ზღვის სულით შთაგონებული ქალი, რომლის ხელებიც საოცრებებს ქმნის
ბოლო პერიოდში უამრავი შემოქმედებითი მიმდინარეობა შეემატა ხელოვნებას. ნიჭიერი ადამიანები ქმნიან უცნაურ და საინტერესო ნამუშევრებს სხვადახვა დარგების სინთეზით. ეს ბუნებრივია, შემოქმედება ხომ უჩარჩოო ნახატს ჰგავს, რომელშიც ჩატეულია ყველაფერი რისი დანახვა, შეხება, აღქმა, შეგრძნება, წარმოსახვა და გამოგონებაც შესაძლებელია. მოხარული ვარ, რომ ჩვენი პაწაწინა ქვეყანა სავსეა უნიჭიერესი და, რაც მთავარია, თავისუფლად მოაზროვნე ადამიანებით, რომლებიც ქმნიან რაღაც ახალს, ღირებულსა და ამაღელვებელს. ამ წერილის მიზანია გაგაცნოთ ქალი, რომელიც შთამბეჭდავ ნივთებს ქმნის. გადამეტებული არ იქნება ჩემი შეფასება, თუ ვიტყვი, რომ მისი ნიჭიერება ანგრევს ყოველგვარ შეხედულებას შესაძლებლობების საზღვრების შესახებ. ამაში თავად დარწმუნდებით, როდესაც მის ნამუშევრებს იხილავთ.
ლალი დათიაშვილი – ეს სახლი და გვარი ბევრისათვის უკვე კარგადაა ცნობილი. მხატვართა კავშირის წევრი, დიზაინერი, ფერმწერი, სატელევიზიო შოუ „იდეა ფული და ერთი შანსი“-ს გამარჯვებული, რამოდენიმე უმაღლესი სასწავლებლის ყოფილი ლექტორი და, რაც მთავარია, ყოველმხრივ განათლებული, ერუდირებული ქალბატონის ისტორია ძალიან საინტერესო და ცოტა მისტიურიცაა.
ხატვა სულ პაწაწინამ დაიწყო. თავისი ფაქიზი და ბავშვური სამყაროს ფურცელზე ასახვას მარცხენა ხელით ცდილობდა, თუმცა, როგორც ხდება ხოლმე, პედაგოგებმა თავისი გაიტანეს და გოგონა მემარჯვენეობას მიაჩვიეს. თითქოს ხატვა საერთოდ გაქრა მისი ცხორებიდან და ინტერესებიც სხვა კუთხით განვითარდა, მაგრამ ნიჭმა მოსვენება არ მისცა, მაინც ააღებინა ფუნჯი ხელში და მალევე მიახვედრა, რომ ეს მისი საქმე იყო. ხელოვანის ნამუშევრებმა უკვე მრავალი გამოფენა დაამშვენა. იყო ისეთი შემთხვევაც, როდესაც ქალბატონ ლალის ამერიკის საელჩომ პირადად სთხოვა მათთან გამოფენის ჩატარება. მოკლედ, რომ ვთქვათ დიდი წარმატება და აღიარება მოიპოვა, მაგრამ მისი შემოქმედებითი ხედვის არეალის გაფართოვება ამით მხოლოდ დაიწყო. ერთ-ერთ გამოფენაზე მან წარადგინა თავისი დიზაინით შეკერილი კაბა, რომელსაც „გაზაფხული“ უწოდა. სწორედ აქედან გაუჩნდა იდეა, შეექმნა კაბები ოთხივე სეზონის მიხედვით. ზაფხულის კაბა ნიჟარებით შეამკო, ვინაიდან მისი შინაგანი სამყაროსთვის ზღვა და ყველაფერი ზღვასთან დაკავშირებული ძალიან ახლოს იყო. თითქოს ამ კაბით დაასრულა ნიჟარებთან „თანამშრომლობა“, თუმცა სახლში სანაპიროზე შეგროვებულ უამრავ ულამაზეს ნიჟარას დროადრო ფაქიზად ათვალიერებდა ხოლმე. ერთ დღეს, მათ უცაურ და მიმზიდველ ფორმებს განსაკუთრებული თვალით შეხედა და უმალ აენთო ერთი იდეის ირგვლივ – სული შთაებერა მათთვის და გარდაესახა ისინი უნიკალურ ნივთებად. მათი ხილვა გაოცებულს დატოვებს ნებისმიერ ადამიანს. მართალია, ისინი ფოტოებზეც გასაოცრად გამოიყურებიან, მაგრამ რეალურ ცხოვრებაში მათი ნახვა სულ სხვა შეგრძნებებს აღძრავს.
.
.
.
.
.
.
.
.
.
.
.
.
გარდა ნიჟარებისა ხელოვანს შექმნილი აქვს ნივთები გიშრითა და მარგალიტებით, რომლებიც გულგრილს უბრალოდ ვერ დაგტოვებთ.
.
სულ ცოტა ხნის წინ მისი დიზაინითა და ხელმძღვანელობით მოეწყო ქუთაისის ბოტანიკური ბაღი, მოსწავლე ახალგაზრდობის პარკი, ასევე სასტუმრო „ბაგრატის“ ლაუნჯი ბარში ამფორების ბარელიეფები და ატლანტების ქანდაკებები.
.
.
.
.
მიუხედავად იმისა, რომ ქალბატონ ლალის ძალიან უჭირს განშორება თავის ყველა ნამუშევართან, იქნება ეს ნახატი თუ ულამაზესი ხელნაკეთი ნივთი, ისინი მაინც ალამაზებენ ბევრი ცნობილი ადამიანის სახლის ინტერიერსა და დაწესებულებას. მათი შეძენა შეუძლია ნებისმიერ მსურველს. ისინი ხომ ძალიან ძვირფასი და ამავდროულად ორიგინალური სამშვენისი იქნება ნებისმიერი სახლისათვის.
მარიამ მახნიაშვილი
წყარო postalioni.com
