საზოგადოება

,,ამბობდა: ამ დალეწილი თავპირის ტკივილი ისე არ მაწუხებს, როგორც ღირსების შელახვაო…”

,,ლექსოს ღირსების” საქმეა 5 ივლისის სასაკლაო, რომელიც ამ ხელისუფლებამ მოაწყო ბნელი რადიკალებით და ყველამ უნდა აგოს პასუხი!"

,,ლექსო იყო” … როცა წერას და ფიქრს ასე იწყებ, ყველაფერი აზრს კარგავს და დამთავრებულია!
ახლა სიბრაზე კი არა, უსუსურობა მახრჩობს, დაუცველობა მაშინებს და ლექსოს აღარ ყოფნა, საერთოდ მანგრევს. არადა, გუშინ სატელევიზიო ჩაწერაზე- მირანდა, ლექსო და მე ერთად ვიყავით. სახლშიც ერთად წამოვედით. გზაში სულ ამ ამბებზე ვლაპარაკობდით- ლექსო, სულ იმას გვიმეორებდა მე და მირანდას, რომ ბოლომდე უნდა მივიყვანოთ ჩვენი საქმეო, სტრასბურგში გავაგრძელოთ დავა, შევიკრიბოთ ყველა დაზარალებულიო… ჩვენებური სტრატეგიაც დავსახეთ – ,,ეროვნული სამართალი” მოვილიოთ და მერე ეტაპობრივად გადავდგათ ნაბიჯითქო… კიდე იმაზე ლაპარაკობდა – მირანდას როგორ ვაცემინებდი, როგორ არ დავიცავდიო… ამ დალეწილი თავპირის ტკივილი ისე არ მაწუხებს, როგორც ღირსების შელახვაო…
ჯერ მირანდა დარჩა სახლთან, მერე მე და ლექსო დოლიძის ქუჩას ავუყევით და მის ბინასთან დავემშვიდობე…. მანქანიდანაც რომ გადავიდა – მისი ბოლო ფრაზაც ამ საქმეს ეხებოდა – ,,დეა, უნდა მივიყვანოთ ბოლომდე ხომ იცი”?!… კიდევ რაღაც დეტალები, რაც მისი პირადი გეგმები იყო და ახლა აზრი დაკარგა…
ახლა უკვე ,,53 ჟურნალისტის” კი არა, ,,ლექსოს ღირსების” საქმეა 5 ივლისის სასაკლაო, რომელიც ამ ხელისუფლებამ მოაწყო, თავისი უმოქმედობით და არა მარტო ბნელი რადიკალები, არამედ პირველ რიგში ხელისუფლებამ უნდა აგოს პასუხი!
პირველად ვამბობ როგორც ჟურნალისტი რომ – არ მინდა ხელისუფლების და მმართველი გუნდის წევრების ჩაწერა, მათი გაშუქება და იმის კიდევ ერთხელ მოსმენა რომ ყველაფერი გააკეთეს 5 ივლისს.
ლექსო მხოლოდ იმიტომ აღარ არის ჩვენს გვერდით რომ თქვენ ვერაფერი გააკეთეთ და ვერ დაიცავით! ნამუსი და სინდისი თუ არ გაქვთ, შვილები ხომ გყავთ??? სხვისი დედის შვილი, დავიჯერო, მართლა, არ გტკივათ?!
ლექსოს სახელით და ლექსოსთვის ,,5 ივლისის საქმე” ბოლომდე მივა!
დეა მამისეიშვილი, ჟურნალისტი

დატოვეთ კომენტარი

კომენტარები

მსგავსი სიახლეები

Back to top button
Close