გადამრჩენელ მეთევზესთან შესახვედრად პინგვინი წელიწადში 8 000 კმ-ს გადის
ინტერნეტ-სივრცე დაიპყრო ამბავმა პინგვინის შესახებ, რომელიც ყოველ წელს ათასობით კილომეტრს გადის, რათა მოინახულოს მამაკაცი, რომელმაც ის გადაარჩინა.
სააგენტო Metro-ს ცნობით, 2011 წელს, რიო-დე-ჟანეიროს სიახლოვეს მდებარე ერთ-ერთი კუნძულის მაცხოვრებელმა მამაკაცმა სანაპიროს კლდეებში, ნავთობში თითქმის დამხრჩვალი სამხრეთ ამერიკაში გავრცელებული მაგელანის პინგვინი იპოვა.
სიკვდილის პირას მყოფი პინგვინი ადგილობრივმა მეთევზემ, 71 წლის ჟუან პერეირა დე სოუზამ გადაარჩინა.
მეთევზემ მომაკვდავი პინგვინი სახლში წაიყვანა და მასზე ზრუნვა დაიწყო, ჩამორეცხა ნავთობი და თევზით კვებავდა. ბრაზილიური ტელეკომპანია GloboTV-ის მიერ მომზადებული სიუჟეტის მიხედვით, ნავთობისგან სრულ გათავისუფლებას 1 კვირა დასჭირდა.
პერეირა დე სოუზამ პინგვინს დინდინი დაარქვა. ერთი კვირის შემდეგ, როდესაც უკვე მომჯობინდა, მეთევზემ მისი ზღვაში გაშვება გადაწყვიტა, თუმცა პინგვინმა ეს არ ისურვა.
„დინდინი ჩემთან 11 თვე დარჩა. ამასობაში გამოიცვალა ბუმბულის საფარველი და ამის შემდეგ, ერთ დღესაც გაუჩინარდა“, — უთხრა მეთევზემ Metro-ს.
პერეირა დე სოუზა ფიქრობდა, რომ პინგვინი აღარ დაბრუნდებოდა, მაგრამ რამდენიმე თვის შემდეგ, ერთ მშვენიერ დღესაც, იგი მეთევზეს სახლში მიადგა.
„მე ის საკუთარი შვილივით მიყვარს და მჯერა, რომ პინგვინსაც ვუყვარვარ“, — განუცხადა მეთევზემ GloboTV-ს.
ამის შემდეგ, დინდინი ყოველ წელს კუნძულზე ბრუნდება. მეთევზესთან ის უკვე მეხუთეჯერ დაბრუნდა.
წელიწადის რვა თვეს პინგვინი ბრაზილიის კუნძულზე, თავის გადამრჩენელთან ატარებს, დანარჩენ დროს კი სამხრეთში, ანტარქტიდისკენ.
წყარო: tv1.ge
