შინაგან საქმეთა მინისტრი გიორგი მღებრიშვილი სოფელ დაბაში ჩავიდა. შინაგან საქმეთა სამინისტროს ინფორმაციით, მღებრიშვილი ხანძრის სალოკალიზაციო სამუშაოებს უშუალოდ ხელმძღვანელობს და ვითარებას ადგილზე ეცნობა.

როგორც გიორგი მღებრიშვილმა განაცხადა, ცეცხლის გავრცელების საშიშროება აღარ არსებობს.

„ამ ეტაპისთვის ცეცხლი ლოკალიზებულია. მისი გავრცელების საშიშროება აღარ არსებობს. მიმდინარეობს უკვე ხანძრის ლიკვიდაცია. წუხელ, მთელი ღამის განმავლობაში 200-ზე მეტი მეხანძრე-მაშველი მუშაობდა. ჩვენ საქართველოს ყველა რეგიონიდან დავახმარეთ ადგილობრივებს, სამაშველო სამსახურებსა და სახანძროს ჩვენი თანამშრომლები. ბიჭებმა ძალიან ეფექტურად იმუშავეს, მიუხედავად საკმაოდ რთული მდებარეობისა და რელიეფისა. ასევე, ხანძრის გავრცელებას ძალიან უწყობდა ხელს ქარი და თუკი ბუნებრივი პირობები ხელს შეგვიწყობს, უახლოეს საათებში ხანძარი უკვე ლიკვიდირებული იქნება”, – განაცხადა გიორგი მღებრიშვილმა. 

ბორჯომში, სოფელ დაბასთან ხანძარს აქტიურ რეჟიმში აქრობენ. როგორც საგანგებო სიტუაციების მართვის სამსახურში აცხადებენ, ადგილზე მობილიზებულია 200-მდე მეხანძრე-მაშველი შესაბამის ტექნიკასთან ერთად.

მათი ინფორმაციით, ტექნიკის შეყვანა ხანძრის კერასთან მოხერხდა, ღამით გზა გაიჭრა და ამ დროისათვის, უკვე შეყვანილია სახანძრო მანქანებიც. გამთენიისას, ადგილზე ვერტმფრენმაც განაახლა მუშაობა. 

ღამით იყო ძლიერი ქარი, რის გამოც, ხანძრის ლოკალიზება ვერ მოხერხდა. დასახლებულ პუნქტში ხანძრის გავრცელების საშიშროება კვლავ არ არსებობს.

ეროვნული სატყეო სააგენტოს ინფორმაციით, სამცხე-ჯავახეთის რეგიონში, სოფელ დაბის ტერიტორიაზე, 2008 წლის რუსეთ-საქართველოს ომის დროს გადამწვარი ტყის ხანძრის ბოლომდე ლოკალიზება ამ დრომდე ვერ ხერხდება. 

მათივე ცნობით, ადგილზე მთელი ღამის განმავლობაში მძიმე ტექნიკის დახმარებით მიმდინარეობდა ხანძრამდე მისასვლელი გზის გაწმენდითი სამუშაობები. დილის 06.00 საათიდან ადგილზე ვერტმფრენი და სამაშველო სამსახურები აგრძელებდნენ მუშაობას.  

როგორც სააგენტოს ინფორმაციაშია აღნიშნული, ამ დროისთვის ცეცხლი 2 ჰა-ზე მეტ ფართობზეა გავრცელებული. დამწვარია ძველი ნახანძრალი და ბუჩქნარი. ამ ეტაპზე ცეცხლი ტყის მასივზე არ გავრცელებულა.

 1tv.ge

დატოვეთ კომენტარი

კომენტარები

Загрузка...