ზოგადი უნარების გამოცდაზე აბიტურიენტების 13% ჩაიჭრა, მაქსიმალური ქულა კი ვერავინ მიიღო

შეფასებისა და გამოცდების ეროვნული ცენტრი ზოგადი უნარების გამოცდის სტატისტიკურ ანალიზს აქვეყნებს.

ანალიზის მიხედვით, ზოგადი უნარების ტესტში 80 ქულიდან ყველაზე მაღალი ქულა – 79 ორმა აბიტურიენტმა მე-3 და მე-4 ვარიანტებში მიიღო.

ზოგადი უნარების ოთხივე ვარიანტში მინიმალური კომპეტენციის ზღვარი გადალახა აბიტურიენტთა 87,1%-მა, შესაბამისად, კონკურსს გამოცდაზე გასული აბიტურიენტების 12,9% გამოეთიშა.

ყველაზე მეტმა აბიტურიენტმა (13,73%) ტესტის პირველ ვარიანტში ვერ გადალახა ზღვარი. მინიმალური კომპეტენციის ზღვარი – გამსვლელი ქულა I და III ვარიანტებში – 22 ქულა, II და IV ვარიანტში კი 24 ქულა იყო.

შედეგების გაგებას აბიტურიენტები შეფასების გამოცდების სისტემასა და მოკლე ტექსტური შეტყობინებით შეძლებენ.

სააპელაციო განაცხადების მიღება ყველა გამოცდის შედეგის გამოქვეყნების შემდეგ დაიწყება. განაცხადები მიიღება ელექტრონულად ვებგვერდებზე: www.naec.ge; online.naec.ge

დატოვეთ კომენტარი

კომენტარები