დედა მთხოვდა, მიშველე, ექიმი მოვიდესო… _ ნატალია ხოხიაშვილი სასწრაფო დახმარებას უჩივლებს

11/29/2016

582

არასამთავრობო ორგანიზაციის -„ახალი თაობა – დემოკრატიული საქართველო“-ს ხელმძღვანელი, ნატალია ხოხიაშვილი რედაქციაში დაგვიკავშირდა და აღშფოთებულმა გვითხრა, რომ მოულოდნელად დედა გაუხდა ავად, სასწრაფო გამოიძახა, მაგრამ ის საათნახევრის განმავლობაში არ მივიდა მათთან, ამიტომ იძულებული გახდა, ექიმი თავად მოეძებნა, გამოძახება კი გაეუქმებინა.

ნატალია ხოხიაშვილი:

_ ხშირად მსმენია, რომ ადამიანის გარდაცვალების შემთხვევებს მისი ახლობლები სასწრაფო დახმარების დაგვიანებით ხსნიან. ვერ წარმომედგინა, როგორ შეიძლებოდა სასწრაფოს ისე დაეგვიანა, რომ ფატალური შედეგი დამდგარიყო. ვერ ვიჯერებდი, რომ ასეთი უპასუხისმგებლობა შესაძლებელი იყო. ახლა ეს ყველაფერი საკუთარ თავზე გამოვცადე.

28 ნოემბერს, 23:49 წუთზე 112 -ში დავრეკე და დედაჩემისთვის, ვენერა ხოხიაშვილისთვის სასწრაფო დახმარების ბრიგადის გამოძახება მოვითხოვე. სიმპტომების ჩამოთვლისას ვუთხარი, გული აქვს ცუდად მეთქი. დედა მართლაც ძალიან ცუდად იყო, ფერი დაეკარგა, გულზე იკიდებდა ხელს, მტკივაო _ იძახდა. მოუთმენლად ველოდებოდით სასწრაფოს მოსვლას, მაგრამ სულ ტყუილად. იძულებული გავხდი, 1 საათისა და 20 წუთის შემდეგ გამოძახება გამეუქმებინა.

_ რატომ გააუქმებინეთ გამოძახება, დაიგვიანა სასწრაფომ?

_ დედა მთხოვდა, მიშველეთო და გამუდმებით მეკითხებოდა, სასწრაფო არ მოვიდაო? მეც გამოძახებიდან ყოველ 10 წუთში ვრეკავდი და ბრიგადის დაჩქარებას ვითხოვდი. ერთსა და იმავეს მპასუხობდნენ_ გამოძახებიდან ჯერ არ დაბრუნებულან და თავისუფალი ბრიგადა არ გვყავსო. დედამ ტირილი დაიწყო და იძულებული გავხდი, თავად წამეყვანა საავადმყოფოში. მივხვდი, რომ სასწრაფოს ლოდინს აზრი აღარ ჰქონდა. გამოძახების გაუქმებისას ნერვები ვერ მოვთოკე და ვიჩხუბე, მაგრამ ჭკუის დარიგება დამიწყეს _ სასწრაფო დახმარება თბილისის მერიას ეკუთვნის და შეგიძლიათ, ცხელ ხაზზე დარეკოთო. არ ვიცი რა დავარქვა მათ საქციელს. როცა სასწრაფოს ვიძახებ და ვეუბნები, ასაკიანი ადამიანია, გულის პრობლემა აქვს და საშველად ვუხმობ მათ, ეს ხომ უნდა გაითვალისწინონ?

ძალიან მაინტერესებს, სხვა რა პრიორიტეტები აქვს მერიას, რას აფინანსებს და ბიუჯეტს როგორ იყენებს, როცა სასწრაფო სამედიცინო დახმარებას ავტომანქანები არ ჰყავს და მძიმე მდგომარეობაში მყოფ პაციენტებთან ექიმი ვერ მიდის. სხვა თუ არაფერი, 1 წელიწადში თვითმმართველობის არჩევნები ჩატარდება და არ უნდა დაფიქრდნენ?

_ მომხდარის გამო ჩივილს ხომ არ აპირებთ?

_ ამ საკითხებზე კონსულტაციას გავივლი ჩვენი ორგანიზაციის იურისტებთან და ერთად გადავწყვეტთ, რა სახის სამართლებრივი პასუხისმგებლობა შეიძლება დავაკისროთ უპასუხისმგებლო ჯანმრთელების დამცველებს. პასუხს აუცილებლად მოვთხოვ, რადგან არ შეიძლება ადამიანებს ასე მოექცე. მე საშუალება მქონდა და საავადმყოფოში წავიყვანე დედა, მაგრამ ისეც ხომ ხდება, რომ ადამიანის სიკვდილ-სიცოცხლეს წამები წყვეტს. საინტერესოა, ასეთ დროს, რით უნდა იმართლონ თავი?

წყარო postalioni.com