“ერთი და იგივე ადამიანების ჯიბეებში ნაწილდება სახელმწიფო ბიუჯეტი”

გაჩეჩილაძე შინაგან საქმეთა სამინისტროში ჩატარებულ ტენდერებზე აუდიტის სამსახურის მიერ მომზადებულ დასკვნას გამოეხმაურა.

“იმაზე უარესი დასკვნა დადო, რასაც ჩვენ ვიძახდით და მე მიხარია, რომ ამ ქვეყანაში კიდევ შეიძლება სიმართლის პოვნა. ყოველთვის სახელმწიფოში მახინჯი ფორმები, რაც არსებობს, რაღაც დროის მონაკვეთში უნდა დამთავრდეს. ეს ძალიან კარგი საშუალებაა დღეს იმისთვის, რომ ეს აუტანელი პირობები, რომელიც არის დღეს სახელმწიფო შესყიდვებში, ეს რომ მორჩეს და ამას რომ დაესვას წერტილი, სახელმწიფო სტურქტურებიდან აქ ჩართული რომ არიან და სახელმწიფო სტრუქტურების გარეშე რომ ეს არ განხორციელდებოდა, ეს ფაქტია,“- განაცხადა გია გაჩეჩილაძემ.

ცნობისთვის, სახელმწიფო აუდიტის სამსახურმა საქართველოს შინაგან საქმეთა სამინისტროს ცენტრალური აპარატის 2016 წლის ფინანსური ანგარიშგების აუდიტი ჩაატარა.

აუდიტის სამსახური აღნიშნავს, რომ სამინისტროში ტენდერების თითქმის 50% ჩატარდა მხოლოდ ერთი პრეტენდენტის მონაწილეობით და შესყიდვის სავარაუდო ღირებულება უმეტეს შემთხვევაში არ შეცვლილა.

“აღნიშნული გარემოება მნიშვნელოვანი რისკის შემცველია, მით უმეტეს, რომ სამინისტროში არსებობს შესყიდვის სავარაუდო ღირებულების სწორად განსაზღვრის (ბაზრის კვლევის ჩატარებასთან) დაკავშირებული პრობლემა. უკონკურენტოდ ჩატარებული ტენდერების შერჩევითი ანალიზის შედეგად გამოვლინდა, რომ ჯამური სავარაუდო ღირებულება მხოლოდ 2.2%-ით შემცირდა, მაშინ, როდესაც მაღალი კონკურენციის პირობებში ჩატარებულ ტენდერებში თითქმის 50 %-იანი ეკონომია იქნა მიღწეული. სამინისტროს მიერ ორგანიზებულ ტენდერებში პრეტენდენტთა სიმცირე, ან საერთოდ ტენდერის ჩაშლა, ზოგიერთ შემთხვევაში განპირობებულია სატენდერო დოკუმენტაციით გათვალისწინებული არაპროპორციული საკვალიფიკაციო მოთხოვნებითა და სანქციებით, შესასყიდი საქონლისა და მომსახურების ტექნიკური პარამეტრების ზედმეტად დეტალიზებით და შესყიდვების წინამოსამზადებელი სამუშაოების არასათანადო წარმართვით. შესყიდვების დაგეგმვასა და განხორციელების პროცესში არსებული ხარვეზები საბიუჯეტო სახსრების
არაეკონომიური და არაპროდუქტიული ხარჯვის მომეტებულ რისკებს წარმოშობს”- აცხადებს აუდიტის სამსახური.