„სვანიძის ქუჩის დაზარალებულთა კომიტეტი“ განცხადებას ავრცელებს, რომლითაც თბილისის მერიას მოუწოდებს 13-14 ივნისის სტიქიისგან ყველაზე მეტად დაზარალებული სვანიძის ქუჩის მოსახლეობას მდინარე ვერეს კალაპოტის ცვლილების პროექტი გააცნოს. კომიტეტი უკვე კარგა ხანია მერიისგან ამ პროექტს ითხოვს, მაგრამ ამაოდ.

„მიმდინარე წლის 13 სექტემბერს „სვანიძის ქუჩის დაზარალებულთა კომიტეტმა“ თბილისის მერს, დავით ნარმანიას განცხადებით მიმართა და ითხოვა მდინარე ვერეს კალაპოტის ცვლილების პროექტი. მოგეხსენებათ, სვანიძის ქუჩის მაცხოვრებლებმა საკუთარ  თავზე იწვნიეს მდინარე ვერეს მიერ დატრიალებული ტრაგედია. კომიტეტი თბილისის მერს სთხოვდა, სვანიძის ქუჩის მოსახლეობისთვის აღნიშნული პროექტი მანამდე გაეცნო, სანამ მისი განხორციელება დაიწყება. ასევე ვითხოვეთ, ჩვენთვის წარმოედგნათ შესაბამისი სპეციალისტების კომპეტენტური დასკვნა.

პასუხი ქ. თბილისის მუნიციპალიტეტის მერიის კეთილმოწყობის საქალაქო სამსახურიდან მივიღეთ. აღნიშნულმა უწყებამ გამოგვიგზავნა მდინარე ვერეს კალაპოტის ცვლილების პროექტის შესახებ სამხარაულის სახელობის სასამართლო ექსპერტიზის ეროვნული ბიუროს ექსპერტების მიერ დაწერილი დასკვნა, რომელიც ცალსახად უარყოფითია და მისი განხორციელების შემთხვევაში, სტიქიის შემოტევისას, დედაქალაქის მოსალეობას კვლავ საფრთხე დაემუქრება.

თბილისის კეთილმოწყობის საქალაქო სამსახურიდან ასევე გვწერენ, რომ ჩვენი დაინტერესების შემთხვევაში, შესაძლებელია დაიგეგმოს საპროექტო დოკუმენტაციის განხილვა ქალაქ თბილისის მუნიციპალიტეტის მერიის კეთილმოწყობის საქალაქო სამსახურში საპროექტო ორგანიზაციის წარმომადგენლობის მონაწილეობით.

„სვანიძის ქუჩის დაზარალებულთა კომიტეტმა“ განცხადებით ამჯერად მერიის კეთილმოწყობის საქალაქო სამსახურის ხელმძღვანელს, გივი კუბლაშვილს მიმართა.

„ბატონო გივი, ჩვენი 2016 წლის 13 სექტემბრის N102 (რეგისტრაციის N330184/17 14.09.2016) წერილის საპასუხოდ, რომლითაც ვითხოვდით მდინარე ვერეს კალაპოტის ცვლილების პროექტს და  შესაბამისი სპეციალისტების კომპეტენტურ დასკვნას, თქვენმა სამსახურმა გამოგვიგზავნა მდინარე ვერეს კალაპოტის შესახებ ექსპერტიზის დასკვნა, რისთვისაც დიდ მადლობას გიხდით. ამასთან ერთად გვწერთ, რომ ჩვენი დაინტერესების შემთხვევაში, შესაძლებელია დაიგეგმოს საპროექტო დოკუმენტაციის განხილვა ქალაქ თბილისის მუნიციპალიტეტის მერიის კეთილმოწყობის საქალაქო სამსახურში საპროექტო ორგანიზაციის წარმომადგენლობის მონაწილეობით.

ბატონო გივი, გვინდა მოგახსენოთ, რომ სიამოვნებით მივიღეთ მონაწილეობას აღნიშნული პროექტის განხილვაში, მაგრამ იმისათვის, რომ ასეთ სხდომაში მივიღოთ მონაწილეობა და ჩვენი მოსაზრება დავაფიქსიროთ, აუცილებელია მანამდე გავეცნოთ არსებულ პროექტს. ამიტომ გთხოვთ, გამოგვიგზავნოთ ან ადგილზე გადმოგვცეთ ამ პროექტის ასლი.

ამასთანავე მოგიწოდებთ, რომ სასწრაფოდ შეიმუშაოთ მდინარე ვერეს კალაპოტის პროექტის საბოლოო ვარიანტი და განახორციელოთ მანამ, სანამ თავს მორიგი უბედურება არ დაგვტყდომია“ -ნათქვამია განცხადებაში.

 

დატოვეთ კომენტარი

კომენტარები

Загрузка...