საზოგადოება

,,ივანიშვილი იმიტომ წავიდა, რომ მის ქონებრივ და პირად უსაფრთხოებას საფრთხე ემუქრება”

,,გეგმა "A" გულისხმობს საქართველოს არაფორმალურ მმართველობას, ხოლო გეგმა "B" საფრანგეთში გაქცევას და ამ გზით ქონებისა და თავისუფლების შენარჩუნებას"

ვფიქრობ, ბიძინა ივანიშვილის დღევანდელი “წასვლა” მნიშვნელოვნად გვაახლოებს მის რეალურ და სამუდამო წასვლასთან ჩვენი ქვეყნის სადავეებიდან. დღეს მან რეალურად კვლავ გადაინაცვლა კულუარებში, ანუ ყველანაირი ფორმალური პასუხისმგებლობა მოიშორა, მაგრამ ამ ყველაფერსაც თავისი მიზეზი გააჩნია. ბიძინასთვის ყველაზე და ყველაფერზე მნიშვნელოვანი ყოველთვის მისი პირადი უსაფრთხოება იყო. ამას ადასტურებს მისი უაზრო ახირება ასწლოვანი ხეების გადანერგვასთან დაკავშირებით, ან თუნდაც ის რომ პანდემიის პირობებში სულ ორჯერ გამოჩნდა საჯაროდ, ისიც აუცილებლობა რომ მოითხოვდა იმიტომ – ერთხელ პარტიულ წინასაარჩევნო ყრილობაზე, ხოლო მეორეჯერ არჩევნების დღეს ხმის მისაცემად. მისთვის საკუთარ უსაფრთხოებაზე მნიშვნელოვანი ღირებულება არ არსებობს.
ახლა რატომ მიდის? იმიტომ ხომ არა, რომ მის ქონებრივ ან პირად უსაფრთხოებას საფრთხე ემუქრება?
რეალობას გავუსწოროთ თვალი – საქართველოში სახელისუფლებო ძალაუფლების გადაცემაზე მნიშვნელოვან გავლენას ჩვენი დასავლელი პარტნიორების რეაქცია და მხარდაჭერა ახდენდა. ტრამპის ადმინისტრაციის პირობებში ბიძინა ივანიშვილს ეს მხარდაჭერა მეტ-ნაკლებად ჰქონდა, მაგრამ რა ხდება დღეს დასავლეთში?
ტრამპის ნაცვლად აშშ-ს ხელისუფლებაში მოდის ჯო ბაიდენის გუნდი მთავარი გამოწვევით – აღადგინონ მსოფლიოს თვალში ამერიკის, როგორც დემოკრატიის ლოკომოტივის იმიჯი. ეს კი იმის ფონზე, რომ დემოკრატია კავკასიაში, ამერიკისთვის სტრატეგიულ რეგიონში, მძიმე კრიზისს განიცდის. ამაზე მეტყველებს გაყალბებული არჩევნების შედეგად საქართველოში ერთპარტიული პარტლამენტის ჩამოყალიბება, რომელსაც ევროპაში ანალოგი არ ჰყავს; ამაზე მეტყველებს სომხეთ-აზერბაიჯანის კონფლიქტი, ფაშინიანის წინააღმდეგ რევოლუციის მცდელობა და რიგგარეშე არჩევნები 2021 წელს; აზერბაიჯანში დამყარებული დეფაქტო-მონარქიული, ანტიდემოკრატიული მმართველობა ილჰამ აიევის მიერ და თურქეთი, რომელიც ნატოს წევრია, თუმცა ყოველდღიურად შორდება დასავლურ ღირებულებებს და აძლიერებს ულტრა-მემარჯვენე განწყობებს.
კონგრესის მიერ ბაიდენის პრეზიდენტად აღიარების შემდეგ, პირველი რა კონტექსტშიც საქართველო გაჟღერდა იყო შემდეგნაირი: “ქართველ ხალხს ვეტყოდი, დადექით ერთად, რათა უზრუნველყოთ, რომ შენარჩუნდეს დემოკრატია და ძალაუფლების მშვიდობიანი გადაცემა მოხდეს” – განაცხადა აშშ-ის წარმომადგენელთა პალატის საგარეო საქმეთა კომიტეტის თავმჯდომარემ – გრეგორი მიკსმა.
ეს არის პირველი ნიშანი იმის, რომ რუს ბიძინას აღარანაირი მხარდაჭერა აღარ ექნება ამერიკის მხრიდან. ბიძინას კი საფრთხის ყნოსვის უნარი მართლა აქვს, ნუ დავუკარგავთ. ბოლოსდაბოლოს 90-იანი წლების რუსეთში აქვს ნაშოვნი მილიარდები.
დღეს ის ცდილობს მოიხსნას ყველანაირი ფორმალური პასუხისმგებლობა და გადაულოცოს კობახიძე-თალაკვაძისნაირ მარიონეტებს. საკუთარი ქონება გადააფორმა ქართუ-ფონდის ანგარიშებზე, სადაც ფიქრობს მეტად უსაფრთხოდ იქნება. საფრანგეთის კოვიდ-ფონდში გადარიცხა მილიონები რათა საპატიო ორდენის მფლობელი გამხდარიყო. ეს ყოველივე მეტყველებს ერთადერთზე: ცალსახაა რომ გეგმა “A” გულისხმობს საქართველოს არაფორმალურ მმართველობას, ხოლო გეგმა “B” საფრანგეთში გაქცევა და ამ გზით ქონებისა და თავისუფლების შენარჩუნებაა.
მე დარწმუნებული ვარ, რომ აშშ-ში ბაიდენის გამარჯვება მნიშვნელოვან პოზიტიურ შედეგებს გამოიღებს საქართველოში. ბიძინას ყველა გზა მოეჭრება გეგმა “A”-ს განსახორციელებლად, თუმცა აქ ჩვენი აქტიურობა და ბრძოლა იქნება გადამწყვეტი. ჩვენ მივაღწევთ ხელახალ არჩევნებსაც და დემოკრატიასაც! და ყველამ ერთად უნდა ვიზრუნოთ გეგმა “C”-ს განსახორციელებლად: ბიძინას არ უნდა შერჩეს საქართველოს ეკონომიკის მიწასთან გასწორება, მილიონების მოპარვა, დემოკრატიული ინსტიტუტების შერყევა და ათასობით ადამიანის გაუბედურება. ყველა დამნაშავემ უნდა აგოს პასუხის კანონისა და სამართლის წინაშე. არც ბიძინა იქნება გამონაკლისი.
ბრძოლა გრძელდება. ვუახლოვდებით გამარჯვებას!
მიშიკო ქუმსიშვილი, ლეიბორისტული პარტიის ახალგაზრდული ორგანიზაციის ხელმძღვანელი

დატოვეთ კომენტარი

კომენტარები

მსგავსი სიახლეები

Back to top button
Close