საზოგადოება

ზაზა ხატიაშვილი: “ფრანგულმა გაზეთებმა გააშუქეს აქცია საქართველოს საელჩოსთან საფრანგეთში”

საქართველოს ადვოკატთა ასოციაციის თავმჯდომარე – ზაზა ხატიაშვილი განცხადებას ავრცელებს და ადვოკატებს მიმართავს:

„27 მარტს, ქ.თბილისის საქალაქო სასამართლო 15:00 საათზე განიხილავს ჩვენი ადვოკატების, პოლიტიკური პატიმრების, ნათელა გოდერიძის და მზევინარ კოსტავას საქმეს. გთხოვთ მობრძანდეთ და მხარი დაუჭიროთ პოლიტიკური ნიშნით დაკავებულ ჩვენს კოლეგებს.

ძვირფასო კოლეგებო! რამოდენიმე აქცია ჩავატარე ევროპის ქვეყნებში. საფრანგეთში ფრანგი ადვოკატები დადგნენ საქართველოს საელჩოსთან და გააპროტესტეს ქართველი ადვოკატების პოლიტიკური ნიშნით დაკავება. ფრანგულმა გაზეთებმა გააშუქეს აქცია საქართველოს საელჩოსთან საფრანგეთში, რომელიც მიეძღვნა ქართველი ადვოკატების უკანონო პატიმრობას. საქართველოს ხელისუფლება კიდევ ერთხელ შერცხვა ევროპულ პრესაში.
კოლეგებო! ადვოკატები! სამი თვე უკანონოდ, წინასწარ პატიმრობაში იმყოფებიან. 62 წლის პენსიონერ ქალბატონზე, ადვოკატ ნათელა გოდერიძეზე წინასწარი პატიმრობის შეფარდება, რომელსაც დღეში ორი სასამართლო პროცესი ჰქონდა, არის უზნეობის, უკანონობის და სიბინძურის დემონსტრირება. ადვოკატებთან ამგვარი მოპყრობა დამახასიათებელია ავტოკრატიული, ფეოდალური რეჟიმებისთვის.
ძვირფასო ადვოკატებო! ჩვენი ევროპელი კოლეგები, რომლებსაც გავუგზავნე ადვოკატებზე წაყენებული ბრალდება, გაოგნებულები არიან. მეკითხებიან, როგორ უნდა შეიყვანოს შეცდომაში ადვოკატმა ნოტარიუსი თუ ადვოკატმა არ წარუდგინა ყალბი დოკუმენტი? ევროპელ ადვოკატებს არ უნახავთ და არ გაუგონიათ ასეთი ბრალდება ადვოკატებთან მიმართებაში.
მურუსიძეების სასამართლომ უკანონო წინასწარი პატიმრობის გამოყენებით კიდევ ერთხელ მიიღო მონაწილეობა ადვოკატების ინსტიტუციურ დევნაში, რაც არის მათი საბრალდებო სკამზე დასმის წინაპირობა. პარლამენტის თავმჯდომარეს და პარლამენტის ადვოკატ წევრებს მივმართე, შეექმნათ პარლამენტში საგამოძიებო კომისია და განეხილათ ადვოკატებზე წაყენებული ბრალდება, მაგრამ პარლამენტი დუმს. როდესაც ჩვენი კოლეგები, პარლამენტის წევრები აღარ იქნებიან, როგორც წინა პარლამენტის წევრები, ისაუბრებენ ქვეყნის არაფორმალურ მმართველობაზე. ჩვენი ქვეყანა კი ასეთი სამარცხვინო პროკურატურის და სასამართლოს ხელში უფსკრულისკენ მიექანება“.

დატოვეთ კომენტარი

კომენტარები

მსგავსი სიახლეები

Leave a Reply

Your email address will not be published.

Back to top button
Close