2016 წლის 1-2 დეკებერს ბრიუსელში გაიართა CCBE-ის პლენარული სესია, სადაც სხვა საკითხებთან ერთად, ჩატარდა ორგანიზაციის პრეზიდენტის და ვიცე-პრეზიდენტის არჩევნები. ღონისძიებაში საქართველოს დელეგაციაც იღებდა მონაწილეობას.  სხდომას წინ უძღვოდა PECO კომიტეტის შეკრება. PECO კომიტეტი არის ერთ-ერთი უმთავრესი კომიტეტი, რომელიც მუშაობს ცენტრალურ და აღმოსავლეთ ევროპის ადვოკატთა ორგანიზაციების საკითხებზე. გაფართოებულ შეხვედრაზე, სიტყვით გამოვიდა ადვოკატთა ასოციაციის თავმჯდომარე, ზაზა ხატიაშვილი. მან ხაზი გაუსვა საქართველოს ადვოკატთა ასოციაციის მიღწევებს პროფესიული დამოუკიდებლობის თვალსაზრისით. ასევე ისაუბრა იმ გამოწვევებზე, რომლის წინაშეც ქართველი ადვოკატები დგანან.

    ადვოკატთა ასოციაციის წარმომადგენელმა CCBE-იში, ადვოკატთა ასოციაციის საერთაშორისო მდივანმა, დავით ასათიანმა გვითხრა, რომ შეკრებაზე მნიშვნელოვან პრობლემად იქნა აღიარებული ადვოკატ გიორგი მდინარაძის მიმართ ძალადობის ფაქტი, რომელიც განხორციელდა პოლიციის მხრიდან გასულ წელს.

დავით ასათიანი:

_ ჩვენ აღვნიშნეთ, რომ ეს იყო საგანგაშო შემთხვევა და პროკურატურამაც უკვე წარუდგინა ბრალი პოლიციის მაღალჩინოსანს სამსახურეობრივი უფლებამოსილების გადამეტების მუხლით, ახლა კი მიმდინარეობს სასამართლო პროცესი. ევროპაში, ასეთი ტიპის ქმედებები _ ადვოკატზე ძალადობა, მათთვის ხელბორკილების დადება და ცემა, თანაც პოლიციის უფროსის მიერ, იმის გამო, რომ ადვოკატმა კლიენტს გაუწია იურიდიული დახმარება, არის წარმოუდგენელი. ამიტომ, აღნიშნული ფაქტის შესახებ ინფორმაციამ მსმენელში გარკვეული შოკიც გამოიწვია, რადგან ევროპაში, ალბათ, უკვე საუკუნეებია ასეთი რამ აღარ მომხდარა. ჩვენმა ევროპელმა კოლეგებმა ძალიან სკურპუროზულად მოისმინეს ანგარიში, თუ რა ხდება ამ საქმესთან მიმართებით. მათ განაცხადეს, რომ ბოლომდე თვალყურს მიადევნებენ ამ საქმეს. მზად არიან, სპეციალური მისიითაც ჩამოვიდნენ და დაესწრონ სასამართლო პროცესებს, რათა მაქსიმალურად იყოს დაცული დაზარალებული ადვოკატის უფლებები და ინტერესები.

ზაზა ხატიაშვილმა ამ ღონისძიებაზე საპროტესტო აქციაც მოაწყო მდინარაძის ფოტოებით, რომელზეც კარგად ჩანს ადვოკატის დაზიანებები. ამ ფოტოებით პლენარულ სესიაზე მყოფმა ადვოკატებმა სიმბოლურად გამოხატეს პროტესტი და აღნიშნეს, რომ ასეთი რამ დაუშვებელია და არ უნდა ხდებოდეს არცერთ ნორმალურ და დემოკრატიულ ქვეყანაში.

_ სესიაზე კიდევ რა საკითხებზე გაამახვილა ქართულმა დელეგაციამ ყურადღება ?

_ ყურადღება გამახვილდა იმაზეც, რომ საქართველოში ხშირად ფიქსირდება ფაქტები, როცა ადვოკატს აიგივებენ მის კლიენტთან, რომელიც ხშირ შემთხვევაში, ეჭვმიტანილია მძიმე დანაშაულში ან სხვა უკანონო გარიგებებში, ამის გამო კიცხავენ კიდეც ადვოკატს. ამ დროს ადვოკატის შესახებ ყალიბდება უარყოფითი საზოგადოებრივი აზრი, აკერებენ მას სხვადასხვა იარლიყებს, რა დროსაც ადვოკატს დიდი საზოგადოებრივი ზეწოლისა და ემოციური სტრესის პირობებში უწევს კლიენტის დაცვა. ამის უმთავრესი მიზეზი გახლავთ ის, რომ სრულფასოვნად არ არის გაცნობიერებული ადვოკატის როლი და დანიშნულება საზოგადოებაში.

„გაეროს პრინციპები ადვოკატთა როლის შესახებ“, რომელიც 1980 წელს დამტკიცდა, კრძალავს მსგავს დამოკიდებულებებს და ამბობს, რომ სახელწიფომ მაქსიალურად უნდა იმუშავოს და შექმნას შესაბამისი პირობები, იმისათვის, რომ არ მოხდეს ადვოკატის კლიენტთან იდენტიფიცირება და მან დაცვა განხორციელოს დამოუკიდებლად, ყოველგვარი ზეგავლენის და მის საქმიანობაში ყოველგვარი ჩაურევის გარეშე. ადვოკატი თავისუფლად უნდა ახორციელებდეს კლიენტის ინტერესების დაცვას მიუხედავად იმისა, ვინ არის კლიენტი და რა დანაშაულში მიუძღვის მას ბრალი.

  _ კონკრეტული ფაქტების განხილვაც მოხდა სესიაზე?

_ სხვადასხვა ქვეყნებიდან ჩამოსული დელეგაციების წევრებმა ისაუბრეს კონკრეტული ადვოკატების მიმართ განხორციელებულ ზეწოლებზე და სხვა სახის ძალადობებზე თავიანთ ქვეყნებშიც. არსებობს სპეციალური მისიები, რომლებიც ფაქტების მოძიების მიზნით ჩადიან ამა თუ იმ ქვეყანაში და ადვოკატთა უფლებების ყველა დარღვევას ადასტურებენ მტკიცებულებებით, რაზედაც სათანადო რეაგირება აქვთ როგორც CCBE-ის, ისე ევროკავშირის შესაბამის სტრუქტურებს.

 _ ევროსტრუქტურებს სხვადასხვა ქვეყნის ხელისუფლებებზე ზეწოლის ბერკეტიც გააჩნია?

_ CCBE-ი არ არის პოლიტიკური ორგანიზაცია, მაგრამ მას ჰყავს ძლიერი ლობი ევროპის პარლამენტში, ევროკომისიაში. ევროპელი პოლიტიკოსები მიმართავენ კონკრეტულ სახელმწიფოებს, რომ განახორციელონ შესაბამისი ქმედებები სამთავრობო დონეზე. მოუწოდებენ ხელისუფლებებს, რომ პოლიტიკური დიალოგის ფარგლებში, ადვოკატთა წინააღმდეგ არსებული საქმეები, მათზე ზეწოლა თუ ძალადობა სწორად იქნას შეფასებული და დროულად გამოძიებული, რადგანაც ადვოკატის თავისუფალ და შეუზღუდავ გარემოებაში მუშაობა არის მთავარი წინაპირობა ქვეყანაში სამართლიანი და ხარისხიანი მართლმსაჯულების არსებობისა. თუ ადვოკატი თავად არაა დაცული უკანონობისაგან, ჩვეულებრივი ადამიანების, მათი კლიენტების უფლებების დაცვა სრულიად წარმოუდგენელია.

_ ვთქვათ, მიმართეს ჩვენი ქვეყნის ხელისუფლებას, მაგრამ მათ არ გაითვალისწინეს უცხოელი პოლიტიკოსების რეკომენდაციები, ასეთ შემთხვევში როგორ იქცევიან, ზემოქმედების სხვა მექანიზმიც გააჩნიათ?

_ პოლიტიკური ზემოქმედების სხვადასხვა ფორმები არსებობს. თუ ხდება ძალიან მნიშვნელოვანი დარღვევები სახელმწიფოს მხრიდან, ადვოკატის უფლებების საკითხებში ან მართლმსაჯულების სფეროში, საერთაშორისო ორგანიზაციები ქვეყანას უზღუდავენ მნიშვნელოვან ღონისძიებებში მონაწილეობის საშუალებას. საერთაშორისო თანამეგობრობას აქვს მრავალი პოლიტიკური თუ სამართლებრივი ინსტრუმენტი, რომლითაც აიძულებენ სხვადასხვა ქვეყანას დაადგეს სამართლიანობის გზას და დაიცვან სამართლის უზენაესობა. სამართლიანობა მოითხოვს, აღინიშნოს, რომ ადვოკატ მდინარაძის ფაქტი თავისთავად გამონაკლისია და ის არ მიეკუთნება სისტემური დანაშაულებების კატეგორიას. იშვიათ შემთხვევაში თუ მოუვა რომელიმე პოლიციელს თავში, რომ ადვოკატზე იძალადოს და ცემოს პოლიციის განყოფილებაში და მთავარმა პროკურატურამაც ეფექტურად მოახდინა გამოძიება. თუმცა მიუხედავად ამისა, აღნიშნულ შემთხვევაზეც CCBE-ის მწვავე რეაქცია ჰქონდა. ამიტომ, სახელმწიფომ უნდა უზრუნველყოს, რომ აღარასოდეს განმეორდეს მსგავსი ფაქტები, რომელიც დიდ დარტყმას აყენებს ქვეყნის იმიჯს და საქართევლოს დემოკრატიული განვითარების მომავალს.

წყარო” postalioni.com

დატოვეთ კომენტარი

კომენტარები

Загрузка...