როგორც მკითხველს შევპირდით, ყველა წინასაარჩევნო კანონდარღვევის ფაქტს გამოვიტანთ სააშკარაოზე, მით უფრო, თუ ის მმართველ პარტიასთან არის დაკავშირებული. მიგვაჩნია, რომ კანონმდებელი, უპირველეს ყოვლისა, თავად უნდა იცავდეს მის მიერ მიღებულ კანონებს.

წყარომ მოგვაწოდა ინფორმაცია, რა მოხდა რამდენიმე დღის წინ, წნორში, სააგიტაციო პლაკატების ქუჩებში გაკვრის დროს. სიღნაღის მუნიციპალიტეტში სააგიტაციო პლაკატების ქუჩებში გაკვრის კამპანია, პირველად ოცნების შტაბმა დაიწყო. ქუჩები უმალ მოიფინა მათი მაჟორიტარი კანდიდატის, დავით სონღულაშვილის პლაკატებით. ზოგიერთი შენობის გარე ფასადზე, ერთმანეთის მიყოლებით, კედელზე გამოკრული 46 ცალი სონღულაშვილის პლაკატიც  კი დავთვალეთ, რაც სიღნაღის საკრებულოს თავმჯდომარის ხელმოწერილი დადგენილების მიხედვით, უკანონოა. იგივე დადგენილების მიხედვით, დაუშვებელია კერძო პირის საკუთრებაზე სააგიტაციო პლაკატის განთავსება მეპატრონის თანხმობის გარეშე.

წყაროს თქმით, ოცნებამ წნორში მაცხოვრებლების ქუჩებზე პლაკატები ისე გააკრა, მათ მესაკუთრეებს არ დაეკითხა. ერთ-ერთი ბინის მეპატრონეს საკუთარ ქუჩაზე გამოკრული სონღულაშვილის პლაკატი რომ უნახავს, მისი ქუჩიდან მოცილება გადაუწყვეტია და აუხევია. ვიღაცას მაშინვე უცნობებია ოცნების შტაბისთვის, რომლის მუშაობაშიც აქტიურად ყოფილა ჩართული სიღნაღის საკრებულოს თავმჯდომარეც. ჰოდა, ინფორმაციის მიღების შემდეგ, თავად საკრებულოს თავკაცი ჩამოსულა იმ ადგილობრივ მაცხოვრებელთან, რომელმაც გაბედა და მმართველი პარტიის კანდიდატის სასარგებლოდ, სააგიტაციო ფურცლის მის ქუჩაზე გაკვრაზე უარი განაცხადა. როგორც ამბობენ, საკრებულოს თავმჯდომარესა და ადგილობრივს შორის ცხარე კამათი გამართულა და თავმჯდომარე ადგილობრივს ფიზიკური ანგარიშსწორებით დამუქრებია.

ამ ფაქტს უამრავი თვითმხილველიც ჰყოლია. მეტიც, ერთ-ერთი ჩუმად იღებდა ტელეფონით და როცა საჭირო გახდება, გამოაქვეყნებს კიდეცო. ეს ყველაფერი კი, არც მეტი და არც ნაკლები, თურმე პოლიციის მიმდებარედ ხდებოდა, მაგრამ, პოლიტიკურ რელსებზე გადასული პოლიცია, ყოველთვის მმართველი პარტიის სასარგებლოდ ხუჭავს თვალს და როგორც გვითხრეს, ამჯერადაც ასე მოქცეულა.

აქედან გამომდინარე გვაინტერესებს, ,,ოცნება” არჩევნების მოგებას ძალადობით აპირებს?

დატოვეთ კომენტარი

კომენტარები