ქალთა ინიციატივების მხარდამჭერი ჯგუფის ცნობით, ერთწლიანი განხილვის შედეგად, 17 მაისის საქმეში ბრალდებული პირების: ბექა სალუქვაძის, ტიტალ დავრიშიანის, ირაკლი ბასილაიას (მცხეთის წმ. იოანეს სახელობის დედათა მონასტრის იღუმენი იოანე) და გიორგი ბასიაშვილის საქმეზე სააპელაციო სასამართლომ არ დააkმაყოფილა ძველი თბილისის რაიონული პროკურატურის საჩივარი და ძალაში დატოვა პირველი ინსტანციის სასამართლოს გამამართლებელი გადაწყვეტილება.

ზემოხსენებულ ოთხ პირს ბრალად ედებოდათ 2013 წლის 17 მაისს, ჰომოფობიისა და ტრანსფობიის წინააღმდეგ ბრძოლის საერთაშორისო დღისადმი მიძღვნილი აქციის ჩატარებისათვის უკანონოდ ხელის შეშლა, ძალადობით ან ძალადობის მუქარით. დანაშაული გათვალისწინებულია საქართველოს სისხლის სამართლის კოდექსის 161-ე მუხლის პირველი ნაწილით.

დამტკიცების შემთხვევაში, მსგავსი დანაშაული ისჯება ჯარიმით ან გამასწორებელი სამუშაოთი ვადით ერთ წლამდე, ანდა თავისუფლების აღკვეთით ვადით ორ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე.

ერთ-ერთი ბრალდებული, სასულიერო პირი ირაკლი ბასილაია 2013 წლის 17 მაისს ნეტგაზეთის კამერამ იმ დროს დააფიქსირა, როცა მან ლგბტ აქციის მონაწილეების დევნისას ურნიდან რკინის სკამი ამოიღო.

2015 წლის 23 ოქტომბერს, თბილისის საქალაქო სასამართლოში, მოსამართლე დავით მგელიაშვილმა, ბრალდებული პირები უდანაშაულოდ სცნო, მაგრამ სასამართლოს გადაწყვეტილება პროკურატურამ გაასაჩივრა სააპელაციო სასამართლოში.

მეორე ინსტანციაში საქმის განხილვა დაახლოებით ერთი წლის წინ, 2016 წლის 21 სექტემბერს დაიწყო და დღეს, მოსამართლე გერონტი კახეთელიძის მიერ ბრალდებულთა გამამართლებელი განაჩენის გამოცხადებით დაასრულა.

on.ge

დატოვეთ კომენტარი

კომენტარები

Загрузка...