“თბილისის მერია ადამიანთა უფლებებს არღვევს”
„სვანიძის ქუჩის დაზარალებულთა კომიტეტი“ განცხადებას აქვეყნებს, რომლითაც ირკვევა, რომ თბილისის მერია არღვევს ადამიანთა კონსტიტუციურ უფლებას და უარს ამბობს საჯარო ინფორმაციის გაცემაზე.
,,სვანიძის ქუჩის დაზარალებულთა კომიტეტი” თბილისის მერიას კარგა ხანია სთხოვს, გააცნოს მდინარე ვერეს კალაპოტის ცვლილების პროექტი, რომლის განხორციელებასაც აპირებს, მაგრამ ამაოდ. არადა, ეს ინფორმაცია საჯარო გახლავთ. თბილისის მერიამ თავდაპირველად, პროექტის მაგივრად, ამ პროექტის შესახებ სამხარაულის სახელობის საექსპერტო ბიუროს ექსპერტების მიერ დაწერილი დასკვნა გამოგვიგზავნა, რომელიც ცალსახად უარყოფითი გახლდათ. ამის შემდეგ თბილისის მერიას კვლავ მივმართეთ თხოვნით, რომ სამუშაოების დაწყებამდე არსებული პროექტი, ჩვენთვის, 13-14 ივნისის სტიქიის დროს ყველაზე მეტად დაზარალებული ქუჩის მოსახლეობისთვის გაეცნო, რაც ჩვენი კონსტიტუციური უფლებაა, მაგრამ თბილისის მერიის კეთილმოწყობის საქალაქო სამსახურის უფროსი, გივი კუბლაშვილი გვწერს, რომ პროექტის განხორციელება უკვე იწყება, რისთვისაც ის სსიპ მუნიციპალური განვითარების ფონდს გადაეცა და ჩვენს მოთხოვნას მერია ვეღარ დააკმაყოფილებს. „ქალაქ თბილისის მუნიციპალიტეტის მერიის კეთილმოწყობის საქალაქო სამსახურში შემოსული 2016 წლის 16 ნოემბრის (რეგისტრაციის N410703/11) წერილთან დაკავშირებით გაცნობებთ, რომ მდინარე ვერეს კალაპოტის ფორმირების მიზნით, შემდგომში განსახორციელებელი ქმედებების უზრუნველსაყოფად, მდინარე ვერეს ფორმირების პროექტი მიმდინარე წლის ნოემბერში გადაეცა სსიპ – მუნიციპალური განვითარების ფონდს. შესაბამისად, პროექტით განსახორციელებელ სამუშაოებთან დაკავშირებით, გთხოვთ, მიმართოთ სათანადო უფლებამოსილ ორგანოს,“ – ნათქვამია გივი კუბლაშვილის მიერ ჩვენთვის გამოგზავნილ წერილში.
… საინტერესოა, თბილისის მერიამ მუნიციპალური განვითარების ფონდში ეს პროექტი ისე გადააგზავნა, რომ მისი ასლიც არ შეინახა?! რატომ მალავს თბილისის მერია ასე საგულდაგულოდ სტიქიის ზონაში განსახორციელებელ პროექტს? ბუნებრივად ჩნდება ეჭვი, რომ არსებული პროექტით ადამიანებს საფრთხე უფრო ემუქრებათ, ვიდრე დაცვა და ამის დასტური პროექტის შესახებ სამხარაულის ექსპერტიზის ეროვნული ბიუროს ექსპერტების მიერ დადებული დასკვნაა, რომელიც ცალსახად ნეგატიური გახლავთ!“ _ აცხადებს ,,სვანაძის ქუჩის დაზარალებულთა კომიტეტი.“
Postalioni.com
