ჟურნალ `სარკე`-ს რედაქტორის მოადგილე _ ირინე მჭედლიძემ ფოსტალიონთან 2008 წლის ომის წინა დღეები გაიხსენა:

`აგვისტოს ომამდე რამდენიმე კვირით ადრე ცხინვალში შევედი (არ მინდა, დავწერო სიტყვა ,,შევიპარე”, შენს სახლში უბრალოდ შედიხარ) ჟურნალ ,,სარკისთვის” რეპორტაჟის გასაკეთებლად. მაშინ უკვე მთელი ქალაქი ომის შიშით ცხოვრობდა. ამბობდნენ, მიშა ომს იწყებსო. ვუმტკიცებდი, რა ომი, ერთად უნდა ვიცხოვროთ-მეთქი. მაშინ წყალი რატომ გადაგვიკეტეთო… მოკლედ, პროპაგანდის მანქანა დიდი ხნით ადრე იყო მოქოქილი… მერე დაიწყო კოშმარი. ძალიან მძიმედ მახსოვს ერთი ეპიზოდი: ხმა გავრცელდა, ქართულ სოფლებში საფლავებს ტანკებმა გადაურეს და მიცვალებულები საფლავებიდან ამოყარესო. ბიძაჩემი ცეცხლმოკიდებულ სოფლებში ხოხვა-ხოხვით შევიდა. იქიდან რომ გამოვიდა, ჰკითხეს, შენი სახლი როგორ დაგხვდაო. უპასუხა, იქით არც გამიხედავს, ჩემი თათიას საფლავი ვნახე და წამოვედიო.
ვამაყობ ჩემი გულადი ბიძებით და გულადი სამაჩაბლოელებით. ერთი რამ ზუსტად ვიცი _ ბოლოს ყველა სახლში ბრუნდება!`

Postalioni.com

დატოვეთ კომენტარი

კომენტარები

Загрузка...