მკურნალობის რა თანამედროვე მეთოდები დაინერგება ქართულ მედიცინაში POSTALIONI.COM-ის სტატიის შემდეგ
დაახლოებით 1 თვის წინ POSTALIONI.COM ზე, რუბრიკაში: ,,ორ მიწაზე დარწეული აკვანი”, გავიდა სტატია ქართველ ებრაელ ექიმზე, რომელიც უნიკალურ უროლოგიურ ოპერაციებს აკეთებს ისრაელში, ასაფ ჰაროფეს საუნივერსიტეტო კლინიკაში. საზოგადოება მაშინვე დიდი ინტერესით მოეკიდა ონელი ბიჭის ამბავს, რომელმაც დიდი და რთული გზა განვლო თბილისის სახელმწიფო სამედიცინო ინსტიტუტიდან ისრაელის წამყვან საუნივერსიტეტო კლინიკამდე, რომელსაც სამართლიანად ვუწოდე 22-ე საუკუნის საავადმყოფო.
აბრაამ (ამირან) ჩაჩაშვილის შესახებ სტატიას 2800 ზე მეტი გაზიარება ჰქონდა. წერილს კითხულობდნენ, აკომენტარებდნენ და როგორც ჩანს, სამედიცინო წრეებშიც აქტიურად ეცნობოდნენ ბატონი ამირანის კოლეგები. სწორედ ამის შემდეგ, აბრაამ ჩაჩაშვილს დაუკავშირდნენ კ. ერისთავის სახ. ექსპერიმენტული და კლინიკური ქირურგიის ეროვნული ცენტრიდან, მოიწვიეს კოლეგა ახალ მეთოდოლოგიაზე ლექციების წასაკითხად და პირველად საქართველოში უნიკალური ოპერაციის ჩასატარებლად.
ამონარიდი პრესრელიზიდან:
,, 2016 წლის 8 დეკემბერს კ. ერისთავის სახ. ექსპერიმენტული და კლინიკური ქირურგიის ეროვნული ცენტრის საკონფერენციო დარბაზში ჩატარდება ასაფ ჰაროფეს სახელობის საუნივერსიტეტო კლინიკის წამყვანი უროლოგისა და იმპოტენციის მიმართულების ხელმძვანელის, ისრაელის უმაღლესი კატეგორიის ექიმის, აბრაამ ჩაჩაშვილის ლექცია-სემინარი თემაზე – „მკურნალობის თანამედროვე ინსტრუმენტული მეთოდები უროლოგიაში“. სალექციო კურსის დასრულებისას ჩატარდება საჩვენებელი ოპერაცია ახალი ტექნოლოგიის გამოყენებით. აბრაამ (ამირან) ჩაჩაშვილი ლექციას წაიკითხავს ისეთი თანამედროვე ტექნოლოგიების შესახებ, როგორიცაა პროსტატის ტრიანგულარული სტენტი, მწვანე შუქის ლაზერული ქირურგია უროლოგიაში და სხვ. ქართულ მედიცინაში ახალი მეთოდები ინერგება და იგი შემოაქვს ებრაელ ექიმს, საქართველოში დაბადებულ-გაზრდილსა და ისრაელში სპეციალისტად შემდგარს.
POSTALIONI.COM წარმატებებს უსურვებს ბატონ ამირანს!!
ირინა ბიბილეიშვილი-იოსებაშვილი
წყარო postalioni.com
