საზოგადოება

“ბავშვი დაიჭირა, მაგრამ წყლიდან ვეღარ ამოვიდა, ბავშვიანად დაიხრჩო…”

რამდენიმე დღის წინ, ადიგენის მუნიციპალიტეტის მდინარე ქვაბლიანზე უდიდესი ტრაგედია დატრიალდა, – მდინარის არხში 8 წლის შაქრო ენდელაძე და მისი 45 წლის მამიდა, ელზა ენდელაძედაიხრჩვნენ. მომხდარით შეძრულია სოფელი ხევაშენი, სადაც ენდელაძეები ცხოვრობენ. მოსახლეობის თქმით, ენდელაძეების ოჯახი ბავშვებს წამითაც არ ტოვებდა უმეთვალყურეოდ, თუმცა, უბედურება მაინც მოხდა. სოფელ ხევაშენის სკოლის დირექტორი ცისანა ობოლაძე:

– ჩვენი პატარა ბიჭი ისეთი სიცოცხლითა და სიკეთით იყო სავსე, რომ შეუძლებელი იყო, ყურადღება არ მიგექცია. მისი სახლი სკოლასთან ახლოს დგას და არდადეგები რომ იწყება, მაშინაც სულ ვხედავდი. ძალიან ჭკვიანი და გონიერი ბავშვი იყო.

– გავრცელებული ინფორმაციით, ტრაგედია მამიდასთან სტუმრად ყოფნისას დატრიალდა…

– კი, უფროს დასთან ერთად იყო წასული მამიდასთან სტუმრად. ქალი ქვრივი იყო, შვილები მარტომ გაზარდა, ძმისშვილებზეც მზე და მთვარე ამოსდიოდა.  არაფერს იშურებდა მათთვის, ბავშვებს მამიდა უყვარდათ და მასთან საკმაოდ ხშირად იყვნენ. სადილის შემდეგ შაქროს უხვეწნია, – საბანაოდ წამიყვანე არხზეო და მანაც ხათრი ვეღარ გაუტეხა.

– არხი ღმაა?

– ეს მდინარე ქვაბლიანზე აგებული კახარეთჰესის არხია. ასეთი არხები ღრმა არ არის, ალბათ 2 მეტრამდე არც კი იქნება. ბავშვებიც ხშირად ბანაობენ შიგ. წყალს გაჰყვებიან ხოლმე. ერთ ადგილზე თოკი აქვთ გაბმული, ცურვისას იმ თოკს წაავლებენ ხელს და უკან ბრუნდებიან. შაქროს თოკზე ხელი აუცდა და შეშინებული ბავშვი წყალმა წაიღო. მამიდამისმა ეს რომ დაინახა, იმ წამსვე წყალში გადაეშვა და ბავშვი დაიჭირა, მაგრამ ზემოთ ვეღარ ამოვიდა, ბავშვიანად დაიხრჩო… ალბათ გული წყალწაღებული ძმიშვილის დანახვით გამოწვეულმა შიშმა გაუხეთქა.

– ადგილზე სხვა არავინ იყო?
– შაქროს უფროსი და – 10 წლის გოგონა. პატარამ უმძიმესი სურათი ნახა და შოკშია.

წყარი: kvirispalitra.ge

დატოვეთ კომენტარი

კომენტარები

მსგავსი სიახლეები

Leave a Reply

Your email address will not be published.

Back to top button
Close