ზაზა ხატიაშვილი: მე და დათოს ერთმანეთზე ნეგატიური მოსაზრებების გავრცელებაც კი გვიწევდა

ჩვენ ვცხოვრობდით პოლიციურ რეჟიმში, ყველამ ვიცოდით, რომ მიმდინარეობდა ჩვენი საუბრების ტოტალური მოსმენა და ფარული ჩაწერა. ჩვენი და ჩვენი ოჯახების უსაფრთხოებას ყოველ დღე ემუქრებოდა საფრთხე. – აცხადებს საინფორმაციო სააგენტო „ევრონიუს ჰოლდინგთან“ საუბარში ადვოკატთა ასოციაციის თავმჯდომარე ზაზა ხატიაშვილი.

– ბატონო ზაზა, საზოგადოებაში არსებობს შეკითხვები თუ რატომ თვლით, რომ სააკაშვილის ხელისუფლება რაიმეგვარად ებრძოდა ადვოკატებს?

– სააკაშვილის რეჟიმმა 100-ზე მეტი ადვოკატი ჩასვა ციხეში სრულიად უსაფუძვლო ბრალდებებით. მაშინდელმა ხელისუფლებამ ერთ ფანჯარაში მოაქცია ციხეც, პროკურორიც, ადვოკატიც და მოსამართლეც. რეალურად ჩვენმა პროფესიამ ყოველგვარი აზრი დაკარგა. მოსამართლესთვის სულერთი იყო ადვოკატი კარგად იცავდა ბრალდებულის უფლებებს თუ ცუდად, სასამართლოს მაინც ერთი და იგივე გადაწყვეტილება გამოჰქონდა, ამით ადვოკატის პროფესიის ნიველირება ხდებოდა. რეალურად ხდებოდა ქვეყანაში მართლმსაჯულების კვდომა, რასაც შევეგუეთ და პირადი რისკის ფასად ვიბრძოდით თვითოეული ადვოკატის უფლების დაცვისათვის.

– რა ბერკეტებს იყენებდით ამისთვის და როგორ ახერხებდით ადვოკატების დაცვას?

– ხელისუფლებას ადვოკატი მართლმსაჯულების ხელშემშლელ ფაქტორად მიაჩნდა. ამ დაპატიმრებებით ხელისუფლებას სურდა დაეშინებინა ადვოკატები, რომლებიც დრაკონული საკანონმდებლო ცვლილებებისა თუ სამართალდამცავი სტრუქტურების ძალადობრივი ქმედებების ფონზე, საკუთარი პირადი უსაფრთხოების და თავისუფლების რისკის ფასად მაინც ამხელდნენ ამ უკანონო ქმედებებს და იბრძოდნენ სამართლიანობის გამარჯვებისთვის. ჩვენ მივმართეთ ბრძოლის ყველაზე უკიდურეს ზომებს, მე ვმართავდი საპროტესტო აქციებს ევროპაში, ვშიმშილობდი სტრასბურგის სასამართლოს წინ. პარალელურად, ევროპელი ადვოკატების სოლიდარობის საკითხებს დათო ასათიანი ლობირებდა CCBE-სა და სხვა ავტორიტეტული საერთაშორისო ორგანიზაციების მეშვეობით.

– თქვენ ლობირება ახსენეთ, რა რესურსი გქონდათ იმისათვის, რომ პროცესებზე ზეგავლენა მოგეხდინათ?

– ჩვენ ვცხოვრობდით პოლიციურ რეჟიმში, ყველამ ვიცოდით, რომ მიმდინარეობდა ჩვენი საუბრების ტოტალური მოსმენა და ფარული ჩაწერა. ჩვენი და ჩვენი ოჯახების უსაფრთხოებას ყოველ დღე ემუქრებოდა საფრთხე. ხომ წარმოგიდგენიათ, იმ დონემდე მივედით, რომ არ გამოვლენილიყო ჩვენი მოკავშირეობა და ერთობლივი გეგმები, მე და დათოს ერთმანეთზე ნეგატიური მოსაზრებების გავრცელებაც კი გვიხდებოდა სხვადასხვა წრეებში, ჩვენი ამ ვითომ დაპირისპირებით გვინდოდა ხელისუფლებისთვის გზა-კვალი აგვებნია.

– რამდენად ეფექტური იყო ასეთი მეთოდები?

– იცით რა მინდა გითხრათ, მას შემდეგ, რაც დავით ასათიანის აქტიურობით ევროკავშირის მიერ მომზადებულ დასკვნაში გაჩნდა ჩანაწერი ადვოკატების უსაფუძვლო დევნასთან დაკავშირებით, რაც სრულად გამორიცხავდა ქვეყანაში დემოკრატიის აყვავებას, იუსტიციის სამინისტროსთან შეიქმნა არაფორმალური კომისია, რომელსაც ადვოკატთა წინააღმდეგ მიმართული საქმეები უნდა გადაეხედა და რომლის წევრადაც ევროპის ადვოკატთა ასოციაციებისა და სამართლის საბჭოს (CCBE) მხრიდან სწორედ დავით ასათიანი დასახელდა. CCBE-დან დათოს ნომინირება ძალიან სარისკო იყო პირადად მისთვის და მისი ოჯახისთვის, რადგანაც მაშინდელი ხელისუფლებისათვის უკვე ნათელი გახდა, რომ ასოციაციის საერთაშორისო მხარდაჭერა და ჩვენი უცხოელი კოლეგების პროტესტი დათოს მიერ იყო ორგანიზებული. ამ ბრძოლის შედეგი ყველამ ვნახეთ, დღეს ქვეყანაში აღარ გვყავს უკანონოდ დაპატიმრებული ადვოკატები და ეს არის ჩვენი ყველას დიდი გამარჯვება. მინდა განვაცხადო, რომ ადვოკატთა კორპუსი მომავალშიც არასოდეს შეეგუება მისი წევრების ჩაგვრას.

დატოვეთ კომენტარი

კომენტარები