ნაზარეთში იესო ქრისტეს სახლი აღმოაჩინეს?

04/19/2016

435

ნაზარეთში იკვლევენ სახლს, რომელიც საუკუნეების მანძილზე იოსების სახლად იყო მიჩნეული.
არქეოლოგიურ „სენსაციას“ საფუძვლად ინგლისელი მეცნიერის, რედინგის უნივერსიტეტის პროფესორის, კენ დარკის სტატია დაედო, რომელშიც მან ისაუბრა გათხრების შესახებ შენობაში, რომელშიც, შესაძლოა, იესომ თავისი ბავშვობის წლები გაატრა.
საიდან გაჩნდა ასეთი ვარაუდი?
უკვე ადრექრისტიანულ ხანაში იყო მიჩნეული, რომ ეს სახლი იოსებს ეკუთვნოდა. ამ სახლის ნანგრევებზე იოსების სახელობის ეკლესია ააგეს, მაგრამ 8 საუკუნეში იგი მუსულმანებმა დაანგრიეს.
მე-12 საუკუნეში ეკლესია ამჯერად, ჯვაროსნებმა აღადგინეს, რადგან მათაც სწამდათ, რომ ამ ადგილას იესო ქრისტეს ბავშვობის სახლი იდგა. მე-13 საუკუნეში ეკლესია კვლავ დაანგრიეს. მისი აღდგენა მხოლოდ მე-17 საუკუნეში მოხერხდა.
მე-19 საუკუნის 80-იან წლებში ნაზარეთის მონასტრის მონაზვნებმა საკუთარი ძალებით ჩაატარეს გათხრები, ხოლო 1936 წელს მღვდელმა ჰენრი სენესმა დაწვრილებით აღწერა მათი აღმოჩენა.
2006 წელს მონაზვნებმა მეცნიერებს გათხრების წარმოებისა და საარქივო მასალებზე წვდომის უფლება მისცეს.გათხრების შედეგად მართლაც აღმოჩენილ იქნა სახლი, რომელიც რამდენიმე ოთახისგან შედგებოდა. აქვე ნაპოვნი თიხის ჭურჭლის ნატეხების მეშვეობით, მეცნიერებმა ნაგებობა ჩვ. წ. 1 საუკუნით დაათარიღეს.
მაგრამ მეცნიერები მაინც ფრთხილობენ დასკვნები გააკეთონ. „არის თუ არა ეს ნაგებობა სახლი, რომელშიც იესო ქრისტე გაიზარდა? არქეოლოგიურ მასალაზე დაყრდნობით, ამის თქმა შეუძლებელია“. – წერს კენ დარკი. მეორე მხრივ, აღნიშნავს პროფესორი, არქეოლოგებს არც იმის მიზეზი აქვთ, რომ მსგავსი ალბათობა გამორიცხონ.

წყარო: bb.ge