საზოგადოება

გიორგი გუგავა: „ვივუსის,, უკან დგას ვალერი გელაშვილი

ონლაინ სესხებთან დაკავშირებით, მთავრობა ნაბიჯებს არ დგამს. დრო კი მიდის და ონლაინ სესხების „ჭაობში“ სულ უფრო და უფრო მეტი საქართველოს მოქალაქე, ოჯახი იძირება, მეტი ადამიანი რჩება უსახლკაროდ, იკლავს თავს და ა.შ. ლეიბორისტული პარტია თითქმის ყოველდღიურ რეჟიმში, ონლაინ ბანკების ოფისებთან აქციებს ატარებს და ითხოვს, მოსახლეობას გაუნულოს ონლაინ სესხები, სახელმწიფომ კი ონლაინ ბანკებს მკაცრი რეგულაციები დაუწესოს.
გიორგი გუგავა, ლეიბორისტული პარტიის ერთ-ერთი ლიდერი:
_ ლეიბორისტულ პარტის დიდი ხანია დაწყებული აქვს ონლაინ სესხებისა და მიკროსაფინანსო ორგანიზაციების წინააღმდეგ ბრძოლა. ვატარებთ აქციების სერიას ამ თაღლითური ორგანიზაციების წინააღმდეგ, რომლებიც ხელშეწყობილები არიან ხელისუფლების მხრიდან და უპრეცედენტოდ მაღალი საპროცენტო განაკვეთები, საურავები და ჯარიმები აქვთ დაწესებული. ხშირ შემთხვევაში საპროცენტო განაკვეთი არის 500-1000%, რაც წარმოუდგენელია.
ყველაზე მაღალი საპროცენტო განაკვეთი აქვს „ემა-კრედიტს“. ამ ორგანიზაციასთან უკვე ჩავატარეთ აქცია, მაგრამ მისი ხელმძღვანელები დაიმალნენ, არც ჩვენ მოგვცეს განმარტებები და არც ჟურნალისტებს, თუმცა სათქმელიც არაფერია, მათ უამრავი ადამიანის ცოდვაში უდგათ ფეხი. ბევრი მათი მოვალე თვითმკვლელობებით ასრულებს სიცოცხლეს, რადგან კოლოსალურად გაბერილ თანხებს ვეღარ იხდიან.
_ ასეთი ფაქტების შესახებ თქვენთვის ცნობილია?
_ პირველად სწორედ „ფოსტალიონი“ წერდა, რომ ახლახანს, კახეთში, საკრედიტო დავალიანების გამო, ახალგაზრდა მამაკაცმა მოიკლა თავი. ამ სტატისტიკას უნდა აწარმოებდეს შინაგან საქმეთა სამინისტრო და ასეთ საქმეებს თვითმკვლელობამდე მიყვანის მუხლით უნდა ღძრავდეს, რაც არა მგონია ასე იყოს. არავის გვსმენია, რომ ამის გამო, რომელიმე ონლაინ ბანკის მესვეური დასაჯეს. ასეთი ტრაგედია კი ძალიან ხშირია. ჩვენმა მეგობარმა აიღო 600 ლარი „ემა-კრედიტიდან“, გადაუცდა რამდენმე დღე, ვერ გადაიხადა და საბოლოოდ, 600 ლარი გადაუქციეს 2 100 ლარად.
ცივილურ სამყაროში, ბევრგან, საერთოდ აკრძალულია ონლაინ სესხების გაცემა, მაგრამ სადაც ფუნქციონირებს, მკაცრად არის დარეგულირებული და დაწესებულია დაბალი საპროცენტო განაკვეთი. ძირითადად ონლაინ სესხის დანიშნულებაა, კრედიტი გასცეს ხელფასიდან ხელფასამდე, ამიტომ ნორმალურ ქვეყნებში არ ხდება საურავების დარიცხვა თანხის შეტანის გადაცდენის დროს. თუ სამსახური დაკარგა მოქალაქემ, მას უჩერებენ პროცენტებს და სესხის მოთხოვნას, სანამ ახალ სამსახურს არ დაიწყებს. სწორედ ამიტომ მივმართავთ საქართველოს მთავრობას, დაუყოვნებლივ მიიღოს საკანონმდებლო ნორმა, რომლითაც მკაცრად დარეგულირდება ეს სფერო. მოვითხოვთ, გაუნოლონ მოქალაქეებს უკანონოდ დაკისრებული პროცენტის პროცენტები, საურავები, ჯარიმები, საკომისიოები და საერთოდ აკრძალონ ასეთი თაღლითური ქმედებები ამ ორგანიზაციების მხრიდან.
_ მთავრობის გადაწყვეტილებით, ონლაინ სესხების გამცემი კომპანიების საქმიანობას ეროვნული ბანკი დაარეგულირებს, თუმცა ხელისუფლების წარმომადგენლები იმასაც ამბობენ, რომ ონლაინ სესხების აკრძალვაზე საუბარიც კი აბსურდულია. როგორ ფიქრობთ, რამდენად არის შესაძლებელი ასეთი რეგულაციების დაწესება და თუ მართლა შეიცვალა, რეალობაში რამდენად განხორციელდება იგი?
_ საქართველოში, როგორც ხედავთ, სურვილიც არ გააჩნიათ, რომ დარეგულირდეს ეს სფერო, რადგან ხშირ შემთხვევაში, ასეთი მიკროსაფინანსო ორგანიზაციების უკან დგანან ხელისუფლების წარმომადგენლები. ჩვენი აქციები მიზნად ისახავს არა მხოლოდ ამ ორგანიზაციების მხილებას, არამედ იმასაც, რომ ხელისუფლებამ დააჩქაროს ისეთი კანონის მიღება, რომელიც დაარეგულირებს ონლაინ სესხებს და მოსახლეობას ჩამოაჭრის უკანონოდ დარიცხულ საურავებს. თუ ამას ხელისუფლება არ გააკეთებს, გავაკეთებთ ჩვენ, არჩევნების შემდეგ, რათა ჩვენი მოსახლეობა გამოვიხსნათ ამ თაღლითური ორგანიზაციის კაბალისაგან. ამას სჭირდება ერთი მარტივი ნორმის აღდგენა სამოქალაქო კოდექსში, რომელიც განსაზღვრავს დაბალ საპროცენტო განაკვეთს. ამ ნორმით უნდა იმუშავონ არა მარტო მიკროსაფინანსოებმა, არამედ ბანკებმაც. ეს უნდა იყოს წმინდა საკრედიტო საქმიანობა და არა სხვისი ქონების თაღლითურად დატაცების მაქინაცია.
_ ამ პრობლემის მოგვარებას სჭირდება მხოლოდ კეთილი ნება?
_ რა თქმა უნდა. ამ კანონის მიღება შესაძლებელია ერთ კვირაში. დიახ, ერთ კვირაში შესაძლებელია საკომიტეტო მოსმენები გაიაროს, გაიტანონ სესიაზე და მიიღონ კანონი. თუ იმისთვის მოიცალეს, რომ ემსჯელათ პარლამენტში ჩოხა-ახალუხით, ყაბალახით თუ ჩიხტიკოპით ეარათ, თუ იმისთვის მოიცალეს, რომ ბუსუსიანი პრეზერვატივებისთვის დღეები, თვეები და საკომიტეტო მოსმენები მიეძღვნათ, თუ იმისთვის მოიცალეს, რომ პრემიები გამოეწერათ, მივლინებებში ევლოთ, როგორ ვერ უნდა მოიცალონ ასეთ სასიცოცხლოდ მნიშვნელოვანი საკითხისთვის?!.
_ თქვენი აზრით რატომ ვერ მოიცალეს?
_ ეს მეტყველებს იმაზე, რომ ამ ყველაფრის უკან სწორედ ხელისუფლების წარმომადგენლები დგანან. აქციების დროს ჩვენ თანდათანობით ვამხელთ, რომელი დეპუტატი რომელი კომპანიის უკან დგას. ექსკლუზიურად კი „ფოსტალიონს“ ვეტყვი, რომ „ვივუსის“ უკან დგას ვალერი გელაშვილი. მოგეხსენებათ, მისი კაპიტალი არის ლიტვაში, სადაც „ვივუსის“ საქმიანობა აკრძალეს და მანაც ეს საქმიანობა გადმოიტანა საქართველოში. ძირითადად 2012 წლის შემდეგ გაშალა ფრთები ამ ორგანიზაციამ საქართველოში და ცხრა პირ ტყავს აძრობს ჩვენს თანამოქალაქეებს.
_ აქციებს გაგრძელდებთ?
_ აქციები გაგრძელდება პრობლემის ამოწურვამდე. თუ ხელისუფლება რეაგირებას არ მოახდენს, ეს ასეულობით ადამიანი თავის გადაწყვეტილებას გამოხატავს არჩევნებზე, რაც იქნება დღევანდელი ხელისუფლების მძიმე განაჩენი.

 

წყარო: postalioni.com

დატოვეთ კომენტარი

კომენტარები

მსგავსი სიახლეები

Leave a Reply

Your email address will not be published.

Back to top button
Close