“სვანიძის ქუჩის დაზარალებულთა კომიტეტმა” თბილისის მერ დავით ნარმანიას განცხადებით მიმართა და კიდევ ერთხელ შეახსენა, რომ სტიქია გარდაუვალია. ფატალური შედეგების თავიდან ასაცილებლად თბილისის მერია არაფერს აკეთებს. სვანიძის ქუჩის მოსახლეობა კი გასაქცევი გზის გაკეთებას ითხოვს.

“ბატონო დავით, მოგეხსენებათ, ვაკეში მდებარე სვანიძის პატარა ქუჩა მდინარე ვერეს ხეობაშია მოქცეული და მთებით არის გარშემორტყმული. 13-14 ივნისს თბილისში მომხდარმასტიქიამ ამ ქუჩაზე 8 ადამიანის სიცოცხლე იმსხვერპლა. გზის დატბორვამდე ვინც გაასწრო და თამარაშვილის ქუჩაზე გავიდა, გადარჩა.  მათ რომ 2 წუთი მაინც დაეგვიანათ, ორ მეტრზე დიდი სიმაღლის ნიაღვარს ვეღარ გაასწრებდნენ. გადარჩნენ აგრეთვე ისინი, ვინც მთაზე ასვლა შეძლო. იმ მთაზე, რომელზეც საცალფეხო ბილიკებიც კი არ არის გაკვალული. მოხუცებს და ბავშვებს ტალახიან, სველმიწიან აღმართზე ასვლა უჭირდათ, ფეხი უცურდებოდათ და მხოლოდ ღვთის წყალობით თუ გადაურჩნენ სიკვდილს. ვინც ვერც მთაზე ასვლა მოახერხა, მოვარდნილმა ნიაღვარმა იმსხვერპლა.

„სვანიძის ქუჩის დაზარალებულთა კომიტეტმა“ და მისმა თავმჯდომარემ, თამაზ ელიზბარაშვილმა მრავალჯერ გააფრთხილა დედაქალაქის მთავრობა, რომ სასწრაფოდ გამოგენახათ ბიუჯეტიდან თანხები ან მოგეძიებინათ დონორები და მდინარე ვერეს ხეობაში უზრუნველგეყოთ დამბებისა და ცხაურების გაკეთება. ჩვენი ინფორმაციით, წყნეთი-ახალდაბის დამაკავშირებელ გზაზე ორჯერ იმაზე დიდი მთის მასა ემზადება მოსაწყვეტად, ვიდრე 13 ივნისს ჩამოიშალა. ეს კი, მოგეხსენებათ, ისევ გამოიწვევს ხეობის ჩახერგვას. სტიქია აუცილებლად განმეორდება და, შესაძლოა, ბევრად დიდი მსხვერპლი მოჰყვეს!

ბატონო დავით, რადგან ტრაგედია გარდაუვალია და თქვენ კი ჯიუტად გაქვთ გადაწყვეტილი, რომ ჩვენი თხოვნა,დამბებისა და ცხაურების გაკეთების შესახებ, არ შეასრულოთ, მოვითხოვთ, სვანიძის ქუჩის ნაპირას მდებარე მთის რომელიმე ფერდობზე  სასწრაფოდ გააკეთოთ კეთილმოწყობილი, რკინა-ბეტონის კონსტრუქციის მინიმუმ საცალფეხო კიბე, რომელიც ამ მთის ძირს დააკავშირებს ჭავჭავაძის ქუჩასთან, რათა სტიქიის დროს მოსახლეობამ ამ კიბით მაინც შეძლოს თავის დაღწევა და გადარჩენა. ვიმეორებთ, ამჟამად, 13-14 ივნისის სტიქის მსგავსის განმეორების შემთხვევაში,ამ ქუჩის მოსახლეობის გადარჩენის  ერთადერთი გზა სწორედ მთაზე ასვლაა” – ნათქვამია განცხადებაში.

წყარო: postalioni.com

დატოვეთ კომენტარი

კომენტარები

Загрузка...