საინტერესო

,,მუტრუკების ქვეყანაში სულ ასე ვიქნებით. დილას ვიჩხუბებთ და საღამოს გავაპროტესტებთ აგრესიას”

,,პრიმატებს ზრდის ქვეყანა მუდმივად. უნდა მიხვდეს საზოგადოება, რომ წინსვლა არის ზღაპარში, ცოდნაში, წიგნში, ფერში, აზრში, ეს არაა მარტო განათლება. ესაა ინტელიგენტობა, რომელიც უნდა ატაროს შიგნით, რაც შეიძლება მეტმა."

არაფერი არ შეიცვლება. სულ ასე ვიქნებით, დილას ერთმანეთს ვცემთ და საღამოს აგრესიას დავგმობთ. ვითომ ძალიან კულტურულები ვართ. დაიშალა თუ არა ესესერი და მოგვცეს თავისუფლება, სულ ასე ვართ…თბილისი დავწვით, პრეზიდენტი ჩამოვაგდეთ და მოვკალით, ერთმანეთს სახლებში შევუვარდით, მეორე პრეზიდენტს ტერაქტები მოვუწყვეთ, მესამე მთლად გიჟი მოვიყვანეთ, პრემიერი მოვკალით, ციხეები გამოვტენეთ, მერე ერთ კაცს შევეტენეთ იმედით, რომ გაგვაძღობდა, მოკლედ ძალიან საყვარლები ვართ, მეტი რომ არ შეიძლება.
ეხლა გეტყვით ეს რისი ბრალია.
პატარა ბავშვი რომ იზრდება, ფერადი და ლამაზი სათამაშოები აქვს ხოლმე ბევრი. მერე და მერე სულ უფრო ნაკლები. მერე აღარ ცხოვრობს წიგნთან, მუსიკასთან, ფერებთან, არ დადის კონცერტზე ან გამოფენაზე, არ ცხოვრობს იმ ზღაპარში, რომელიც აუცილებელია სულ გქონდეს ცხოვრებაში თან, გინდა განათლება დაუძახე ამას და რაც გინდა. აი ხომ გახსოვთ რეზო ჩხეიძის ფილმში ბეთხოვენას რომ დასცინიან ბიჭები, იმიტომ რომ მუსიკაზე დადიოდა? ის ბეთხოვენა მაგათ ყველას უსწრებდა, თავისი სასაცილო გამომეტყველებით. იმიტომ რომ ბეთხოვენამ იცოდა, რომ ამ ქვეყანაზე ხილულის გარდა არის კიდევ უხილავი, რაც თან დაგაქვს. ბეთხოვენა არასდროს არ გალახავს არავის, ის ააშებებს ქვეყანას, იმიტომ რომ ის რაღაცა უხილავი არ მისცემს ამის უფლებას სხვანაირად იცხოვროს. პრიმატი კი გალახავს. ხოდა პრიმატებს ზრდის ქვეყანა მუდმივად. იზრდება ეს პატარა ბიჭი, უზღაპროდ, მარტივად, დასცინის ბეთხოვენას და ხდება მუტრუკი. კაციც და ქალიც. მერიას რომ ვეხვეწები უშედეგოდ ქალაქში ლამაზი ინსტალაციები დავდგათმეთქი და ვერ გავაგებინე, ეს არაა ახირება. ეს ის ზღაპარია და ლამაზი სივრცე, რაშიც უნდა იარსებოს ადამიანმა, რომ მუტრუკი არ გახდეს. თაობები დავზარდეთ მუტრუკი ქალების და კაცების, პრიმატების რომელსაც ჩასაცმელი, მანქანა და კტედიტბარათი გონია ყველაფერი. არადა სულ სხვა რამეა ზღაპარში ცხოვრება, რომელიც თან დაგაქვს. რატომაა ებრაელებს ყველაზე მეტი ნობელიანტები და გენიოსები რომ ჰყავთ? იმიტომ რომ ისინი ცხოვრობენ უფრო ღრმად ვიდრე სხვები. რატომაა ბავშვობაში ვინც ბეთხოვენა იყო, ყველამ დიდ მწვერვალებს მიაღწია, იმიტომ რომ შინაგანად გაიზარდა იმ თავის ზღაპარში. მუტრუკი კი როგორიც იყო პრიმატი, ისეთი დარჩა. ეხლა გადაავლეთ გარშემო თვალი და შეხედეთ, რამდენია ბეთხოვენა და რამდენი მუტრუკი. ხოდა აბა რაღა გვიკვირს?…რა უნდა ვქნათ? უნდა მიხვდეს საზოგადოება, რომ წინსვლა არის ზღაპარში, ცოდნაში, წიგნში, ფერში, აზრში, ეს არაა მარტო განათლება. ესაა ინტელიგენტობა, რომელიც უნდა ატაროს შიგნით რაც შეიძლება მეტმა. თუ ეს არ გავაკეთეთ, მუტრუკების ქვეყანაში სულ ასე ვიქნებით. დილას ვიჩხუბებთ და საღამოს გავაპროტესტებთ აგრესიას, რასაც ვაკეთებთ ამდენი წელია…..
ირაკლი ჟვანია, ხელოვანი

დატოვეთ კომენტარი

კომენტარები

მსგავსი სიახლეები

Back to top button
Close