ზიმბაბვეს ყოფილი დიქტატორი რობერტ მუგაბე და მისი ცოლი რამდენიმე მილიონის ოდენობის კომპენსაციას მიიღებენ, წერს The Guardian. კომპენსაცია მუგაბეს გადადგომის შესახებ მიღწეულ შეთანხმებას ეხება. ზუსტი თანხა, რომელსაც მუგაბე მიიღებს უცნობია, თუმცა ერთ-ერთი მაღალჩინოსნის ინფორმაციით, ყოფილ დიქტატორს $10 მილიონს მისცემენ.

ამასთანავე, ექს-პრეზიდენტი და მისი ოჯახი სასამართლო დევნის თავიდან ასაცილებლად იმუნიტეტს მიიღებენ. 93 წლის რობერტ მუგაბე $150 ათას დოლარს ყოველწლიურად სიცოცხლის ბოლომდე ხელფასის სახით მიიღებს. 52 წლის პირველი ლედი კი, რომელსაც ექსტრავაგანტულობის გამო ხშირად აკრიტიკებდნენ და “გუჩი” შეარქვეს, სიცოცხლის ბოლომდე წლიურად $75 ათას დოლარს მიიღებს.

წყვილს საშუალება ექნება, რომ თავის სასახლეში დარჩეს, რომელსაც ლურჯ სახურავს უწოდებენ. სახელმწიფო აანაზღაურებს მათ სამედიცინო მომსახურებას, საშინაო პერსონალს, უსაფრთხოებასა და უცხოეთში გამგზავრებას.

14 ნოემბერს, ზიმბაბვეში სამხედროებმა სწრაფი და უსისხლო ოპერაცია ჩაატარეს და ქვეყნის კონტროლი ხელში აიღეს. ამის შემდეგ რობერტ მუგაბე რამდენიმე დღის განმავლობაში შინაპატიმრობაში იყო, გადატრიალებიდან ერთი კვირის თავზე კი საკუთარი გადადგომის შესახებ განაცხადა.

37-წლიანი დიქტატურის შემდეგ ზიმბაბვეში დარჩა გამუართავი ვალუტა, უზარმაზარი ვალი, უკიდურესად ღარიბი მოსახლეობა და 80 პროცენტიანი უმუშევრობა.

on.ge

დატოვეთ კომენტარი

კომენტარები