„არა ოკუპაციას” – გორში გავრილოვის ვიზიტი და აქციის მონაწილეთა მიმართ გამოყენებული ძალისმიერი მეთოდები გააპროტესტეს. ცენტრალურ მოედანზე სკოლების მოსწავლეები შეიკრიბნენ და გუშინ განვითარებული მოვლენები დაგმეს.

მათ საქართველოს ჰიმნი იმ მოედანზე შეასრულეს სადაც 2008 წელს კასეტური ბომბების ჩამოგდების შედეგად რამდენიმე ადამიანი დაიღუპა.მათი განმარტებით აქცია აპოლიტიკურია და ისინი არც ერთ პოლიტიკურ ძალას არ ემხრობიან.

გორის პარალელურად ბათუმში და ქუთაისში საპროტესტო აქცია ,,ნუ მესვრი“ მიმდინარეობს.

პარლამენტთან საპროტესტო აქცია განახლდა. პროტესტის მონაწილეები შს მინისტრის პასუხისმგებლობის საკითხის დაყენებას მოითხოვენ.

გიორგი გახარიას თქმით, პოლიციამ ბოლომდე გამოიყენა თმენის ვალდებულება, ვიდრე ადამიანების სიცოცხლეს არ დაემუქრა საფრთხე.

დღეს „ქართული ოცნების“ ოფისში პოლიტსაბჭოს დასრულების შემდეგ ოფიციალურად გახდა ცნობილი, რომ ირაკლი კობახიძემ თანამდებობა დატოვა.

ზაქარია ქუცნაშვილი სადეპუტატო მანდატს ტოვებს.

დღის ბოლოს შსს-ში გამართულ ბრიფინგზე ცნობილი გახდა, რომ უგულავას, მელიასა და ოქრუაშვილს ჯგუფური ძალადობის ორგანიზების საქმეზე გამოკითხავენ.

20 ივნისს ღამით, პარლამენტის შენობის წინ სპეცრაზმმა რამდენჯერმე გამოიყენა ცრემლმდენი გაზი, ბოლოს კი აქციის მონაწილეები წყლის ჭავლით დაშალა, ასევე გამოიყენა რეზინის ტყვიები.

სამედიცინო დაწესებულებებში გადაყვანილი 240 პაციენტიდან საავადმყოფოებში რჩება 55.

240-დან 80 იყო პოლიციელი. შსს-ს ინფორმაციით, სხვადასხვა სამართალდარღვევისთვის დაკავებულია აქციის 305 მონაწილე.

20 ივნისს, დილით პარლამენტის თავმჯდომარისთვის განკუთვნილი ადგილიდან მართლმადიდებლური საპარლამენტთაშორისო ასამბლეის წევრებს სიტყვით რუსეთის დუმის კომუნისტური პარტიის წევრმა სერგეი გავრილოვმა მიმართა, რასაც საკანონმდებლო ორგანოსთან მოგვიანებით საპროტესტო აქცია მოჰყვა.

დატოვეთ კომენტარი

კომენტარები