პოლიტიკა

  ,,ვადასტურებ ჩემს გადაწყვეტილებას, რომ დავტოვო პარლამენტი, ხალხის ცოდვის კალო” 

,,ზათქით დაიმსხვრევა ის სიმახინჯე, რომელიც ივანიშვილის მახინჯი აზროვნების შედეგად შეიქმნა"

,,კიდევ ვადასტურებ ჩემს გადაწყვეტილებას, რომ დავტოვო პარლამენტი, ხალხის ცოდვის კალო”

_ კიდევ ერთხელ, საქვეყნოდ ვადასტურებ ჩემს გადაწყვეტილებას, დავტოვო საქართველოს ე.წ. პარლამენტი, რომელიც რეალობაში წარმოადგენს ჩვენი ხალხის ცოდვით შეკოწიწებულ კალოს, სადაც შეყრილია ბიძინა ივანიშვილის მიერ მოპარული მილიარდების დამცველი საადვოკატო კანტორების წარმომადგენლები და რომელთა მიზანია, ჩვენი სახელმწიფოს ოლიგარქზე გადაფორმება. ამ საქმეში მათ თანაშემწედ მე არ და ვერ გამოვადგები. ამის გამო, ვპირდები, რომ მალე დაასრულებენ ე.წ. პოლიტიკურ მოღვაწეობას და ძალიან მალე ხალხი დაიბრუნებს უმაღლესობას თავის სახელმწიფოზე, თავის ქვეყანაზე, რომელიც მას წაართვეს ძალადობით, მოსყიდვით, გაყალბებით, ადმინისტრაციული რესურსის გამოყენებით, ურცხვი ტყუილებით. როდესაც რაიმე მოვლენა ეწინააღმდეგება მის უდიდებულესობა ქართველი ხალხის ინტერესებს, ის მოვლენა, ის პარლამენტი, ის სტრუქტურა უნდა დაიშალოს რაც შეიძლება ჩქარა. სწორედ ეს ელოდება იმ ვითომპარლამენტს, რომელიც წარმოადგენს ბიძინა ივანიშვილის ბიზნესკანტორას, გადაქცეულს სახელმწიფო სტრუქტურად, იმისთვის, რომ ამ სამმა პროცენტიანმა, ხელისუფლებაში მყოფმა ბანდამ სამუდამოდ ვერ გააგრძელოს ამ ქვეყნის ექსპლუატაცია, რასაც არც მე და არც დანარჩენი ოპოზიცია, არ დავუშვებთ. საქართველოს მომავალს არავის ჩავახერგინებთ. ჩვენ არა მხოლოდ დღევანდელობაზე, ისტორიაზე ვფიქრობთ, არამედ იმ მომავალზე, რომელიც უნდა დაიბადოს, განვითარდეს თავისუფალ, დემოკრატიული ქვეყანაში, სადაც ჩვენს შვილებს, შვილიშვილებს აღარ მოუწევთ გამოსვლა სამართლიანი არჩევნების მოთხოვნით; აღარ მოუწევთ დაჭერა, დაჯარიმება, ქვეყნიდან გაქცევა იმის გამო, რომ ვიღაც უწესომ ურცხვად გაუყალბა არჩევნები და მიითვისა ძალაუფლება. ჩვენი ეს გადაწყვეტილება, ეს მუშტი სწორედ მომავალზეა გათვლილი. ეს არის გაფრთხილება სამომავლოდ, ყველასთვის, ვინც მოინდომებს გაამრუდოს ჩვენი ხალხის ნება და ქვეყანა გადაიფორმოს.

პარლამენტში განცხადება დიდი ხანია დაწერილი გვაქვს მეც და ჩემს კოლეგებსაც, მაგრამ ბიძინა ივანიშვილს და მის თანამოაზრეებს რატომღაც მიაჩნიათ, რომ ყველაფერი ფულით, ვაჭრობით იზომება. ძალიან მალე ზათქით დაიმსხვრევა ის სიმახინჯე, რომელიც ივანიშვილის მახინჯი აზროვნების შედეგებით შეიქმნა.

დატოვეთ კომენტარი

კომენტარები

მსგავსი სიახლეები

Back to top button
Close