი უპასუხებდნენ ასწლეულების განმავლობაში პასუხგაუცემელ კითხვებს, თუმცა მალევე დარწმუნდნენ, რომ ცდებოდნენ.
ოქტომბრის დასაწყისში თბილისიდან ხუთკაციანი ჯგუფი გაემგზავრა კარვებითა და სათანადო აღჭურვილობით. როცა დანიშნულების ადგილს მიუახლოვდნენ, უკვე ბინდდებოდა. ლომის მთა დასახლებული ადგილიდან რამდენიმე კილომეტრითაა დაშორებული. როცა მთისკენ მიმავალ გზას გაუყვნენ, ჯგუფის ყველა წევრმა ოთხივე მხარეს გამოსახული ჯვარცმა შენიშნა და საოცარი სიმსუბუქე იგრძნეს. მწვერვალამდე გზა ისე აუვლიათ, თითქოს ორი-სამი წუთი მიდიოდნენ _ რაღაც მომენტში დროის შეგრძნება გაქრაო, ჰყვებოდნენ უკან დაბრუნებულები.
ლომის მთაზე კარვები გაშალეს და მოსასვენებლად დაწვნენ. ყველა ახალი ჩაძინებული იყო, როცა ექსპედიციის ერთ-ერთი წევრის, ნელის შემზარავი კივილი მოესმათ, ყველა მისი კარვისკენ გაიქცა, ქალს თმა ყალყზე ედგა და შეშინებული თვალებს აქეთ-იქით აცეცებდა. როცა ცოტა დამშვიდდა, ჯგუფის წევრებს უთხრა, რომ თეთრებში გამოწყობილი პირტიტველა ბიჭი ნახა, ცეცხლოვანი თვალებით, მას უთქვამს, დროებით მოკვდები და არ შეგეშინდესო. ჯგუფის წევრებმა ჩათვალეს, რომ ნელი ემოციურად გადაიღალა და რაღაც მოეჩვენა, თუმცა მეორე დღეს ქალი ძალიან დაძაბული და შეშინებული იყო. იმ ტერიტორიაზე, სადაც კარვები გაშალეს, კურდღლებზე მონადირეები გამოჩნდნენ, უცნობი მამაკაცები ჯგუფის წევრებს გამოელაპარაკნენ, მათ ნანადირევი სტუმრებს დაუთმეს და იქვე სუფრაც გაიშალა. როგორც ნელი იხსენებს, რაღაც მომენტში იგრძნო, რომ გვერდიდან ვიღაცამ ხელი ჰკრა და უსიტყვოდ შეახსენა, რომ უნდა მომკვდარიყო, ქალი ფეხზე წამოხტა და მეგობრებს გაგონილის შესახებ მოუყვა. მისი სიტყვები შემთხვევით ერთ-ერთმა მონადირემ გაიგონა, ის უკვე ნასვამი იყო და ჩხუბი და შეხლა-შემოხლა დაიწყო.
_ რაზე ჩხუბობდნენ?
_ თბილისიდან ჩამოხვედით და სოფლელებს გვაშაყირებთო. მოულოდნელად კოცონი, რომლის გარშემოც ისინი ისხდნენ, თავისით ჩაქრა, მონადირეები ცოტა შეშფოთდნენ, რადგან ფოთოლიც არ ირხეოდა, მაგრამ კამათი მაინც გაგრძელდა, სანამ ყველამ ხმამაღალი შხუილის ხმა არ გაიგონა, თითქოს მათ თავზე რაღაცამ გადაიფრინა და უცებ ცეცხლი თავისით აგიზგიზდა. მონადირეები მაშინ კი მიხვდნენ, რომ რაღაც უჩვეულო ხდებოდა და გაიქცნენ, ნელის სწორედ ამ დროს დაემართა შეტევა, დაიკრუნჩხა, წაიქცა, მიცვალებულივით გაშეშდა, სხეული გაყინული ჰქონდა და არაფერზე რეაგირებდა.
ჯგუფის წევრები მთელი ღამე ლოცვებს უკითხავდნენ. ყველას ეგონა, რომ ეს მისი აღსასრული იყო, თუმცა გამთენიისას ქალი ნელ-ნელა გონზე მოვიდა. მან კალამი და ფურცელი მოითხოვა. თავდახრილი რაღაც ჩანაწერს აკეთებდა, თუმცა მისი შინაარსი მხოლოდ წერის მომენტში ახსოვდა. დასვავდა თუ არა წერტილს საკუთარი ნაწერის წაკითხვა აღარ შეეძლო.
_ რა ეწერა ფურცელზე?
_ მოგვიანებით, როცა ნელის ხელნაწერი თბილისში ჩამოიტანეს, გაირკვა რომ ეს იყო ძველი იბერიული დამწერლობის ანბანთან არსებული გასაიდუმლოებული ქურუმთა ასო-ნიშნები, როგორც ჩანს, ჩანაწერის შინაარსის გაგება ამ ჯგუფისთვის საჭირო არ იყო. ის ნელიმ სპეციალისტებს გადასცა და გასაიდუმლოებული შინაარსის გაშიფვრაზე დღემდე რამდენიმე სპეციალისტი მუშაობს.
რაც შეეხება ექსპედიციის წევრებს, ლომის მთიდან ჩამოსვლის შემდეგ ყველა რადიკალურად შეიცვალა, სამწუხაროდ, უარესობისკენ. ნელი ქმარს გაშორდა და ამ ჯგუფის ერთ-ერთი წევრისგან, ირაკლისგან, შვილის გაჩენის სურვილი დაებადა. თუმცა ირაკლი ერთ დღეს შინიდან გავიდა და მისი გზა-კვალი დღემდე არავინ იცის. ექსპედიციის კიდევ ერთი წევრი გალოთდა, მე და ჩემი ქმარიც დავშორდით. ჯგუფის მეხუთე წევრი დღემდე ირწმუნება, რომ მსოფლიოს გადარჩენის მისია უნდა იტვირთოს. სამწუხაროდ, თითოეული მათგანის ქცევაში ფსიქიკური აშლილობის ნიშნები იგრძნობა. ვერც ერთ მათგანს დღემდე ვერ უპოვია საკუთარი თავი, გარდა ნიკასი, მან სმას თავი დაანება, შეძლო ეკლესიაში დაბრუნებულიყო და დღეს ტაძარში გალობს.
_ თქვენი აზრით, რა მოხდა ლომის მთაზე?
_ ზუსტად არავინ იცის, როცა გასაიდუმლოებული ასო-ნიშნებით დაწერილი წერილი გაიშიფრება, ნაწილობრივ მაშინ გავარკვევთ, თუმცა ერთი ფაქტია, როცა დიდ საიდუმლოს გინდა ეზიარო, გულით სუფთა, ხელდასმული უნდა იყო. რაც მთავარია, მავნე აზრებისა და ქმედებისგან განწმენდილი. ჩემი მეგობრები კი ამისთვის მზად არ იყვნენ

წყარო: bb.ge

დატოვეთ კომენტარი

კომენტარები

მსგავსი სიახლეები

Leave a Reply

Your email address will not be published.

Back to top button
Close