საზოგადოება

თამარ ჩიბურდანიძე – „ქართულ-აფხაზური გენოფონდი აფხაზეთის ომის შემდეგ ნადგურდება“

სოხუმის დაცემის დღეს განცხადებებს აკეთებენ პოლიტიკური და საზოგადო სახეები. დემოგრაფიული აღორძინების ფონდის თავმჯდომარე თამარ ჩიბურდანიძე ქართულ-აფხაზური გენოფონდის სტატისტიკურ მონაცემებთან დაკავშირებით მონაცემებს აქვეყნებს.
-„აფხაზეთის ომი და შიდა კონფლიქტები გახდა საქართველოში დემოგრაფიული პრობლემების წარმოქმნის საბაბი. ომში დაღუპული ახალგაზრდები, მძიმე სოციალური ფონი და დიდი მიგრაცია უცხოეთში – ეს ყველაფერი მთელს საქართველოში, მათ შორის აფხაზეთშიც მიმდინარეობდა. შედეგად მივიღეთ ის, რომ საქართველოს მოსახლეობა 5 მილიონიდან 3,7 მილიონამდე შემცირდა. მათ შორის, საგრძნობლად შემცირდა ეთნიკური აფხაზების წილი თვით აფხაზეთში.
1959 წელს აფხაზეთის მოსახლეობა 365 370 ადამიანს შეადგენდა, 1989 წელს კი, აღწერის მიხედვით _ 524 ათასს. აფხაზეთი მთელი თავისი ისტორიის განმავლობაში ყველაზე მრავალრიცხოვანი იყო 1991 წელს _ 528 ათასი მცხოვრები. ამის შემდეგ აფხაზეთის მოსახლეობა შიდა კონფლიქტების შედეგად, უაღრესად შემცირდა და 2003 წელს მხოლოდ 214 016 კაცს შეადგენდა, 2011 წელს იქ უკვე 240 705 კაცი ცხოვრობდა, 2014 წელს კი _ 242 756.აფხაზეთის მოსახლეობა მცირედით გაიზარდა სხვა ეთნოსების იმიგრანტების ხარჯზე, რომელთათვისაც იქ ცხოვრება მიმზიდველია.
აფხაზეთში მოსახლეობის საყოველთაო აღწერა ბოლო პერიოდში არ ჩატარებულა, თუმცა, დემოგრაფიული კვლევა ჩაატარეს რუსმა სპეციალისტებმა, რომელთა დასკვნით, აფხაზეთში დღეს ეთნიკური აფხაზები მოსახლეობის მხოლოდ 47%-ს შეადგენენ. ერის დაბერების ყველაზე დიდი ტემპი სწორედ ეთნიკურ აფხაზებში შეინიშნება. შობადობამ საგრძნობლად იკლო, ხოლო ახალგაზრდობა ან უცხოეთში გადის, ან მათი დიდი ნაწილი ნარკომანიით იღუპება.
ფაქტია, ქართულ-აფხაზური გენოფონდი აფხაზეთის ომის შემდეგ ნადგურდება. მიმდინარე წლის აპრილის თვეში პარლამენტში ჩატარდა პირველი ღია კონფერენცია ქართულ-აფხაზური გენოფონდის შესახებ, სადაც დემოგრაფიული აღორძინების ფონდმა წარმოადგინა სიღრმისეული დემოგრაფიული კვლევები ამ მიმართულებით. კონფერენციაზე მოწვეულნი იყვნენ აფხზები სოხუმიდან. გიორგი ვოლსკის ხელმძღვანელობით შეიქმნა კომისია, რომელიც მოამზადებს ერთობლივ ინიციატივებს ქართულ-აფხაზური გენოფონდის გადასარჩენად. მეც ამ კომისიის წევრი ვარ და აქტიურად ვმუშაობთ როგორც პარლამენტში, ასევე ბატონ ვახტანგ ყოლბაიასთან ერთად. გვჯერა, რომ ერთობლივი მუშაობით აუცილებლად ვიპოვით ერთმანეთის გულებთან მისასვლელ გზას“, – განაცხადა თამარ ჩიბურდანიძემ.

დატოვეთ კომენტარი

კომენტარები

მსგავსი სიახლეები

Leave a Reply

Your email address will not be published.

Back to top button
Close