საზოგადოება

დიმიტრი ხუნდაძემ მცხეთელების 64%-იანი მხარდაჭერა მოიპოვა

დიმიტრი ხუნდაძემ საპარლამენტო არჩევნებში მცხეთის მაჟორიტარი დეპუტატობისთვის ბრძოლა მოიგო. საკუთარ გვერდზე მან მადლობა გადაუხადა საკუთარ ამომრჩეველს და მხარდამჭერებს. როგორც მისი მიმართვიდან ირკვევა, დიმიტრი ხუნდაძემ ქალაქ მცხეთისა და რაიონის მოსახლეობის, დევნილების გარდა, 64%-იანი მხარდაჭერა მოიპოვა. გამოდის, რომ მას 13% წეროვნის დევნილების ხმებმა დააკარგვინა. ის თხოვნით მიმართავს მცხეთელებს, რომ არ გაბრაზდნენ დევნილებზე და მხოლოდ სიყვარულით განაგრძონ ცხოვრება. როგორც ჩანს, მცხეთელები  გაბრაზდნენ, რადგან მათი სერიოზული მხარდაჭერა დიმიტრი ხუნდაძისადმი საბოლოოდ მხოლოდ 60-ხმიანი სხვაობით დაფიქსირდა. გთავაზობთ დიმიტრი ხუნდაძის მიმართვას უცვლელად:

„დამთავრდა 2016  წლის საპარლამენტო არჩევნები. ქალაქ მცხეთისა და რაიონის ამომრჩეველმა საკუთარი არჩევანი უკვე გააკეთა. მცხეთის საარჩევნო ოლქში გაიმარჯვა პარტიამ „ქართული ოცნება-დემოკრატიულმა საქართველომ“ და მისმა კანდიდატმა.

მსურს მადლობა გადაგიხადოთ თითოეულ თქვენგანს, ვინც გააკეთეთ საკუთარი არჩევანი. განსაკუთრებულ მადლობას ვუხდი ჩემს ამომრჩეველს ნდობისთვის და მხარდაჭერისთვის. ჩვენ არჩევნების ორივე ტურში გავიმარჯვეთ.  ეს გამარჯვება დიდი ბრძოლის და შრომის შედეგია.ჩვენ შიშველი ხელებით და ყველაზე მძლავრი იარაღით – ჩვენი სიმართლით ვიბრძოლეთ. მართალია, ეს ბრძოლა უთანასწორო იყო, მაგრამ სიმართლე და ღირსება ყოველთვის იმარჯვებს.

მსურს ყველას მოგილოცოთ ეს მართლაც დიდი გამარჯვება, განსაკუთრებით, ჩემი შტაბის აქტივისტებს, ჩემს თანაგუნდელებს. მე ვხედავდი თქვენს თავგანწირვას ამ ბრძოლაში. თქვენს ერთგულებაში ეჭვი არასოდეს შემპარვია და ეს ბრძოლაც თქვენი ერთგულებით მოვიგე. გპირდებით, ამას არასოდეს დავივიწყებ.

მინდა თხოვნით მოგმართოთ ქალაქ მცხეთისა და მცხეთის თემის მოსახლეობას: თქვენ საუბრობთ და  ამაყობთ იმით, რომ მე თქვენგან 64%-იანი მხარდაჭერა მივიღე, ამით მეც ვამაყობ, მაგრამ გთხოვთ, ნუ გავბრაზდებით ჩვენს დევნილებზე, ჩვენს ძმებზე, რომ მათმა დიდმა ნაწილმა მხარი არ დაგვიჭირა.  მათ დიდი ტკივილი გადაიტანეს და განსაკუთრებული თანადგომა სჭირდებათ. ისინი დღეს უკვე ჩვენი კუთხის შვილები არიან და მათაც საკუთარი არჩევანი გააკეთეს. საარჩევნო პერიოდი დამთავრდა და ჩვენ ერთად უნდა განვაგრძოთ კეთილდღეობისთვის წინსვლა.

 ასევე მივმართავ მცხეთელების იმ მცირე ნაწილს, ვინც მხარდაჭერა გამოუცხადა ჩემს ოპონენტს, ჩვენ ერთი ქალაქის და ერთი რაიონის მკვიდრნი ვართ. პოლიტიკა და არჩევნები დროებითია, ჩვენ კი ამ ყველაფრის შემდეგ ერთმანეთის პირისპირ ვრჩებით როგორც ერთი მიწის შვილები. სწორედ ამიტომ გთხოვთ, რომ ხვალიდან მეგობრული და კეთილგანწყობილი ცხოვრება დავიწყოთ, როგორც ღირსეულ მცხეთელს შეშვენის.

კიდევ ერთხელ მსურს მადლობა გადაგიხადოთ ჩემი მხარდაჭერისთვის. გჯეროდეთ, მომავალი 4 წელი უკეთესი ცხოვრების წლები იქნება თქვენთვის“.

დატოვეთ კომენტარი

კომენტარები

მსგავსი სიახლეები

Leave a Reply

Your email address will not be published.

Back to top button
Close