ოკუპანტმა რუსეთმა გალის სოფელ თაგილონში საბაზო სკოლა დახურა. აფხაზეთის განათლებისა და კულტურის მინისტრის მოადგილის ბესიკ ოდიშარიას თქმით, ოფიციალური ბრძანება სკოლის დირექტორს ჯერ არ ჩაბარებია, თუმცა სკოლის მოსწავლეები და მასწავლებლები თაგილონში მოქმედ საშუალო სკოლასა და ნაბაკევში უკვე გადაანაწილეს. ინფორმაციას 1tv ავრცელებს.

თაგილონის საბაზო სკოლაში, რომელიც 9 კლასს მოიცავდა, ბოლო მონაცემებით, 23 ბავშვი სწავლობდა და 12 მასწავლებელი მუშაობდა. მათგან 15 მოსწავლე თაგილონის საშუალო სკოლაში, 8 მოსწავლე კი სოფელ ნაბაკევის მე-13 სკოლაში გადაიყვანეს. რაც შეეხება მასწავლებლებს, 5 პედაგოგის გარდა ყველა გადაანაწილეს სხვადასხვა სკოლაში, დარჩენილები კი საპენსიო ასაკის არიან.

“სამწუხაროდ, ეს ტენდენცია გრძელდება. საკითხი IPRM-ის შეხვედრაზეც დავაყენეთ და დავაფიქსირეთ ჩვენი პროტესტი. მუშაობა ჩვენს პარტნიორებთან მიმართულია იქითკენ, რომ შეკავდეს ეს პროცესი” – განაცხადა შერიგებისა და სამოქალაქო თანასწორობის საკითხებში სახელმწიფო მინისტრმა ქეთევან ციხელაშვილმა.

დატოვეთ კომენტარი

კომენტარები

Загрузка...