საზოგადოება

,,ორჯერ შევხვდი გახარიას და პირდაპირ ვუთხარი ის, რისი გაკეთების უფლებასაც მას არ მისცემდნენ…”

,,უკვე ექსპრემიერ გახარიას შეეძლო კრიტიკული აზრის მოსმენა და ნაწილობრივ გათვალისწინებაც"

ვინც მიცნობს, იცის, რომ არ ვარ პოლიტიკურად მოტივირებული. ძველებიც გამიკრიტიკებია და ახლებიც. ქვეყნის ინტერესები კი ყველაზე წინ დგას.
ამიტომ გახარიას, მისივე ინიციატივით, ორჯერ შევხვდი. ბევრ სხვა საკითხთან ერთად ვისაუბრეთ უსაფრთხოების საბჭოს შექმნის საკითხზეც, რასაც ის აპირებდა.
მე, როგორც საბჭოს აპარატის ყოფილი თანამშრომელი, ვესაუბრე იმ პრობლემებსა და გამოწვევებზე, რის წინაშეც ის რეალურად დადგებოდა.
პირდაპირ ვუთხარი ისიც, რისი გაკეთების საშუალებასაც მას არ მისცემდნენ.
მან მიპასუხა, რომ პრობლემა არ ექნებოდა. სამწუხაროდ, მართალი აღვმოვჩნდი. მას ქვეყნის მართვის კი არა, ერთი მინისტრის დანიშვნის უფლებაც კი არ მისცეს. ამიტომ, ადამიანურადაც და პოლიტიკურადაც სრულიად გასაგებია, რომ მას არ სურდა პასუხისმგებლობის აღება იმ სისხლისღვრაზე, რაც მელიას დაკავებას შეიძლება მოჰყოლოდა.
ვიღაცას შეიძლება მოსწონდეს გახარია ან არ მოსწონდეს. პირადად მე, რასაც მასში ვაფასებ, არის ის, რომ მას შეეძლო არამხოლოდ განსხვავებული და კრიტიკული აზრის მოსმენა, არამედ სრულად თუ არა, ნაწილობრივ მაინც, მისი გათვალისწინება.
რეალურად, პრობლემა პიროვნულად მელიაში კი არაა, არამედ იმაში, რომ ოპოზიციური პარტიის ლიდერს იჭერ და ეს ქმედება პოლიტიკურად მოტივირებულია. თან ღიად ამტკიცებ, რომ სასამართლო დამოუკიდებელი არაა.
ასეთ ფონზე ხელისუფლების პროდასავლურ კურსზე საუბარი უკვე სასაცილოა.
დასავლეთის პოზიციის სანახავად კი უპირველეს ყოვლისა, უნდა დავაკვირდეთ ბალტიის ქვეყნებისა და მისი წარმომადგენლების პოზიციებს – ისტორიული გამოცდილების გამო მათ ყველაზე კარგად იციან იმ “ტრიუკების” შესახებ, რაც აქ შეიძლება მოხდეს.
ჩვენი კი, ამ ქვეყნის რიგითი მოქალაქეების, ვალია, დავიცვათ ეს ქვეყანა პრორუსი რეტროგრადებისგან!
ისტორიის ჩარხს ვერავინ შემოაბრუნებს. ამ ქვეყანას მტერს არ ჩავაბარებთ!
ზურა ბატიაშვილი, პროფესორი

დატოვეთ კომენტარი

კომენტარები

მსგავსი სიახლეები

Back to top button
Close